ಚಳಿಗಾಲವಾಗಲಿ, ಮಳೆಗಾಲವಾಗಲಿ ಅಥವಾ ಲೈಟ್ ಆಗಿ ರಾತ್ರಿಯ ಊಟ ಬೇಕೆಂದಾಗ ಕ್ಯಾಪ್ಸಿಕಂ ಸೂಪ್ ಉತ್ತಮ ಆಯ್ಕೆ. ವಿಟಮಿನ್ C ಸಮೃದ್ಧವಾಗಿರುವ ಈ ಸೂಪ್ ಆರೋಗ್ಯಕರವಾಗಿದ್ದು, ಕಡಿಮೆ ಸಮಯದಲ್ಲೇ ತಯಾರಿಸಬಹುದು.
ಬೇಕಾಗುವ ಪದಾರ್ಥಗಳು
ಕ್ಯಾಪ್ಸಿಕಂ – 2
ಈರುಳ್ಳಿ – 1
ಬೆಳ್ಳುಳ್ಳಿ – 4-5 ಎಸಳು
ಟೊಮೆಟೊ – 1
ಬೆಣ್ಣೆ ಅಥವಾ ಎಣ್ಣೆ – 1 ಚಮಚ
ತರಕಾರಿ ಸಾರು ಅಥವಾ ನೀರು – 3 ಕಪ್
ಉಪ್ಪು – ರುಚಿಗೆ ತಕ್ಕಷ್ಟು
ಕಾಳುಮೆಣಸಿನ ಪುಡಿ – ಅರ್ಧ ಚಮಚ
ಕಾರ್ನ್ಫ್ಲೋರ್ – 1 ಚಮಚ
ನಿಂಬೆರಸ – 1 ಚಮಚ
ಮಾಡುವ ವಿಧಾನ
ಬಾಣಲೆಯಲ್ಲಿ ಬೆಣ್ಣೆ ಅಥವಾ ಎಣ್ಣೆ ಬಿಸಿ ಮಾಡಿ. ಅದಕ್ಕೆ ಬೆಳ್ಳುಳ್ಳಿ ಮತ್ತು ಈರುಳ್ಳಿ ಹಾಕಿ ಸ್ವಲ್ಪ ಬಾಡಿಸಿ. ಈಗ ಕತ್ತರಿಸಿದ ಕ್ಯಾಪ್ಸಿಕಂ ಹಾಗೂ ಟೊಮೆಟೊ ಹಾಕಿ 5-7 ನಿಮಿಷ ಮೃದುವಾಗುವವರೆಗೆ ಹುರಿಯಿರಿ.
ಹುರಿದ ಮಿಶ್ರಣವನ್ನು ತಣ್ಣಗಾದ ಬಳಿಕ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ. ರುಬ್ಬಿದ ಮಿಶ್ರಣವನ್ನು ಬಾಣಲೆಗೆ ಹಾಕಿ, ನೀರು ಅಥವಾ ತರಕಾರಿ ಸಾರು ಸೇರಿಸಿ. ಉಪ್ಪು ಮತ್ತು ಕಾಳುಮೆಣಸಿನ ಪುಡಿ ಹಾಕಿ 5 ನಿಮಿಷ ಕುದಿಸಿ.
ಬೇಕಾದರೆ ಕಾರ್ನ್ಫ್ಲೋರ್ ಸೇರಿಸಿ ಗಟ್ಟಿಯಾಗಿಸಿ. ಕೊನೆಯಲ್ಲಿ ನಿಂಬೆರಸ ಸೇರಿಸಿ ಬಿಸಿಬಿಸಿಯಾಗಿ ಬಡಿಸಿ.
