ಕಾರ್ಪೊರೇಟ್ ವಲಯಕ್ಕೆ ಹೊಸ ಸೈಬರ್ ಗಂಡಾಂತರ: ದೇಶದಲ್ಲಿ ಹೆಚ್ಚುತ್ತಿದೆ ವಾಟ್ಸಾಪ್ ‘ಬಾಸ್ ಸ್ಕ್ಯಾಮ್‌’

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ದೇಶದ ಕಾರ್ಪೊರೇಟ್ ವಲಯ, ಚಾರ್ಟರ್ಡ್ ಅಕೌಂಟೆಂಟ್‌ಗಳು (CA), ಕಂಪನಿ ನಿರ್ದೇಶಕರು ಮತ್ತು ಮುಖ್ಯ ಹಣಕಾಸು ಅಧಿಕಾರಿಗಳನ್ನು ಗುರಿಯಾಗಿಸಿಕೊಂಡು ದೇಶಾದ್ಯಂತ ವೇಗವಾಗಿ ಹರಡುತ್ತಿರುವ ‘ಬಾಸ್ ಸ್ಕ್ಯಾಮ್’ (Boss Scam) ಎಂಬ ಅಪಾಯಕಾರಿ ಸೈಬರ್ ವಂಚನೆ ಜಾಲದ ವಿರುದ್ಧ ಕೇಂದ್ರ ಗೃಹ ಸಚಿವಾಲಯವು ರಾಷ್ಟ್ರೀಯ ಜಾಗೃತಿ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. ವಂಚಕರು ವಾಟ್ಸಾಪ್ ಖಾತೆಗಳನ್ನು ಹೈಜಾಕ್ ಮಾಡುವ ಮೂಲಕ ಕೋಟ್ಯಂತರ ರೂ. ಹಣವನ್ನು ಲೂಟಿ ಮಾಡುತ್ತಿದ್ದಾರೆ ಎಂದು ಸಚಿವಾಲಯ ಎಚ್ಚರಿಸಿದೆ.

ರಾಷ್ಟ್ರೀಯ ಸೈಬರ್ ಅಪರಾಧ ವರದಿ ಪೋರ್ಟಲ್ (NCRP) ಗೆ ದೆಹಲಿ, ಗುಜರಾತ್, ಮಹಾರಾಷ್ಟ್ರ ಮತ್ತು ರಾಜಸ್ಥಾನ ಸೇರಿದಂತೆ ಹಲವು ರಾಜ್ಯಗಳಿಂದ ಈ ಕುರಿತು ದೂರುಗಳು ಬಂದ ಹಿನ್ನೆಲೆಯಲ್ಲಿ ಈ ತುರ್ತು ಕ್ರಮ ಕೈಗೊಳ್ಳಲಾಗಿದೆ.

