ಹೊಸದಿಗಂತ ಕಲಬುರಗಿ:
ಅಕ್ಷರದ ನಾಡು ಕಲಬುರಗಿಯ ಹೆಮ್ಮೆಯ ಪುತ್ರಿ ಸೃಷ್ಟಿ ಮಲ್ಲಿನಾಥ 2025–26ನೇ ಸಾಲಿನ ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ ಅಭೂತಪೂರ್ವ ಸಾಧನೆ ಮಾಡಿದ್ದಾರೆ. ನಗರದ ವಿಜಿ ಮಹಿಳಾ ಪಿಯು ಕಾಲೇಜಿನ ವಿದ್ಯಾರ್ಥಿನಿಯಾದ ಇವರು, ಕಲಾ ವಿಭಾಗದಲ್ಲಿ 600 ಅಂಕಗಳಿಗೆ 598 ಅಂಕಗಳನ್ನು ಪಡೆಯುವ ಮೂಲಕ ಇಡೀ ರಾಜ್ಯಕ್ಕೆ ಪ್ರಥಮ ಸ್ಥಾನ ಅಲಂಕರಿಸಿದ್ದಾರೆ.
ಸೃಷ್ಟಿ ಅವರ ಅಂಕಪಟ್ಟಿ ನೋಡುಗರ ಕಣ್ಣು ಕುಕ್ಕುವಂತಿದೆ. ಬಹುತೇಕ ಎಲ್ಲಾ ವಿಷಯಗಳಲ್ಲೂ ನೂರಕ್ಕೆ ನೂರು ಅಂಕಗಳನ್ನು ಬಾಚಿಕೊಂಡಿರುವ ಇವರ ಸಾಧನೆ ಹೀಗಿದೆ:
ಕನ್ನಡ: 100/100
ಅರ್ಥಶಾಸ್ತ್ರ: 100/100
ಸಮಾಜಶಾಸ್ತ್ರ: 100/100
ರಾಜಕೀಯ ವಿಜ್ಞಾನ: 100/100
ಇಂಗ್ಲಿಷ್: 99/100
ಇತಿಹಾಸ: 99/100
ಈ ಅಮೋಘ ಸಾಧನೆಯ ಕುರಿತು ಕಾಲೇಜಿನ ಮುಖ್ಯಸ್ಥರಾದ ಡಾ. ಮೋಹನ್ ರಾಜ್ ಪತ್ತಾರ ಅವರು ಹರ್ಷ ವ್ಯಕ್ತಪಡಿಸಿದ್ದಾರೆ. “ಕಳೆದ ಎರಡು ವರ್ಷಗಳಿಂದ ರಾಜ್ಯ ಮಟ್ಟದಲ್ಲಿ ಮೊದಲ ಸ್ಥಾನ ಪಡೆಯಬೇಕೆಂಬ ಗುರಿ ಹೊಂದಿದ್ದೆವು. ಇಂದು ಸೃಷ್ಟಿ ಆ ಕನಸನ್ನು ನನಸು ಮಾಡಿದ್ದಾರೆ. ಆಕೆಯ ಕಠಿಣ ಪರಿಶ್ರಮ, ಪಾಲಕರ ಪ್ರೋತ್ಸಾಹ ಹಾಗೂ ನಮ್ಮ ಸಂಸ್ಥೆಯ ಶಿಕ್ಷಕರ ಮಾರ್ಗದರ್ಶನ ಈ ಯಶಸ್ಸಿಗೆ ಭದ್ರ ಬುನಾದಿ,” ಎಂದು ಅವರು ಹೆಮ್ಮೆಯಿಂದ ನುಡಿದರು.
ಕೇವಲ ಅದೃಷ್ಟದಿಂದ ಈ ಸಾಧನೆ ಬಂದಿದ್ದಲ್ಲ, ಬದಲಿಗೆ ನಿರಂತರ ಅಭ್ಯಾಸ ಮತ್ತು ಕಠಿಣ ಪರಿಶ್ರಮದಿಂದ ಮಾತ್ರ ಇದು ಸಾಧ್ಯ ಎಂಬುದು ಸೃಷ್ಟಿಯ ಯಶಸ್ಸಿನ ಮಂತ್ರವಾಗಿದೆ. ಕಲಾ ವಿಭಾಗವೆಂದರೆ ಕೇವಲ ಸಿದ್ಧಾಂತಗಳಲ್ಲ, ಅಲ್ಲಿಯೂ ಪರಿಪೂರ್ಣ ಅಂಕಗಳನ್ನು ಪಡೆಯಬಹುದು ಎಂಬುದನ್ನು ಸೃಷ್ಟಿ ಸಾಬೀತುಪಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಕಾಲೇಜು ಆಡಳಿತ ಮಂಡಳಿ ಹಾಗೂ ಜಿಲ್ಲೆಯ ಗಣ್ಯರು ಸೃಷ್ಟಿಯ ಸಾಧನೆಯನ್ನು ಕೊಂಡಾಡಿದ್ದಾರೆ.
