ಹೊಸದಿಗಂತ ಕಲಬುರಗಿ:
ಪ್ರಸಕ್ತ ಸಾಲಿನ ಎಸ್ಎಸ್ಎಲ್ಸಿ ಪರೀಕ್ಷೆಯ ಫಲಿತಾಂಶ ಗುರುವಾರ ಪ್ರಕಟವಾಗಿದ್ದು, ಕಲಬುರಗಿ ಜಿಲ್ಲೆಯು ಶೇಕಡಾವಾರು ಅಂಕಗಳಲ್ಲಿ ಗಮನಾರ್ಹ ಸುಧಾರಣೆ ಕಂಡಿದ್ದರೂ ಸಹ, ರಾಜ್ಯಮಟ್ಟದ ಶ್ರೇಣಿಯಲ್ಲಿ ಮತ್ತೆ ಕೊನೆಯ ಸ್ಥಾನಕ್ಕೆ ಕುಸಿದಿದೆ.
ಕಳೆದ 2024-25ನೇ ಸಾಲಿನಲ್ಲಿ ಕಲಬುರಗಿ ಜಿಲ್ಲೆಯು 56.89% ಫಲಿತಾಂಶದೊಂದಿಗೆ ರಾಜ್ಯದಲ್ಲೇ ಕೊನೆಯ ಸ್ಥಾನದಲ್ಲಿತ್ತು. ಆದರೆ, 2025-26ನೇ ಸಾಲಿನಲ್ಲಿ ಜಿಲ್ಲೆಯು 85.06% ಫಲಿತಾಂಶ ದಾಖಲಿಸುವ ಮೂಲಕ 28.17% ರಷ್ಟು ಭರ್ಜರಿ ಪ್ರಗತಿ ಸಾಧಿಸಿದೆ. ಇಷ್ಟೊಂದು ದೊಡ್ಡ ಮಟ್ಟದ ಶೇಕಡಾವಾರು ಏರಿಕೆ ಕಂಡರೂ ಸಹ, ಜಿಲ್ಲಾವಾರು ಪಟ್ಟಿಯಲ್ಲಿ ಕಲಬುರಗಿ 35ನೇ ಸ್ಥಾನಕ್ಕೆ (ಕೊನೆಯ ಸ್ಥಾನ) ತೃಪ್ತಿಪಡಬೇಕಾಗಿದೆ.
ಕಲ್ಯಾಣ ಕರ್ನಾಟಕ ಪ್ರದೇಶಾಭಿವೃದ್ಧಿ ಮಂಡಳಿಯು ಈ ಭಾಗದ ಶಿಕ್ಷಣದ ಅಭಿವೃದ್ಧಿಗಾಗಿ ‘ಅಕ್ಷರ ಆವಿಷ್ಕಾರ’ ಎಂಬ ವಿಶೇಷ ಯೋಜನೆಯನ್ನು ಜಾರಿಗೆ ತಂದಿದೆ. ಮಂಡಳಿಯ ಒಟ್ಟು ಅನುದಾನದ 25 ಪ್ರತಿಶತದಷ್ಟು ಹಣವನ್ನು ಶಿಕ್ಷಣಕ್ಕಾಗಿ ಮೀಸಲಿಡಲಾಗುತ್ತಿದೆ. ಆದರೂ ಕಲಬುರಗಿ ಜಿಲ್ಲೆಯು ಟಾಪ್ 10ರ ಪಟ್ಟಿಯಲ್ಲಿ ಸ್ಥಾನ ಪಡೆಯಲು ವಿಫಲವಾಗಿರುವುದು ಸಾರ್ವಜನಿಕರಲ್ಲಿ ಅಸಮಾಧಾನ ಮೂಡಿಸಿದೆ. ಇದು ಕೇವಲ ಅಧಿಕಾರಿಗಳ ವೈಫಲ್ಯವೋ ಅಥವಾ ರಾಜಕೀಯ ಇಚ್ಛಾಶಕ್ತಿಯ ಕೊರತೆಯೋ ಎಂಬ ಚರ್ಚೆಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ.