ಮಾಲ್‌ವೇರ್ ಮೂಲಕ ವಾಟ್ಸಾಪ್ ಹೈಜಾಕ್

ಗೃಹ ಸಚಿವಾಲಯದ ಅಡಿಯಲ್ಲಿ ಕಾರ್ಯನಿರ್ವಹಿಸುವ ‘ಇಂಡಿಯನ್ ಸೈಬರ್ ಕ್ರೈಮ್ ಕೋಆರ್ಡಿನೇಷನ್ ಸೆಂಟರ್’ ನೀಡಿರುವ ತಾಂತ್ರಿಕ ಮಾಹಿತಿಯ ಪ್ರಕಾರ ಸೈಬರ್ ಅಪರಾಧಿಗಳು ವಾಟ್ಸಾಪ್, ಎಸ್‌ಎಂಎಸ್ ಅಥವಾ ಇಮೇಲ್ ಮೂಲಕ “ಸ್ಟೇಟ್‌ಮೆಂಟ್ ಆಫ್ ಅಕೌಂಟ್”, “RBI” ಅಥವಾ “MCA” (ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ) ಹೆಸರಿನಲ್ಲಿ ನಕಲಿ ಜಿಪ್ (ZIP) ಫೈಲ್‌ಗಳನ್ನು ಕಳುಹಿಸುತ್ತಾರೆ. ಈ ಮಾಲ್‌ವೇರ್ ಕೇವಲ ವಿಂಡೋಸ್ ಕಂಪ್ಯೂಟರ್‌ಗಳನ್ನು ಗುರಿಯಾಗಿಸುತ್ತದೆ. ಬಳಕೆದಾರರು ಆ ಜಿಪ್ ಫೈಲ್ ಅನ್ನು ಡೌನ್‌ಲೋಡ್ ಮಾಡಿ ಓಪನ್ ಮಾಡಿದ ತಕ್ಷಣ ಕಂಪ್ಯೂಟರ್‌ನಲ್ಲಿ ‘ಟ್ರೋಜನ್’ ಮಾಲ್‌ವೇರ್ ಇನ್‌ಸ್ಟಾಲ್ ಆಗುತ್ತದೆ.

ಈ ಮಾಲ್‌ವೇರ್ ತಕ್ಷಣವೇ ಆ ಕಂಪ್ಯೂಟರ್‌ನಲ್ಲಿ ಸಕ್ರಿಯವಾಗಿರುವ ‘ವಾಟ್ಸಾಪ್ ವೆಬ್’ ಸೆಷನ್ ಅನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳುತ್ತದೆ. ಕೆಲವು ಪ್ರಕರಣಗಳಲ್ಲಿ ವಂಚಕರು ಆದಾಯ ತೆರಿಗೆ ಇಲಾಖೆಯ ಹೆಸರಿನಲ್ಲಿ ‘ಫಿಶಿಂಗ್’ ಇಮೇಲ್‌ಗಳನ್ನು ಸಹ ಬಳಸುತ್ತಿದ್ದಾರೆ.

ಕಂಪನಿ ನೆಟ್‌ವರ್ಕ್‌ನಲ್ಲಿ ಹರಡುವಿಕೆ

ವಾಟ್ಸಾಪ್ ಖಾತೆಯ ಪ್ರವೇಶ ಸಿಕ್ಕ ತಕ್ಷಣ, ವಂಚಕರು ಅದೇ ಮಾಲ್‌ವೇರ್ ಫೈಲ್ ಅನ್ನು ಸಂತ್ರಸ್ತರ ಕಾಂಟ್ಯಾಕ್ಟ್‌ಗಳು ಮತ್ತು ಗ್ರೂಪ್‌ಗಳಿಗೆ ಆಟೋಮ್ಯಾಟಿಕ್ ಆಗಿ ಕಳುಹಿಸುತ್ತಾರೆ. ಅಲ್ಲದೆ, ಪರಿಶೀಲನೆಗಾಗಿ ಇದನ್ನು ಕಂಪನಿಯ ಫೈನಾನ್ಸ್ ಮ್ಯಾನೇಜರ್‌ಗೆ ಫಾರ್ವರ್ಡ್ ಮಾಡುವಂತೆ ಸಂದೇಶ ಕಳುಹಿಸುತ್ತಾರೆ. ಹೀಗೆ ಇಡೀ ಕಂಪನಿಯ ನೆಟ್‌ವರ್ಕ್‌ಗೆ ವೈರಸ್ ಹರಡುತ್ತದೆ.

