ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆರೋಹೆಡ್ ಕ್ರೀಡಾಂಗಣದಲ್ಲಿ ನಡೆದ ಫಿಫಾ ವಿಶ್ವಕಪ್ 2026 ರ ಹೈ-ವೋಲ್ಟೇಜ್ ಕ್ವಾರ್ಟರ್ಫೈನಲ್ನಲ್ಲಿ ಹಾಲಿ ಚಾಂಪಿಯನ್ ಅರ್ಜೆಂಟಿನಾ 3-1 ಗೋಲುಗಳ ಅಂತರದಿಂದ ಸ್ವಿಟ್ಜರ್ಲ್ಯಾಂಡ್ ವಿರುದ್ಧ ಭರ್ಜರಿ ಗೆಲುವು ದಾಖಲಿಸಿದೆ. ನಿಗದಿತ ಅವಧಿಯಲ್ಲಿ 1-1 ಸಮಬಲ ಸಾಧಿಸಿದ್ದ ಈ ಪಂದ್ಯವು ಹೆಚ್ಚುವರಿ ಸಮಯಕ್ಕೆ ವಿಸ್ತರಣೆಯಾಯಿತು. ಅಲ್ಲಿ ಅರ್ಜೆಂಟಿನಾ ಆಟಗಾರರು ಅಸಾಧಾರಣ ಪ್ರದರ್ಶನ ನೀಡಿ ಸೆಮಿಫೈನಲ್ಗೆ ಅರ್ಹತೆ ಪಡೆದರು.
ಆರಂಭಿಕ ಮುನ್ನಡೆ ಮತ್ತು ಸ್ವಿಸ್ ತಿರುಗೇಟು
ಆಟದ 10ನೇ ನಿಮಿಷದಲ್ಲೇ ಲಿಯೋನೆಲ್ ಮೆಸ್ಸಿ ನೀಡಿದ ಅದ್ಭುತ ಕಾರ್ನರ್ ಕ್ರಾಸ್ ಅನ್ನು ಬಳಸಿಕೊಂಡ ಅಲೆಕ್ಸಿಸ್ ಮ್ಯಾಕ್ ಅಲ್ಲಿಸ್ಟರ್, ಹೆಡರ್ ಮೂಲಕ ಗೋಲು ಹೊಡೆದು ಅರ್ಜೆಂಟಿನಾಗೆ 1-0 ಮುನ್ನಡೆ ತಂದರು. ಆದರೆ 67ನೇ ನಿಮಿಷದಲ್ಲಿ ಸ್ವಿಟ್ಜರ್ಲ್ಯಾಂಡ್ನ ಡನ್ ಎನ್ಡೊಯೆ ಗೋಲು ಗಳಿಸಿ ಪಂದ್ಯವನ್ನು 1-1 ರ ಸಮಬಲಕ್ಕೆ ತಂದರು. ಆ ಬಳಿಕ 72ನೇ ನಿಮಿಷದಲ್ಲಿ ಬ್ರೀಲ್ ಎಂಬೊಲೊ ಎರಡನೇ ಹಳದಿ ಕಾರ್ಡ್ ಪಡೆದು ಹೊರನಡೆದಿದ್ದರಿಂದ ಸ್ವಿಸ್ ತಂಡ 10 ಆಟಗಾರರಿಗೆ ಸೀಮಿತವಾಯಿತು.
ಹೆಚ್ಚುವರಿ ಸಮಯದ ಮ್ಯಾಜಿಕ್ ಹಾಗೂ ಸೆಮಿಸ್ ಫೈಟ್
ಸ್ವಿಸ್ ತಂಡವು 10 ಆಟಗಾರರೊಂದಿಗೆ ತೀವ್ರ ಪ್ರತಿರೋಧ ಒಡ್ಡಿದರೂ, ಹೆಚ್ಚುವರಿ ಸಮಯದ 112ನೇ ನಿಮಿಷದಲ್ಲಿ ಜೂಲಿಯನ್ ಅಲ್ವರೆಝ್ ಹೊಡೆದ ಕರ್ಲಿಂಗ್ ಶಾಟ್ ಗೋಲಾಗಿ ಪರಿವರ್ತನೆಯಾಗಿ ಅರ್ಜೆಂಟಿನಾಗೆ 2-1 ಮುನ್ನಡೆ ನೀಡಿತು. ಪಂದ್ಯದ ಕೊನೆಯ (120ನೇ) ನಿಮಿಷದಲ್ಲಿ ಲೌಟಾರೋ ಮಾರ್ಟಿನೆಜ್ ಮತ್ತೊಂದು ಗೋಲು ಬಾರಿಸಿ 3-1 ಅಂತರದ ಗೆಲುವನ್ನು ಖಚಿತಪಡಿಸಿದರು.
ಲಿಯೋನೆಲ್ ಸ್ಕಾಲೋನಿ ತರಬೇತಿಯ ಅರ್ಜೆಂಟಿನಾ ತಂಡವು ವಿಶ್ವಕಪ್ನಲ್ಲಿ ಸತತ 12 ಪಂದ್ಯಗಳ ಅಜೇಯ ದಾಖಲೆಯನ್ನು ಕಾಯ್ದುಕೊಂಡಿದೆ. ಜುಲೈ 15 ರಂದು ಅಟ್ಲಾಂಟಾದಲ್ಲಿ ನಡೆಯಲಿರುವ ಸೆಮಿಫೈನಲ್ನಲ್ಲಿ ಅರ್ಜೆಂಟಿನಾ ತನ್ನ ಸಾಂಪ್ರದಾಯಿಕ ಎದುರಾಳಿ ಇಂಗ್ಲೆಂಡ್ ಸವಾಲನ್ನು ಎದುರಿಸಲಿದೆ.
