ಇಂದಿನ ಡಿಜಿಟಲ್ ಯುಗದಲ್ಲಿ ಸ್ಮಾರ್ಟ್ಫೋನ್ ನಮ್ಮ ಜೀವನದ ಒಂದು ಪ್ರಮುಖ ಭಾಗವಾಗಿದೆ. ಬೆಳಗ್ಗೆ ಎದ್ದಾಗಿನಿಂದ ರಾತ್ರಿ ಮಲಗುವವರೆಗೂ ಮೊಬೈಲ್ ಇಲ್ಲದೆ ಬದುಕಲು ಸಾಧ್ಯವಿಲ್ಲ ಎನ್ನುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಆದರೆ, ರಾತ್ರಿ ಮಲಗುವಾಗ ಮೊಬೈಲ್ ಅನ್ನು ತಲೆಯ ಪಕ್ಕದಲ್ಲಿ ಅಥವಾ ಹಾಸಿಗೆಯ ಮೇಲೆ ಇಟ್ಟುಕೊಂಡು ಮಲಗುವುದು ಅತ್ಯಂತ ಅಪಾಯಕಾರಿ ಎಂದು ಆರೋಗ್ಯ ತಜ್ಞರು ಎಚ್ಚರಿಸುತ್ತಿದ್ದಾರೆ.
ನಿದ್ರಾಹೀನತೆ ಸಮಸ್ಯೆ
ಮೊಬೈಲ್ ಸ್ಕ್ರೀನ್ನಿಂದ ಹೊರಬರುವ ನೀಲಿ ಬೆಳಕು ನಮ್ಮ ದೇಹದಲ್ಲಿ ನೈಸರ್ಗಿಕವಾಗಿ ಉತ್ಪತ್ತಿಯಾಗುವ ‘ಮೆಲಟೋನಿನ್’ ಎಂಬ ನಿದ್ರೆಯ ಹಾರ್ಮೋನ್ ಅನ್ನು ತಡೆಯುತ್ತದೆ. ಇದರಿಂದಾಗಿ ನಿಮಗೆ ಸಕಾಲದಲ್ಲಿ ನಿದ್ದೆ ಬರುವುದಿಲ್ಲ ಮತ್ತು ನಿದ್ರಾಹೀನತೆಯ ಸಮಸ್ಯೆ ಎದುರಾಗುತ್ತದೆ.
ಮೊಬೈಲ್ ರೇಡಿಯೇಶನ್ ಅಪಾಯ
ಸ್ಮಾರ್ಟ್ಫೋನ್ಗಳು ನಿರಂತರವಾಗಿ ನೆಟ್ವರ್ಕ್ ಸಿಗ್ನಲ್ಗಳನ್ನು ಸ್ವೀಕರಿಸಲು ವಿದ್ಯುತ್ಕಾಂತೀಯ ವಿಕಿರಣಗಳನ್ನು ಹೊರಸೂಸುತ್ತವೆ. ರಾತ್ರಿಯಿಡೀ ಫೋನ್ ತಲೆಯ ಹತ್ತಿರವೇ ಇರುವುದರಿಂದ ಈ ರೇಡಿಯೇಶನ್ ಮೆದುಳಿನ ಜೀವಕೋಶಗಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು. ಇದು ದೀರ್ಘಕಾಲದಲ್ಲಿ ತಲೆನೋವು, ಆಯಾಸ ಮತ್ತು ತಲೆಸುತ್ತಿಗೆ ಕಾರಣವಾಗಬಹುದು.
ಮೆದುಳಿನ ಕಾರ್ಯಕ್ಷಮತೆ ಕುಂಠಿತ
ಬೆಡ್ ಪಕ್ಕದಲ್ಲೇ ಫೋನ್ ಇದ್ದಾಗ, ಬರುವ ಪ್ರತಿಯೊಂದು ನೋಟಿಫಿಕೇಶನ್ ಅಥವಾ ಮೆಸೇಜ್ ಸೌಂಡ್ ನಿಮ್ಮ ಗಾಢ ನಿದ್ರೆಗೆ ಭಂಗ ತರುತ್ತದೆ. ಅಪೂರ್ಣ ನಿದ್ದೆಯಿಂದಾಗಿ ಮರುದಿನ ಬೆಳಗ್ಗೆ ಏಕಾಗ್ರತೆಯ ಕೊರತೆ, ಮರೆವು ಮತ್ತು ಮಾನಸಿಕ ಒತ್ತಡ ಹೆಚ್ಚಾಗುತ್ತದೆ.
ಕ್ಯಾನ್ಸರ್ ಮತ್ತು ಇತರ ಗಂಭೀರ ಕಾಯಿಲೆಗಳ ಭೀತಿ
ವಿಶ್ವ ಆರೋಗ್ಯ ಸಂಸ್ಥೆ ಸೇರಿದಂತೆ ಹಲವು ಸಂಶೋಧನೆಗಳ ಪ್ರಕಾರ, ಮೊಬೈಲ್ನಿಂದ ಬರುವ ಅತಿಯಾದ ರೇಡಿಯೇಶನ್ ದೀರ್ಘಾವಧಿಯಲ್ಲಿ ಕ್ಯಾನ್ಸರ್ ಅಥವಾ ಗಡ್ಡೆಗಳ ಅಪಾಯವನ್ನು ಹೆಚ್ಚಿಸುವ ಸಾಧ್ಯತೆ ಇರುತ್ತದೆ ಎಂದು ಹೇಳಲಾಗಿದೆ.
ಮುಂಜಾಗ್ರತಾ ಕ್ರಮಗಳು:
ರಾತ್ರಿ ಮಲಗುವ ಕನಿಷ್ಠ 30 ನಿಮಿಷಗಳ ಮುಂಚಿತವಾಗಿ ಮೊಬೈಲ್ ಬಳಸುವುದನ್ನು ನಿಲ್ಲಿಸಿ.
ನಿಮ್ಮ ಫೋನ್ ಅನ್ನು ಕನಿಷ್ಠ 3 ರಿಂದ 4 ಅಡಿ ದೂರದಲ್ಲಿ ಇಟ್ಟು ಮಲಗಿ.
ಸಾಧ್ಯವಾದರೆ ರಾತ್ರಿ ನಿದ್ದೆ ಮಾಡುವಾಗ ಫೋನ್ ಅನ್ನು ‘ಫ್ಲೈಟ್ ಮೋಡ್’ ನಲ್ಲಿಡಿ ಅಥವಾ ಆಫ್ ಮಾಡಿ.