ಅಂತಿಮ ಹಂತದಲ್ಲಿ, ವಂಚಕರು ಕಂಪನಿಯ ಉನ್ನತ ಅಧಿಕಾರಿ ಅಥವಾ ಸಿಇಒ (CEO) ಅವರ ನಿಜವಾದ ವಾಟ್ಸಾಪ್ ಖಾತೆಯನ್ನು ಬಳಸಿ, ಹಣಕಾಸು ವಿಭಾಗದ ಸಿಬ್ಬಂದಿಗೆ “ತುರ್ತು ಹಣ ವರ್ಗಾವಣೆ” ಮಾಡುವಂತೆ ಆದೇಶ ನೀಡುತ್ತಾರೆ. ಅಧಿಕಾರಿಗಳೇ ಸಂದೇಶ ಕಳುಹಿಸಿದ್ದಾರೆಂದು ನಂಬಿ ಅಕೌಂಟೆಂಟ್‌ಗಳು ವಂಚಕರ ಬ್ಯಾಂಕ್ ಖಾತೆಗಳಿಗೆ ಹಣ ವರ್ಗಾಯಿಸಿ ಮೋಸ ಹೋಗುತ್ತಿದ್ದಾರೆ. ಇದು ಅಂತಾರಾಷ್ಟ್ರೀಯ ಸೈಬರ್ ಅಪರಾಧ ಜಾಲದ ಕೃತ್ಯವಾಗಿದೆ ಎಂದು I4C ನ ತಾಂತ್ರಿಕ ವಿಭಾಗ (NCTAU) ಪತ್ತೆಹಚ್ಚಿದೆ.

I4C ಹೊರಡಿಸಿರುವ ಕಟ್ಟುನಿಟ್ಟಿನ ನಿಯಮಗಳು

ವಾಟ್ಸಾಪ್ ಅಥವಾ ಇಮೇಲ್ ಮೂಲಕ ಯಾವುದೇ ತುರ್ತು ಹಣ ವರ್ಗಾವಣೆ ಅಥವಾ ಬ್ಯಾಂಕ್ ಖಾತೆ ಬದಲಾವಣೆಯ ಸಂದೇಶ ಬಂದರೆ, ತಕ್ಷಣವೇ ಸಂಬಂಧಪಟ್ಟ ಅಧಿಕೃತ ವ್ಯಕ್ತಿಗೆ ನೇರ ಫೋನ್ ಕರೆ ಅಥವಾ ವೈಯಕ್ತಿಕವಾಗಿ ಭೇಟಿಯಾಗಿ ಖಚಿತಪಡಿಸಿಕೊಳ್ಳಬೇಕು.

ಅಪರಿಚಿತ ಮೂಲಗಳಿಂದ ಬರುವ ZIP ಫೈಲ್ ಅಥವಾ ಇಎಕ್ಸ್‌ಇ (.exe) ಪ್ರೋಗ್ರಾಂಗಳನ್ನು ಡೌನ್‌ಲೋಡ್ ಮಾಡಬೇಡಿ. ಆರ್‌ಬಿಐ (RBI) ನಂತಹ ನಿಯಂತ್ರಕ ಸಂಸ್ಥೆಗಳು ಯಾವುದೇ ಸಾಫ್ಟ್‌ವೇರ್ ಅಪ್‌ಡೇಟ್ ಅಥವಾ ಅಕೌಂಟ್ ಸ್ಟೇಟ್‌ಮೆಂಟ್‌ಗಳನ್ನು ವಾಟ್ಸಾಪ್ ಮೂಲಕ ಕಳುಹಿಸುವುದಿಲ್ಲ.

ನಿಮ್ಮ ವಾಟ್ಸಾಪ್‌ನ “Linked Devices” ವಿಭಾಗವನ್ನು ನಿಯಮಿತವಾಗಿ ಪರಿಶೀಲಿಸಿ ಮತ್ತು ಬಳಕೆಯಲ್ಲಿಲ್ಲದ ವಾಟ್ಸಾಪ್ ವೆಬ್ ಸೆಷನ್‌ಗಳಿಂದ ತಕ್ಷಣ ‘ಲಾಗ್ ಔಟ್’ ಮಾಡಿ.

