ಹಗಲಿಡೀ ಧೂಳು, ಬಿಸಿಲು, ಮಾಲಿನ್ಯ ಮತ್ತು ಒತ್ತಡಕ್ಕೆ ಒಳಗಾಗುವ ನಮ್ಮ ಚರ್ಮವು ರಾತ್ರಿ ನಾವು ಮಲಗಿದಾಗ ಸ್ವಯಂ ಸರಿಪಡಿಸಿಕೊಳ್ಳುವ ಪ್ರಕ್ರಿಯೆಯಲ್ಲಿ ತೊಡಗುತ್ತದೆ. ಹಗಲಿನಲ್ಲಿ ಬಳಸುವ ಕ್ರೀಮ್ಗಳು ಚರ್ಮವನ್ನು ರಕ್ಷಿಸಿದರೆ, ರಾತ್ರಿ ಮಾಡುವ ಆರೈಕೆಯು ಚರ್ಮಕ್ಕೆ ಪೋಷಣೆ ನೀಡಿ ಪುನಶ್ಚೇತನಗೊಳಿಸುತ್ತದೆ. ಆದ್ದರಿಂದ, ಬೆಳಗಿನ ವೇಳೆಗೆ ಮುಖದಲ್ಲಿ ನೈಸರ್ಗಿಕ ಹೊಳಪು ಬರಲು ರಾತ್ರಿ ಮಲಗುವ ಮುನ್ನ ಸರಳವಾದ ‘ನೈಟ್ ಸ್ಕಿನ್ ಕೇರ್ ರೂಟೀನ್’ ಮಾಡುವುದು ಅತ್ಯಗತ್ಯ.
ಪ್ರತಿಯೊಬ್ಬರು ಅನುಸರಿಸಬೇಕಾದ ಪ್ರಮುಖ ‘ನೈಟ್ ಸ್ಕಿನ್ ಕೇರ್ ರೂಟೀನ್:
ಡಬಲ್ ಕ್ಲೆನ್ಸಿಂಗ್:
ಮುಖದ ಮೇಲಿರುವ ಸನ್ಸ್ಕ್ರೀನ್, ಒರಟು ಮೇಕಪ್ ಮತ್ತು ಕಣ್ಣಿಗೆ ಕಾಣಿಸದ ಮಾಲಿನ್ಯದ ಕಣಗಳನ್ನು ಕೇವಲ ನೀರಿನಿಂದ ತೊಳೆದರೆ ಹೋಗುವುದಿಲ್ಲ. ಅದಕ್ಕಾಗಿ ಮೊದಲು ಮೈಸಿಲಾರ್ ವಾಟರ್ (Micellar Water) ಅಥವಾ ಶುದ್ಧ ತೆಂಗಿನ ಎಣ್ಣೆಯನ್ನು ಹತ್ತಿಯಲ್ಲಿ ಅದ್ದಿ ಮುಖವನ್ನು ಮೃದುವಾಗಿ ಒರೆಸಿಕೊಳ್ಳಬೇಕು. ಆನಂತರ, ಚರ್ಮದ ಪ್ರಕಾರಕ್ಕೆ ಸೂಕ್ತವಾದ ಫೇಸ್ ವಾಶ್ ಬಳಸಿ ಉಗುರುಬೆಚ್ಚಗಿನ ನೀರಿನಿಂದ ಮುಖ ತೊಳೆಯಬೇಕು.
ಟೋನಿಂಗ್:
ಮುಖ ತೊಳೆದ ತಕ್ಷಣ ಚರ್ಮದ ರಂಧ್ರಗಳು ತೆರೆದುಕೊಳ್ಳುತ್ತವೆ. ಈ ಸಮಯದಲ್ಲಿ ಚರ್ಮದ ನೈಸರ್ಗಿಕ ಪಿಹೆಚ್ ಮಟ್ಟವನ್ನು ಸಮತೋಲನಕ್ಕೆ ತರಲು ಟೋನರ್ ಅಗತ್ಯ. ಯಾವುದೇ ಆಲ್ಕೋಹಾಲ್ ಇಲ್ಲದ ಸಾಫ್ಟ್ ಟೋನರ್ ಅಥವಾ ನೈಸರ್ಗಿಕ ರೋಸ್ ವಾಟರ್ ಅನ್ನು ಮುಖಕ್ಕೆ ಸ್ಪ್ರೇ ಮಾಡಿ ಅಥವಾ ಹತ್ತಿಯ ಸಹಾಯದಿಂದ ಡ್ಯಾಬ್ ಮಾಡಿ ಹಚ್ಚಿ. ಇದು ಚರ್ಮವನ್ನು ಒಳಗಿನಿಂದ ತೇವಾಂಶಭರಿತವಾಗಿಡುತ್ತದೆ.
ಸೀರಮ್ ಅಪ್ಲಿಕೇಶನ್ :
ಚರ್ಮದಲ್ಲಿ ಬಂಗು, ಮೊಡವೆಗಳು, ಕಪ್ಪು ಕಲೆಗಳು ಅಥವಾ ವಯಸ್ಸಾದ ಲಕ್ಷಣಗಳಿದ್ದರೆ, ಅದಕ್ಕೆ ಸೂಕ್ತವಾದ ಸೀರಮ್ ಹಚ್ಚಲು ರಾತ್ರಿ ಅತ್ಯುತ್ತಮ ಸಮಯವಾಗಿದೆ. ಒಣ ಚರ್ಮವಿದ್ದರೆ ಹೈಲುರಾನಿಕ್ ಆಸಿಡ್ ಅಥವಾ ಹೊಳಪಿಗಾಗಿ ವಿಟಮಿನ್ ಸಿ ಸೀರಮ್ ಬಳಸಬಹುದು. ಮೊಡವೆ ಹಾಗೂ ಸುಕ್ಕುಗಳ ನಿವಾರಣೆಗೆ ವೈದ್ಯರ ಸಲಹೆಯ ಮೇರೆಗೆ ರೆಟಿನಾಲ್ ಅಥವಾ ನಿಯಾಸಿನಮೈಡ್ ಬಳಸಬಹುದು.
ಮಾಯಿಶ್ಚರೈಸರ್ ಅಥವಾ ನೈಟ್ ಕ್ರೀಮ್:
ಇದು ಸ್ಕಿನ್ ಕೇರ್ನ ಕೊನೆಯ ಮತ್ತು ಅತ್ಯಂತ ಪ್ರಮುಖ ಹಂತ. ನಾವು ಹಚ್ಚಿದ ಸೀರಮ್ ಚರ್ಮದ ಒಳಗೆ ಉಳಿಯಲು ಮತ್ತು ರಾತ್ರಿಯಿಡೀ ಚರ್ಮವು ಒಣಗದಂತೆ ತಡೆಯಲು ಮಾಯಿಶ್ಚರೈಸರ್ ಕವಚದಂತೆ ಕೆಲಸ ಮಾಡುತ್ತದೆ. ಚರ್ಮಕ್ಕೆ ತಕ್ಕನಾದ ಗಟ್ಟಿ ಮಾಯಿಶ್ಚರೈಸರ್ ಅಥವಾ ನೈಟ್ ಕ್ರೀಮ್ ಹಚ್ಚಿ ವೃತ್ತಾಕಾರದಲ್ಲಿ ಲಘುವಾಗಿ ಮಸಾಜ್ ಮಾಡಿ. ಇದು ರಕ್ತಸಂಚಲನವನ್ನು ಹೆಚ್ಚಿಸುತ್ತದೆ.
