ಮಧ್ಯಾಹ್ನ ಊಟಕ್ಕೆ ಅನ್ನ, ರೊಟ್ಟಿ ಅಥವಾ ಚಪಾತಿಯ ಜೊತೆಗೆ ಚೆನ್ನಾಗಿ ಹೊಂದುತ್ತದೆ ಈ ಎಗ್ ಡ್ರಾಪ್ ಕರಿ. ಬೇಯಿಸಿದ ಮೊಟ್ಟೆ ಬೇಡ, ನೇರವಾಗಿ ಕರಿಯೊಳಗೆ ಮೊಟ್ಟೆ ಒಡೆದು ಹಾಕುವುದರಿಂದ ಇದು ತುಂಬಾ ಸಾಫ್ಟ್ ಮತ್ತು ರುಚಿಯಾಗಿರುತ್ತದೆ.
ಬೇಕಾಗುವ ಪದಾರ್ಥಗಳು
ಮೊಟ್ಟೆ – 4
ಈರುಳ್ಳಿ – 2
ಟೊಮೇಟೊ – 2
ಹಸಿಮೆಣಸಿನಕಾಯಿ – 2
ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – 1 ಟೀ ಸ್ಪೂನ್
ಎಣ್ಣೆ – 2 ಟೇಬಲ್ ಸ್ಪೂನ್
ಅರಿಶಿನ – ¼ ಟೀ ಸ್ಪೂನ್
ಖಾರದ ಪುಡಿ – 1 ಟೀ ಸ್ಪೂನ್
ಧನಿಯಾ ಪುಡಿ – 1 ಟೀ ಸ್ಪೂನ್
ಗರಂ ಮಸಾಲಾ – ½ ಟೀ ಸ್ಪೂನ್
ಉಪ್ಪು – ರುಚಿಗೆ ತಕ್ಕಷ್ಟು
ನೀರು – 1 ರಿಂದ 1½ ಕಪ್
ಕೊತ್ತಂಬರಿ ಸೊಪ್ಪು – ಅಲಂಕಾರಕ್ಕೆ
ಮಾಡುವ ವಿಧಾನ
ಮೊದಲು ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ. ಅದಕ್ಕೆ ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿ ಹಾಕಿ ಬಂಗಾರದ ಬಣ್ಣ ಬರುವವರೆಗೆ ಹುರಿಯಿರಿ. ನಂತರ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಹೋಗುವವರೆಗೆ ಬೇಯಿಸಿ.
ಇದಕ್ಕೆ ಟೊಮೇಟೊ ಹಾಕಿ ಚೆನ್ನಾಗಿ ಮೃದುವಾಗುವವರೆಗೆ ಬೇಯಿಸಿ. ನಂತರ ಅರಿಶಿನ, ಖಾರದ ಪುಡಿ, ಧನಿಯಾ ಪುಡಿ, ಗರಂ ಮಸಾಲಾ ಮತ್ತು ಉಪ್ಪು ಸೇರಿಸಿ 2 ನಿಮಿಷ ಹುರಿಯಿರಿ.
ಈಗ ನೀರು ಹಾಕಿ ಕುದಿಯಲು ಬಿಡಿ. ಗ್ರೇವಿ ಚೆನ್ನಾಗಿ ಕುದಿಯುತ್ತಿದ್ದಂತೆ ಗ್ಯಾಸ್ ಅನ್ನು ಕಡಿಮೆ ಮಾಡಿ, ಒಂದೊಂದಾಗಿ ಮೊಟ್ಟೆಗಳನ್ನು ನೇರವಾಗಿ ಕರಿಯೊಳಗೆ ಒಡೆದು ಹಾಕಿ. ಕಲಕಬೇಡಿ. ಮುಚ್ಚಳ ಹಾಕಿ 5–6 ನಿಮಿಷ ಬೇಯಿಸಿ.
ಮೊಟ್ಟೆ ಚೆನ್ನಾಗಿ ಸೆಟ್ ಆದ ಮೇಲೆ ಮೇಲೆ ಕೊತ್ತಂಬರಿ ಸೊಪ್ಪು ಹಾಕಿ ಸ್ಟವ್ ಆಫ್ ಮಾಡಿ.
