ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಉತ್ತರ ಪ್ರದೇಶದ ಕೆಲ ನಗರ ಪಟ್ಟಣಕ್ಕೆ ಸಿಎಂ ಯೋಗಿ ಆದಿತ್ಯನಾಥ್ ಸರ್ಕಾರ ಮರುನಾಮಕರಣ ಮಾಡಿದ್ದು, ಇದೀಗ ಅಲಿಘಡ ನಗರದ ಹೆಸರನ್ನು ಹರಿಘಡವಾಗಿ ಮರುನಾಮಕರಣ ಮಾಡಲಾಗುತ್ತಿದೆ. ಅಲಿಘಡ ಮನ್ಸಿಪಲ್ ಕಾರ್ಪೋರೇಶನ್ ಮರುನಾಮಕರಣ ಪ್ರಸ್ತಾವನೆಯನ್ನು ಒಪ್ಪಿಕೊಂಡಿದೆ. ಇದೀಗ ಮರುನಾಮಕರಣ ಹೆಸರನ್ನು ಸರ್ಕಾರಕ್ಕೆ ಕಳುಹಿಸಲಾಗಿದ್ದು, ಶೀಘ್ರದಲ್ಲೇ ಅಲಿಘಡ ಅಧಿಕೃತವಾಗಿ ಹರಿಘಡವಾಗಿ ಮರುನಾಮಕರಣಗೊಳ್ಳಲಿದೆ.
ಅಲಿಘಡ(Aligharh) ಮುನ್ಸಿಪಲ್ ಕೌನ್ಸಿಲ್ ಸದಸ್ಯರು ಸರ್ವಾನುಮತದಿಂದ ಮರುನಾಮಕರಣ ಪ್ರಸ್ತಾವನೆಯನ್ನು ಒಪ್ಪಿಕೊಂಡಿದ್ದಾರೆ. ಈ ಮೂಲಕ ಬಹು ದಿನಗಳ ಬೇಡಿಕೆಯನ್ನು ನಾವು ಈಡೇರಿಸಲು ಪ್ರಯತ್ನ ಪಟ್ಟಿದ್ದೇವೆ. ಅಲಿಘಡವನ್ನು ಹರಿಘಡ ಮಾಡಲು ಹಲವು ಪ್ರಯತ್ನಗಳು, ಹೋರಾಟಗಳು ನಡೆದಿದೆ. ಇವೆಲ್ಲವನ್ನೂ ಗಮನದಲ್ಲಿಟ್ಟುಕೊಂಡು ಮರುನಾಮಕರಣ ಪ್ರಸ್ತಾವನೆಯನ್ನು ಮುನ್ಸಿಪಲ್ ಕೌನ್ಸಿಲ್‌ನಲ್ಲಿ ಮಂಡಿಸಲಾಗಿತ್ತು. ಒಪ್ಪಿಗೆ ಸಿಕ್ಕಿದೆ. ಇದೀಗ ಸರ್ಕಾರ ನಮ್ಮ ಪ್ರಸ್ತಾವನೆಗೆ ಅಂತಿಮ ಮುದ್ರೆ ಹಾಕಿ ಮರುನಾಮಕರಣ ಮಾಡುವ ವಿಶ್ವಾಸವಿದೆ ಎಂದು ಅಲಿಗಢ ಮುನ್ಸಿಪಲ್ ಕೌನ್ಸಿಲ್ ಮೇಯರ್ ಪ್ರಶಾಂತ್ ಸಿಂಘಾಲ್ ಹೇಳಿದ್ದಾರೆ.
ಮೊಘಲರು, ಸುಲ್ತಾನರು, ಬ್ರಿಟಿಷರ ಕಾಲದಲ್ಲಿ ಭಾರತದ ಹಲವು ನಗರ, ಪಟ್ಟಣ, ಗ್ರಾಮ, ಜಿಲ್ಲೆಗಳ ಹೆಸರನ್ನು ಮರುನಾಮಕ ರಣಗೊಳಿಸಲಾಗಿತ್ತು. ಹಿಂದೂ ದೇವಾಲಯಗಳ ಹೆಸರಿನಲ್ಲಿದ್ದ ಹಲವು ನಗರ, ಪಟ್ಟಣಗಳನ್ನು ಹೆಸರುಗಳನ್ನು ಬದಲಿಸಿ ಹೊಸ ಹೆಸರು ಇಡಲಾಗಿತ್ತು. ಹೀಗೆ 1740ರಲ್ಲಿ ಮೊಘಲ್ ಕಮಾಂಡರ್ ಮಿರ್ಜಾ ನಜಾಫ್ ಆಲಿಘಡ ಎಂಬ ಹೆಸರು ಇಟ್ಟಿದ್ದರು. ಆದರೆ ಹಿಂದೂ ಪುರಾಣಗಲ್ಲಿ ಹರಿಘಡ ಅನ್ನೋ ಹೆಸರು ಉಲ್ಲೇಖವಾಗಿದೆ.
2021ರಲಲ್ಲಿ ಅಲಿಘಡ ಜಿಲ್ಲಾ ಪಂಚಾಯಿತ್ ಮರುನಾಕರಣ ನಿರ್ಣಯ ಪಾಸ್ ಮಾಡಿತ್ತು. 1970ರಿಂದಲೇ ಅಲಿಘಡ ಹೆಸರನ್ನು ಹಿಂದೂ ಪುರಾಣದಲ್ಲಿರುವಂತೆ ಹರಿಘಡ ಎಂದು ಮರುನಾಮಕರಣ ಮಾಡಲು ಹೋರಾಟಗಳು ನಡೆದಿತ್ತು. ಇದೀಗ ಪ್ರಸ್ತಾವನೆ ಅಂಗೀಕಾರಗೊಂಡು ಸರ್ಕಾರದ ಮಟ್ಟಕ್ಕೆ ಹೋಗಿದೆ.
ಉತ್ತರ ಪ್ರದೇಶದಲ್ಲಿ ಈಗಾಗಲೇ ಅಲಹಾಬಾದ್ ಹೆಸರನ್ನು ಪ್ರಯಾಗರಾಜ್ ಎಂದು ಮರುನಾಮಕರಣ ಮಾಡಲಾಗಿದೆ. ಇನ್ನು ಮುಘಲ್ ಸರಾಯಿ ಪಟ್ಟಣವನ್ನು ಪಂಡಿತ್ ದೀನದಯಾಳ್ ಉಪಾಧ್ಯಾಯ ನಗರ ಎಂದು ಮರುನಾಮಕರಣ ಮಾಡಲಾಗಿದೆ.
