ಮೇಕಪ್ ಮಾಡಿಕೊಳ್ಳುವುದು ಒಂದು ಕಲೆ. ಇದು ನಮ್ಮ ಮುಖದ ಸೌಂದರ್ಯವನ್ನು ಮತ್ತಷ್ಟು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಆದರೆ, ಸರಿಯಾದ ಕ್ರಮದಲ್ಲಿ ಮೇಕಪ್ ಮಾಡದಿದ್ದರೆ ಮುಖದ ನೈಸರ್ಗಿಕ ಕಳೆ ಮಾಸಿ, ವಯಸ್ಸಾದವರಂತೆ ಕಾಣುವ ಸಾಧ್ಯತೆ ಇರುತ್ತದೆ. ಅನೇಕರು ಮೇಕಪ್ ಮಾಡುವಾಗ ತಮಗೇ ತಿಳಿಯದಂತೆ ಕೆಲವು ಸಾಮಾನ್ಯ ತಪ್ಪುಗಳನ್ನು ಮಾಡುತ್ತಾರೆ. ಇದರಿಂದ ಮೇಕಪ್ ಬೇಗನೆ ಬಿರುಕು ಬಿಡುವುದು ಅಥವಾ ಮುಖ ಕಪ್ಪಾಗಿ ಕಾಣುವುದು ಸಂಭವಿಸುತ್ತದೆ. ನಿಮ್ಮ ಮೇಕಪ್ ದಿನವಿಡೀ ಫ್ರೆಶ್ ಆಗಿ ಮತ್ತು ನ್ಯಾಚುರಲ್ ಆಗಿ ಕಾಣಲು, ನೀವು ಮಾಡುವ 5 ತಪ್ಪುಗಳು ಯಾವುವು ಮತ್ತು ಅವುಗಳನ್ನು ಸರಿಪಡಿಸುವುದು ಹೇಗೆ ಎಂಬುದನ್ನು ತಿಳಿಯೋಣ.
ತಪ್ಪು ಫೌಂಡೇಶನ್ ಶೇಡ್ ಆಯ್ಕೆ ಮಾಡುವುದು
ಅತಿ ಹೆಚ್ಚು ಜನರು ಮಾಡುವ ತಪ್ಪೆಂದರೆ ತಮ್ಮ ಚರ್ಮದ ನೈಸರ್ಗಿಕ ಬಣ್ಣಕ್ಕಿಂತ ಹೆಚ್ಚು ಬಿಳಿಯಿರುವ ಫೌಂಡೇಶನ್ ಆರಿಸುವುದು. ಇದರಿಂದ ಮೇಕಪ್ ಮಾಡಿದ ಕೆಲವು ಗಂಟೆಗಳ ನಂತರ ಮುಖ ಬೂದು ಬಣ್ಣಕ್ಕೆ ತಿರುಗುತ್ತದೆ. ಹಾಗಾಗಿ ಫೌಂಡೇಶನ್ ಖರೀದಿಸುವಾಗ ಕೈಗಳ ಮೇಲೆ ಟೆಸ್ಟ್ ಮಾಡಬೇಡಿ. ನಿಮ್ಮ ದವಡೆಯ ರೇಖೆಯ ಮೇಲೆ ಹಚ್ಚಿ, ನೈಸರ್ಗಿಕ ಬೆಳಕಿನಲ್ಲಿ ನಿಮ್ಮ ಚರ್ಮಕ್ಕೆ ಮ್ಯಾಚ್ ಆಗುತ್ತದೆಯೇ ಎಂದು ಪರಿಶೀಲಿಸಬೇಕು.
ಪ್ರೈಮರ್ ಬಳಸದೇ ಇರುವುದು
ಫೇಸ್ವಾಶ್ ಮಾಡಿದ ತಕ್ಷಣ ನೇರವಾಗಿ ಫೌಂಡೇಶನ್ ಹಚ್ಚುವುದು ಮತ್ತೊಂದು ದೊಡ್ಡ ತಪ್ಪು. ಪ್ರೈಮರ್ ಬಳಸದಿದ್ದರೆ ಮುಖದ ಮೇಲಿನ ರಂಧ್ರಗಳು ಎದ್ದು ಕಾಣುತ್ತವೆ ಮತ್ತು ಮೇಕಪ್ ದೀರ್ಘಕಾಲ ಉಳಿಯುವುದಿಲ್ಲ. ಹಾಗಾಗಿ ಮೇಕಪ್ ಮಾಡುವ ಮುನ್ನ ಮುಖಕ್ಕೆ ಮಾಯಿಶ್ಚರೈಸರ್ ಹಚ್ಚಿ, ನಂತರ ಕಡ್ಡಾಯವಾಗಿ ನಿಮ್ಮ ಚರ್ಮಕ್ಕೆ ಹೊಂದುವ ಪ್ರೈಮರ್ ಬಳಸಬೇಕು. ಇದು ಮೇಕಪ್ಗೆ ಉತ್ತಮ ಬೇಸ್ ನೀಡುತ್ತದೆ.