ಜಿಲ್ಲೆಯ ಒಟ್ಟಾರೆ ಸ್ಥಾನ ಕೆಳಗಿದ್ದರೂ, ವೈಯಕ್ತಿಕ ಸಾಧನೆಯಲ್ಲಿ ವಿದ್ಯಾರ್ಥಿಗಳು ಅಮೋಘ ಸಾಧನೆ ಮಾಡಿದ್ದಾರೆ:
ಪ್ರಥಮ ಸ್ಥಾನ: ಅಜೀಂ ಪ್ರೇಮ್ಜಿ ಶಾಲೆಯ ಗಣೇಶ್ (623 ಅಂಕ) ಜಿಲ್ಲೆಗೆ ಮೊದಲ ಸ್ಥಾನ ಪಡೆದಿದ್ದಾರೆ.
ದ್ವಿತೀಯ ಸ್ಥಾನ: ಶರಣಬಸವೇಶ್ವರ ವಸತಿ ಶಾಲೆಯ ಮಾಧವಿ ಮತ್ತು ಮೇಘನಾ (ತಲಾ 622 ಅಂಕ) ಹಂಚಿಕೊಂಡಿದ್ದಾರೆ.
ತೃತೀಯ ಸ್ಥಾನ: ನಗರದ ಜಗತ್ ಪ್ರತಿಭಾನ್ವಿತ ಶಾಲೆಯ ಭಾಗ್ಯಶ್ರೀ, ಮೆಹತಾ ಶಾಲೆಯ ಓಂಕಾರ್ ಹಾಸು ಮತ್ತು ಜೇವರ್ಗಿಯ ಆದರ್ಶ್ ವಿದ್ಯಾಲಯದ ನಿಸರ್ಗ (ತಲಾ 620 ಅಂಕ) ಜಿಲ್ಲೆಗೆ ಮೂರನೇ ಸ್ಥಾನ ತಂದುಕೊಟ್ಟಿದ್ದಾರೆ.
| ಜಿಲ್ಲೆ | ಶೇಕಡಾವಾರು (%) | ರಾಜ್ಯ ಮಟ್ಟದ ಸ್ಥಾನ |
| ವಿಜಯನಗರ | 96.39 | 10ನೇ ಸ್ಥಾನ |
| ರಾಯಚೂರು | 94.41 | 21ನೇ ಸ್ಥಾನ |
| ಬಳ್ಳಾರಿ | 93.35 | 24ನೇ ಸ್ಥಾನ |
| ಕೊಪ್ಪಳ | 93.10 | 25ನೇ ಸ್ಥಾನ |
| ಬೀದರ್ | 92.17 | 28ನೇ ಸ್ಥಾನ |
| ಯಾದಗಿರಿ | 91.89 | 31ನೇ ಸ್ಥಾನ |
| ಕಲಬುರಗಿ | 85.06 | 35ನೇ ಸ್ಥಾನ |
ಜಿಲ್ಲೆಯ ಅಧಿಕಾರಿಗಳು, ಶಿಕ್ಷಕರು ಮತ್ತು ವಿದ್ಯಾರ್ಥಿಗಳ ಸಂಘಟಿತ ಪ್ರಯತ್ನದಿಂದ ಫಲಿತಾಂಶದ ಪ್ರಮಾಣ ಹೆಚ್ಚಿದ್ದರೂ, ರಾಜ್ಯದ ಇತರೆ ಜಿಲ್ಲೆಗಳ ಪೈಪೋಟಿಯಲ್ಲಿ ಕಲಬುರಗಿ ಹಿಂದೆ ಬಿದ್ದಿರುವುದು ಚಿಂತನಾರ್ಹವಾಗಿದೆ.
