ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವೆಸ್ಟ್ ಇಂಡೀಸ್‌ನ ದೈತ್ಯ ಆಲ್‌ರೌಂಡರ್ ಆ್ಯಂಡ್ರೆ ರಸೆಲ್ ಅವರು ಇಂಡಿಯನ್ ಪ್ರೀಮಿಯರ್ ಲೀಗ್ ನಿಂದ ನಿವೃತ್ತಿ ಘೋಷಿಸಿದ್ದಾರೆ. ಆದರೆ, ಕೊಲ್ಕತ್ತಾ ನೈಟ್ ರೈಡರ್ಸ್ ಅಭಿಮಾನಿಗಳಿಗೆ ಇದೊಂದು ಮಿಶ್ರ ಭಾವನೆಯ ಸುದ್ದಿ. ಏಕೆಂದರೆ, ತಮ್ಮ ನೆಚ್ಚಿನ ತಂಡವಾದ KKR ಪರ ಅವರು ಇನ್ನು ಮುಂದೆ ‘ಪವರ್ ಕೋಚ್’ ಆಗಿ ಹೊಸ ಇನ್ನಿಂಗ್ಸ್ ಆರಂಭಿಸಲಿದ್ದಾರೆ.
ಇತ್ತೀಚೆಗೆ KKR ತಂಡದಿಂದ ಬಿಡುಗಡೆಯಾದ 37 ವರ್ಷದ ರಸೆಲ್, ಮುಂದಿನ ಸೀಸನ್‌ನಲ್ಲಿ ಬೇರೆ ಯಾವುದೇ ತಂಡದ ಪರ ಆಡುವ ಇಚ್ಛೆ ಇಲ್ಲದಿರುವುದನ್ನು ಸ್ಪಷ್ಟಪಡಿಸುತ್ತಾ ಐಪಿಎಲ್‌ಗೆ ವಿದಾಯ ಹೇಳಿದ್ದಾರೆ.
ರಸೆಲ್ ಅವರು, “ನಾನು ನನ್ನ ಐಪಿಎಲ್ ಬೂಟುಗಳನ್ನು ನೇತುಹಾಕುತ್ತಿದ್ದೇನೆ. ಆದರೆ ಇದು ಸೊಕ್ಕಿನ ನಡೆಯಲ್ಲ, ಕಳೆದ 12 ಸೀಸನ್‌ಗಳ ನೆನಪುಗಳು ಮತ್ತು KKR ಕುಟುಂಬದ ಮೇಲಿನ ಅಪಾರ ಪ್ರೀತಿಯಿಂದ ಈ ನಿರ್ಧಾರ ತೆಗೆದುಕೊಂಡಿದ್ದೇನೆ. ನಾನು ಪ್ರಪಂಚದಾದ್ಯಂತ ಇತರ ಲೀಗ್‌ಗಳಲ್ಲಿ ಸಿಕ್ಸರ್‌ಗಳನ್ನು ಮತ್ತು ವಿಕೆಟ್‌ಗಳನ್ನು ಪಡೆಯುವುದನ್ನು ಮುಂದುವರಿಸುತ್ತೇನೆ. ಆದರೆ ಸಂತೋಷದ ವಿಷಯವೆಂದರೆ, ನಾನು KKR ಅನ್ನು ಬಿಟ್ಟು ಹೋಗುತ್ತಿಲ್ಲ,” ಎಂದು ತಿಳಿಸಿದ್ದಾರೆ.
ಐಪಿಎಲ್‌ಗೆ ವಿದಾಯ ಘೋಷಿಸಿದ ಬೆನ್ನಲ್ಲೇ, ಆ್ಯಂಡ್ರೆ ರಸೆಲ್ ಅವರು ಮುಂದಿನ ಸೀಸನ್‌ನಿಂದ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡದ ‘ಪವರ್ ಕೋಚ್’ ಆಗಿ ಕಾರ್ಯನಿರ್ವಹಿಸಲಿದ್ದಾರೆ ಎಂಬುದನ್ನು ಖಚಿತಪಡಿಸಿದ್ದಾರೆ. ಈ ಮೂಲಕ, ಅವರು ತಮ್ಮ ದೀರ್ಘಾವಧಿಯ KKR ಒಡನಾಟವನ್ನು ಮುಂದುವರಿಸುತ್ತಿದ್ದಾರೆ.
2012 ರಲ್ಲಿ ಡೆಲ್ಲಿ ಡೇರ್ ಡೆವಿಲ್ಸ್ (ಈಗಿನ ಡೆಲ್ಲಿ ಕ್ಯಾಪಿಟಲ್ಸ್) ಪರ IPL ಆರಂಭಿಸಿದ ರಸೆಲ್, 2014 ರಲ್ಲಿ KKR ತಂಡಕ್ಕೆ ಸೇರ್ಪಡೆಯಾದರು. ಅಲ್ಲಿಂದ ಸತತ 12 ಸೀಸನ್‌ಗಳ ಕಾಲ ಅವರು ತಂಡದ ಅವಿಭಾಜ್ಯ ಅಂಗವಾಗಿದ್ದರು. ಈ ವರ್ಷ KKR ಇವರನ್ನು ಬಿಡುಗಡೆ ಮಾಡಿದರೂ, ತಕ್ಷಣವೇ ಅವರನ್ನು ‘ಪವರ್ ಕೋಚ್’ ಆಗಿ ನೇಮಕ ಮಾಡಿದ್ದು ವಿಶೇಷ.
ಆ್ಯಂಡ್ರೆ ರಸೆಲ್ ತಮ್ಮ IPL ವೃತ್ತಿಜೀವನದಲ್ಲಿ 139 ಪಂದ್ಯಗಳನ್ನಾಡಿದ್ದು, 115 ಇನ್ನಿಂಗ್ಸ್‌ಗಳಲ್ಲಿ ಬ್ಯಾಟ್ ಬೀಸಿ 12 ಅರ್ಧಶತಕಗಳೊಂದಿಗೆ ಒಟ್ಟು 2651 ರನ್‌ಗಳನ್ನು ಗಳಿಸಿದ್ದಾರೆ. ಜೊತೆಗೆ, ಅವರು 123 ವಿಕೆಟ್‌ಗಳನ್ನು ಪಡೆದು ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ಮುಖ್ಯವಾಗಿ, 2014 ಮತ್ತು ಇತ್ತೀಚೆಗೆ 2024 ರಲ್ಲಿ KKR ಚಾಂಪಿಯನ್ ಪಟ್ಟ ಅಲಂಕರಿಸುವಲ್ಲಿ ರಸೆಲ್ ಅವರ ಪ್ರದರ್ಶನ ಪ್ರಮುಖವಾಗಿತ್ತು. ಇದೀಗ ಅವರು KKR ಪರ ಕೋಚ್ ಆಗಿ ಹೊಸ ಜವಾಬ್ದಾರಿ ಹೊರಲು ಸಿದ್ಧರಾಗಿದ್ದಾರೆ.
