ಹೊಸ ದಿಗಂತ ಡಿಜಿಟಲ್ ಡೆಸ್ಕ್:
ಉದ್ಯಮಿ ವಿಜಯ್ ಮಲ್ಯ ವಿರುದ್ಧ ದೇಶಭ್ರಷ್ಟ ಆರ್ಥಿಕ ಅಪರಾಧಿ (FEO) ಕಾಯ್ದೆಯಡಿ ಪ್ರಕರಣ ದಾಖಲಿಸಿರುವುದನ್ನು ಪ್ರಶ್ನಿಸಿ ಸಲ್ಲಿಸಲಾದ ಅರ್ಜಿಯ ವಿಚಾರಣೆಯನ್ನು ಬಾಂಬೆ ಹೈಕೋರ್ಟ್ ನಡೆಸಿದ್ದು, ಈ ವೇಳೆ ಅವರು ಭಾರತಕ್ಕೆ ಯಾವಾಗ ಮರಳುತ್ತಾರೆ ಎಂಬುದನ್ನು ವಕೀಲರು ದೃಢಪಡಿಸಿದ ನಂತರವೇ ವಿಚಾರಣೆ ಮುಂದುವರಿಯಲಿದೆ ಎಂದು ಹೇಳಿದೆ.
ಮಲ್ಯ ಪ್ರಸ್ತುತ ಲಂಡನ್ನಲ್ಲಿದ್ದಾರೆ ಎಂದು ಅವರ ವಕೀಲ ಅಮಿತ್ ದೇಸಾಯಿ ಮಾಹಿತಿ ನೀಡಿದರು. ಈ ವೇಳೆ ಮುಖ್ಯ ನ್ಯಾಯಮೂರ್ತಿ, ನೀವು ಇಲ್ಲಿಗೆ ಬನ್ನಿ, ನಂತರ ನಾವು ನಿಮ್ಮ ಮಾತನ್ನು ಕೇಳುತ್ತೇವೆ. ಅವರು ಯಾವಾಗ ಬರುತ್ತಾರೆ ಎಂಬುದರ ಕುರಿತು ಸೂಚನೆಗಳನ್ನು ತೆಗೆದುಕೊಳ್ಳಿ ಎಂದು ಪ್ರತಿಕ್ರಿಯಿಸಿದರು.
ಬಳಿಕ ನ್ಯಾಯಾಲಯವು ಪ್ರಕರಣವನ್ನು ಡಿಸೆಂಬರ್ 23ಕ್ಕೆ ಮುಂದೂಡಿತು.
ಜಾರಿ ನಿರ್ದೇಶನಾಲಯದ (ED) ಪ್ರತಿನಿಧಿಗಳಾದ ಎಎಸ್ಜಿ ಎಸ್.ವಿ. ರಾಜು ಮತ್ತು ಅನಿಲ್ ಸಿಂಗ್, ಮಲ್ಯ ಅವರ ಅರ್ಜಿಯನ್ನು ವಜಾಗೊಳಿಸುವಂತೆ ಕೋರಿದ್ದರು. ಮಲ್ಯ 6,200 ಕೋಟಿ ರೂಪಾಯಿಗೂ ಹೆಚ್ಚಿನ ಬ್ಯಾಂಕ್ ವಂಚನೆಯಲ್ಲಿ ಭಾಗಿಯಾಗಿದ್ದಾರೆ ಮತ್ತು ಸುಮಾರು 15,000 ಕೋಟಿ ರೂ. ಬಾಕಿ ಉಳಿಸಿಕೊಂಡಿದ್ದಾರೆ ಎಂದು ಆರೋಪಿಸಿದೆ. ವಿದೇಶದಲ್ಲಿರುವುದರಿಂದ ಭಾರತದಲ್ಲಿ ನ್ಯಾಯಾಂಗ ಪ್ರಕ್ರಿಯೆಗೆ ಒಳಗಾಗಲು ನಿರಾಕರಿಸಿರುವ ಪರಾರಿಯಾದ 2018ರ ಪರಾರಿಯಾದ ಆರ್ಥಿಕ ಅಪರಾಧಿ ಕಾಯ್ದೆಯ (ಪ್ಯುಗಿಟಿವ್ ಎಕನಾಮಿಕ್ ಆಫೆಂಡರ್ ಆಕ್ಟ್, 2018) ಅಡಿಯಲ್ಲಿ ವಿಚಾರಣೆ ನಡೆಸಲು ಅನುಮತಿ ನೀಡಲು ನಿರಾಕರಿಸಬೇಕು ಎಂದು ಸಂಸ್ಥೆ ನ್ಯಾಯಾಲಯವನ್ನು ಕೋರಿತು.
ಮಲ್ಯ ಪರ ವಕೀಲರು FEO ಕಾಯ್ದೆಯ ಸೆಕ್ಷನ್ 12(8) ಅನ್ನು ಅಸಂವಿಧಾನಿಕ ಎಂದು ವಾದಿಸಿದರು. ಖುಲಾಸೆಗೊಂಡರೆ ಮುಟ್ಟುಗೋಲು ಹಾಕಿಕೊಂಡ ಆಸ್ತಿಗಳನ್ನು ಪುನಃಸ್ಥಾಪಿಸಲು ಯಾವುದೇ ಅವಕಾಶವಿಲ್ಲ ಎಂದು ವಾದಿಸಿದರು. ಆದರೆ ವಿಶೇಷ ನ್ಯಾಯಾಲಯವು ವ್ಯಕ್ತಿಯು ಪರಾರಿಯಾಗಿರುವ ಆರ್ಥಿಕ ಅಪರಾಧಿ ಅಲ್ಲ ಎಂದು ನಿರ್ಧರಿಸಿದರೆ ಆಸ್ತಿಗಳನ್ನು ಹಿಂದಿರುಗಿಸಲು ಸೆಕ್ಷನ್ 12 ರ ಉಪ-ವಿಭಾಗ (9) ಅನುಮತಿಸುತ್ತದೆ ಎಂದು ED ಪ್ರತಿಪಾದಿಸಿತು. ಆರೋಪಿಯು ಭಾರತಕ್ಕೆ ಮರಳಿದರೆ ಮತ್ತು ನಿಗದಿತ ಅಪರಾಧದಿಂದ ಖುಲಾಸೆಗೊಂಡರೆ ಮಾತ್ರ ಪುನಃಸ್ಥಾಪನೆ ಸಾಧ್ಯ ಎಂದು ED ಹೇಳಿತು. ಮಲ್ಯ ಅವರ FEO ಘೋಷಣೆ ಮತ್ತು ಆಸ್ತಿ ಮುಟ್ಟುಗೋಲನ್ನು ಎತ್ತಿಹಿಡಿಯುವಂತೆ ಸಂಸ್ಥೆ ಹೈಕೋರ್ಟ್ಗೆ ವಿನಂತಿಸಿತು..
