ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಜಗತ್ತಿನಾದ್ಯಂತ ಇಂದು ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯ ಸಂಭ್ರಮ ಮನೆಮಾಡಿದೆ. ಭಾರತದ ಪ್ರಾಚೀನ ಜೀವನ ಪದ್ಧತಿಯಾದ ಯೋಗಕ್ಕೆ ಇಡೀ ವಿಶ್ವವೇ ಮಾರುಹೋಗಿದ್ದು, ಅಮೆರಿಕದಾದ್ಯಂತ ಇಂದು ಬೃಹತ್ ಯೋಗ ಕಾರ್ಯಕ್ರಮಗಳು ಯಶಸ್ವಿಯಾಗಿ ಜರುಗಿವೆ. ಟೆಕ್ಸಾಸ್ನ ಸಾರ್ವಜನಿಕ ಉದ್ಯಾನವನಗಳಿಂದ ಹಿಡಿದು ನ್ಯೂಯಾರ್ಕ್ನ ಜಗತ್ಪ್ರಸಿದ್ಧ ‘ಟೈಮ್ಸ್ ಸ್ಕ್ವೇರ್’ ವರೆಗೆ ಸಾವಿರಾರು ಅಮೆರಿಕನ್ನರು ಮತ್ತು ಭಾರತೀಯ ಮೂಲದ ನಿವಾಸಿಗಳು ಯೋಗ ಮ್ಯಾಟ್ಗಳನ್ನು ಹಾಸಿ ಜಂಟಿಯಾಗಿ ಯೋಗಾಸನಗಳನ್ನು ಪ್ರದರ್ಶಿಸಿದ್ದಾರೆ.
‘ಆರೋಗ್ಯಕರ ವಯಸ್ಸಾಗುವಿಕೆ’ ಧ್ಯೇಯವಾಕ್ಯ
ಈ ವರ್ಷದ ಅಂತರರಾಷ್ಟ್ರೀಯ ಯೋಗ ದಿನಾಚರಣೆಯನ್ನು “ಆರೋಗ್ಯಕರ ವಯಸ್ಸಾಗುವಿಕೆಗಾಗಿ ಯೋಗ” ಎಂಬ ವಿಶೇಷ ಧ್ಯೇಯವಾಕ್ಯದೊಂದಿಗೆ ಆಚರಿಸಲಾಗುತ್ತಿದೆ. ದೈಹಿಕ ಶಕ್ತಿ, ಮಾನಸಿಕ ನೆಮ್ಮದಿ ಮತ್ತು ಮುನ್ನೆಚ್ಚರಿಕೆಯ ಆರೋಗ್ಯ ರಕ್ಷಣೆಗಾಗಿ ಅಮೆರಿಕದ ಜನಸಾಮಾನ್ಯರಲ್ಲಿ ಯೋಗವು ಒಂದು ಪ್ರಮುಖ ಜೀವನಶೈಲಿಯಾಗಿ ಮಾರ್ಪಟ್ಟಿರುವುದಕ್ಕೆ ಈ ಕಾರ್ಯಕ್ರಮಗಳು ಸಾಕ್ಷಿಯಾಗಿವೆ.
ಟೈಮ್ಸ್ ಸ್ಕ್ವೇರ್ನಲ್ಲಿ ಯೋಗದ ಝಲಕ್!
ವಿಶ್ವದ ಅತ್ಯಂತ ಜನನಿಬಿಡ ಪ್ರವಾಸಿ ತಾಣವಾದ ನ್ಯೂಯಾರ್ಕ್ನ ಟೈಮ್ಸ್ ಸ್ಕ್ವೇರ್ ಮೈದಾನದಲ್ಲಿ ನಸುಬೆಳಕಿನಲ್ಲೇ ಯೋಗಾಸನ ಪ್ರಕ್ರಿಯೆಗಳು ಆರಂಭಗೊಂಡವು. ಆರ್ಟ್ ಆಫ್ ಲಿವಿಂಗ್ ಫೌಂಡೇಶನ್ ನೇತೃತ್ವದಲ್ಲಿ ನಡೆದ ಈ ಬೃಹತ್ ಸೂರ್ಯನಮಸ್ಕಾರ ಮತ್ತು ಪ್ರಾಣಾಯಾಮ ಸೆಷನ್ನಲ್ಲಿ ಸಾವಿರಾರು ವಿದೇಶಿ ಯೋಗಾಸಕ್ತರು ಭಾಗವಹಿಸಿ ಗಮನ ಸೆಳೆದರು.
ಇದನ್ನೂ ಓದಿ:
ಟೆಕ್ಸಾಸ್ನಲ್ಲಿ ದಾಖಲೆಯ ಯೋಗ ಪ್ರದರ್ಶನ
ಅಮೆರಿಕದ ಟೆಕ್ಸಾಸ್ ಪ್ರಾಂತ್ಯದ ಹೂಸ್ಟನ್, ಡಲ್ಲಾಸ್ ಮತ್ತು ಆಸ್ಟಿನ್ ನಗರಗಳಲ್ಲಿ ಭಾರಿ ಗಾತ್ರದ ಯೋಗೋತ್ಸವಗಳು ನಡೆದಿವೆ. ಭಾರತೀಯ ರಾಯಭಾರ ಕಚೇರಿಯ ಸಹಯೋಗದೊಂದಿಗೆ ಟೆಕ್ಸಾಸ್ ಸ್ಟೇಟ್ ಕ್ಯಾಪಿಟಲ್ ಮತ್ತು ಮಹಾತ್ಮಾ ಗಾಂಧಿ ಮೆಮೋರಿಯಲ್ ಪ್ಲಾಜಾಗಳಲ್ಲಿ ನೂರಾರು ಕುಟುಂಬಗಳು ಒಟ್ಟಾಗಿ ಭಾಗವಹಿಸಿ ಯೋಗದ ಮಹತ್ವವನ್ನು ಸಾರಿದರು.
ಅಮೆರಿಕ ಮಾತ್ರವಲ್ಲದೆ ಬ್ರೆಜಿಲ್ನ ಪ್ರಸಿದ್ಧ ‘ಕ್ರಿಸ್ಟ್ ದಿ ರಿಡೀಮರ್’ ಪ್ರತಿಮೆಯ ಆವರಣ ಸೇರಿದಂತೆ ವಿಶ್ವದ ವಿವಿಧ ಐತಿಹಾಸಿಕ ತಾಣಗಳಲ್ಲಿ ಭಾರತದ ಯೋಗ ರಾರಾಜಿಸುತ್ತಿದೆ.
