ನೀಟ್ ಫಲಿತಾಂಶ- ರಾಷ್ಟ್ರೋತ್ಥಾನದ ‘ಸಾಧನಾ’ ಬ್ಯಾಚ್ ಸಾಧನೆ ಇದು

ಹೊಸದಿಗಂತ ವರದಿ ಬೆಂಗಳೂರು:

2023ರ ನೀಟ್ ಪರೀಕ್ಷೆಯ ಫಲಿತಾಂಶ ಬಂದಿದ್ದು, ರಾಷ್ಟ್ರೋತ್ಥಾನದ ಸಾಧನಾ ಯೋಜನೆಯಡಿಯಲ್ಲಿ ಉಚಿತ ಶಿಕ್ಷಣ ಪಡೆದಿರುವ ಎಲ್ಲ 45 ವಿದ್ಯಾರ್ಥಿನಿಯರೂ NEET ಅರ್ಹತಾ ಅಂಕಗಳನ್ನು ಪಡೆದಿದ್ದಾರೆ.
ಸಾಧನಾ 5ನೇ ಬ್ಯಾಚಿನಲ್ಲಿ ಓದಿದ ಮಂಡ್ಯದ ರಿತ್ವಿಜಾ ದೇವೇಗೌಡ 720ಕ್ಕೆ 670 ಅಂಕಗಳು (ಅಖಿಲ ಭಾರತ ರ್ಯಾಂಕ್ 3027), ಕೊಟ್ಟೂರಿನ ಎಸ್. ಜೆ. ಯಶಸ್ವಿನಿ 645 ಅಂಕಗಳು (ಅ.ಭಾ.ರ್ಯಾ. 8266) ಹಾಗೂ ಚಿತ್ರದುರ್ಗದ ವರ್ಷಾ ಎಸ್. 627 ಅಂಕಗಳನ್ನು (ಅ.ಭಾ.ರ್ಯಾ. 14896) ಪಡೆದಿರುತ್ತಾರೆ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ಇವರೆಲ್ಲರೂ ಗ್ರಾಮೀಣ ಭಾಗದ ಆರ್ಥಿಕವಾಗಿ ಹಿಂದುಳಿದ ಕುಟುಂಬದಿಂದ ಬಂದ ಬಾಲಕಿಯರಾಗಿದ್ದಾರೆ.

ಸಾಧನಾ ಇದು ರಾಷ್ಟ್ರೋತ್ಥಾನ ಪರಿಷತ್ತಿನ ಅಪೂರ್ವ ಯೋಜನೆ. ಹೆಣ್ಣೊಂದು ಕಲಿತರೆ ಶಾಲೆಯೊಂದು ತೆರೆದಂತೆ ಎಂಬ ಚಿಂತನೆಯನ್ನು ಸದಾ ಆದ್ಯತೆಯಲ್ಲಿಟ್ಟು ಹೆಣ್ಣು ಮಕ್ಕಳ ಶಿಕ್ಷಣದ ಬಗ್ಗೆ ವಿಶೇಷ ಕಾಳಜಿ ಹೊಂದಿರುವ ರಾಷ್ಟ್ರೋತ್ಥಾನ ಪರಿಷತ್ ಈ ಸಾಧನಾ ಎಂಬ ಯೋಜನೆಯನ್ನು ಅತ್ಯಂತ ವಿಶಿಷ್ಟ ರೀತಿಯಲ್ಲಿ ನಡೆಸಿಕೊಂಡು ಬರುತ್ತಿದೆ.

ಈ ಯೋಜನೆಯಲ್ಲಿ ಆರ್ಥಿಕ ಅನನುಕೂಲತೆ ಹೊಂದಿರುವ, ಗ್ರಾಮೀಣ ಪ್ರದೇಶದ ಹಾಗೂ ವೈದ್ಯಕೀಯ ಶಿಕ್ಷಣವನ್ನು ಪಡೆಯುವ ಇಚ್ಛೆ ಹೊಂದಿರುವ ಪ್ರತಿಭಾವಂತ ಹೆಣ್ಣುಮಕ್ಕಳನ್ನು ಹಲವು ಹಂತಗಳ ಪ್ರವೇಶ ಪರೀಕ್ಷೆಯ ಮೂಲಕ ಆಯ್ಕೆ ಮಾಡಲಾಗುತ್ತದೆ. ಆ ಹೆಣ್ಣು ಮಕ್ಕಳಿಗೆ ಎರಡು ವರ್ಷ ಪದವಿಪೂರ್ವ ಶಿಕ್ಷಣ, ವೈದ್ಯಕೀಯ ಪ್ರವೇಶ ಪರೀಕ್ಷೆಗಳ ತರಬೇತಿ (CET, NEET) ಹಾಗೂ ಉಚಿತ ಊಟ-ವಸತಿಗಳ ವ್ಯವಸ್ಥೆಯನ್ನು ಒದಗಿಸಲಾಗುತ್ತದೆ.

2017ರಿಂದ ಪ್ರಾರಂಭವಾಗಿರುವ ಸಾಧನಾಗೆ BASE ಸಂಸ್ಥೆಯವರ ಶೈಕ್ಷಣಿಕ ಸಹಕಾರವಿದೆ. ಇಲ್ಲಿಯವರೆಗೆ 4 ಬ್ಯಾಚುಗಳಲ್ಲಿ ಒಟ್ಟು 200 ವಿದ್ಯಾರ್ಥಿನಿಯರು ಈ ಯೋಜನೆಯ ಪ್ರಯೋಜನ ಪಡೆದಿದ್ದು, 54 ಮಂದಿ ವೈದ್ಯಕೀಯ ಶಿಕ್ಷಣಕ್ಕೆ ಪ್ರವೇಶ ಪಡೆದಿದ್ದಾರೆ.