ಅತಿಯಾದ ಕನ್ಸೀಲರ್ ಬಳಕೆ
ಕಣ್ಣಿನ ಕೆಳಗಿನ ಕಪ್ಪು ವರ್ತುಲಗಳನ್ನು ಮರೆಮಾಡಲು ಅತಿಯಾಗಿ ಕನ್ಸೀಲರ್ ಹಚ್ಚುವುದರಿಂದ ಕಣ್ಣಿನ ಸುತ್ತಲಿನ ಚರ್ಮ ಸುಕ್ಕಾದಂತೆ ಕಾಣುತ್ತದೆ ಮತ್ತು ಮೇಕಪ್ ಗೆರೆಗಳು ಮೂಡುತ್ತವೆ. ಆದ್ದರಿಂದ ಮೊದಲು ‘ಕಲರ್ ಕರೆಕ್ಟರ್’ ಬಳಸಿ ಕಪ್ಪು ಕಲೆಗಳನ್ನು ಮರೆಮಾಡಿ. ನಂತರ ಕನ್ಸೀಲರ್ ಅನ್ನು ಕೇವಲ ಮೂರನಾಲ್ಕು ಚುಕ್ಕೆಗಳಷ್ಟು ಮಾತ್ರ ಹಚ್ಚಿ, ಹಗುರವಾಗಿ ಬ್ಲೆಂಡ್ ಮಾಡಬೇಕು.
ಸರಿಯಾಗಿ ಬ್ಲೆಂಡ್ ಮಾಡದಿರುವುದು
ಫೌಂಡೇಶನ್ ಅಥವಾ ಬ್ಲಶ್ ಹಚ್ಚಿದ ನಂತರ ಅದನ್ನು ಚರ್ಮಕ್ಕೆ ಸರಿಯಾಗಿ ಒಪ್ಪುವಂತೆ ಬ್ಲೆಂಡ್ ಮಾಡದಿದ್ದರೆ ಮುಖದ ಮೇಲೆ ಮೇಕಪ್ ಪ್ರತ್ಯೇಕ ಪದರದಂತೆ ಕಾಣಿಸುತ್ತದೆ. ಕುತ್ತಿಗೆಯ ಭಾಗವನ್ನು ನಿರ್ಲಕ್ಷಿಸುವುದರಿಂದ ಮುಖ ಒಂದು ಬಣ್ಣ, ಕುತ್ತಿಗೆ ಮತ್ತೊಂದು ಬಣ್ಣವಾಗಿ ಕಾಣುತ್ತದೆ.
ಹಾಗಾಗಿ, ಮೇಕಪ್ ಬ್ರಷ್ ಅಥವಾ ಒದ್ದೆಯಾದ ಬ್ಯೂಟಿ ಬ್ಲೆಂಡರ್ ಬಳಸಿ ಡ್ಯಾಬ್ ಮಾಡುತ್ತಾ ಚೆನ್ನಾಗಿ ಬ್ಲೆಂಡ್ ಮಾಡಿ. ಮುಖಕ್ಕೆ ಹಚ್ಚುವ ಎಲ್ಲಾ ಪ್ರಾಡಕ್ಟ್ಗಳನ್ನು ಕುತ್ತಿಗೆಗೂ ಲೈಟಾಗಿ ಹಚ್ಚಬೇಕು.
ಅತಿಯಾದ ಪೌಡರ್ ಬಳಕೆ
ಮೇಕಪ್ ಸೆಟ್ ಮಾಡಲು ಇಡೀ ಮುಖಕ್ಕೆ ಅತಿಯಾಗಿ ಲೂಸ್ ಪೌಡರ್ ಅಥವಾ ಕಾಂಪ್ಯಾಕ್ಟ್ ಪೌಡರ್ ಹಚ್ಚುವುದರಿಂದ ಮುಖ ಒಣಗಿದಂತೆ ಕಾಣಿಸುತ್ತದೆ ಮತ್ತು ಮುಖದ ನೈಸರ್ಗಿಕ ಹೊಳಪು ಮರೆಯಾಗುತ್ತದೆ. ಕೇವಲ ಮುಖದ ಟಿ-ಝೋನ್ ಅಂದರೆ ಎಣ್ಣೆಯಂಶ ಹೆಚ್ಚಿರುವ ಜಾಗಕ್ಕೆ ಮಾತ್ರ ಲಘುವಾಗಿ ಪೌಡರ್ ಬಳಸಿ ಸೆಟ್ ಮಾಡಿ. ಕೊನೆಯಲ್ಲಿ ಮೇಕಪ್ ಸೆಟ್ಟಿಂಗ್ ಸ್ಪ್ರೇ ಬಳಸಬೇಕು.