ಕಂಪನಿಯ ಸಿಸ್ಟಮ್ ಅಡ್ಮಿನಿಸ್ಟ್ರೇಟರ್‌ಗಳು ಬಳಕೆದಾರರ ಪ್ರೊಫೈಲ್ ಡೈರೆಕ್ಟರಿಗಳಿಂದ ಅಪರಿಚಿತ .exe ಮತ್ತು .dll ಫೈಲ್‌ಗಳು ರನ್ ಆಗದಂತೆ ಬ್ಲಾಕ್ ಮಾಡಬೇಕು ಹಾಗೂ ಆಂಟಿವೈರಸ್ ಅನ್ನು ಅಪ್‌ಡೇಟ್ ಆಗಿಡಬೇಕು.

ಖಾತೆ ಹೈಜಾಕ್ ಆದಲ್ಲಿ ಏನು ಮಾಡಬೇಕು?

ಒಂದು ವೇಳೆ ನಿಮ್ಮ ವಾಟ್ಸಾಪ್ ಖಾತೆ ಹ್ಯಾಕ್ ಆಗಿದೆ ಎಂದು ಅನುಮಾನ ಬಂದರೆ, ತಕ್ಷಣ ಎಲ್ಲಾ ಲಿಂಕ್ಡ್ ಡಿವೈಸ್‌ಗಳಿಂದ ಲಾಗ್ ಔಟ್ ಮಾಡಿ. ನಿಮ್ಮ ಕಾಂಟ್ಯಾಕ್ಟ್‌ಗಳಿಗೆ ಯಾವುದೇ ಫೈಲ್ ಓಪನ್ ಮಾಡದಂತೆ ಸಂದೇಶ ರವಾನಿಸಿ ಹಾಗೂ ಇಡೀ ಕಂಪ್ಯೂಟರ್ ಅನ್ನು ಆಂಟಿವೈರಸ್ ಮೂಲಕ ಸ್ಕ್ಯಾನ್ ಮಾಡಿ.

ಇದನ್ನೂ ಓದಿ:

58,000ಕ್ಕೂ ಹೆಚ್ಚು ಜನರಿಗೆ ಮುನ್ನೆಚ್ಚರಿಕೆ

ಕೇಂದ್ರ ಗೃಹ ಸಚಿವಾಲಯವು ಮೈಕ್ರೋಸಾಫ್ಟ್ ಡಿಫೆಂಡರ್, ಸರ್ಟ್-ಇನ್ (CERT-In) ಮತ್ತು ಕ್ವಿಕ್ ಹೀಲ್, ಕೆ7 ಕಂಪ್ಯೂಟಿಂಗ್ ನಂತಹ ಭಾರತೀಯ ಸೈಬರ್ ಭದ್ರತಾ ಸಂಸ್ಥೆಗಳೊಂದಿಗೆ ಜಂಟಿಯಾಗಿ ಕಾರ್ಯನಿರ್ವಹಿಸುತ್ತಿದ್ದು, ಈಗಾಗಲೇ 10,000ಕ್ಕೂ ಹೆಚ್ಚು ಬಳಕೆದಾರರನ್ನು ರಕ್ಷಿಸಿದೆ. ಕಳೆದ ಒಂದು ತಿಂಗಳಿನಲ್ಲಿ “I4CMHA-G” ಹೆಸರಿನ ಹೆಡರ್ ಅಡಿಯಲ್ಲಿ 58,000ಕ್ಕೂ ಹೆಚ್ಚು ಸಂಭಾವ್ಯ ಬಲಿಪಶುಗಳಿಗೆ ಎಸ್‌ಎಂಎಸ್ ಮೂಲಕ ಎಚ್ಚರಿಕೆ ಸಂದೇಶ ಕಳುಹಿಸಲಾಗಿದೆ.

ಯಾವುದೇ ಸೈಬರ್ ವಂಚನೆ ನಡೆದ ತಕ್ಷಣ ಸಾರ್ವಜನಿಕರು ರಾಷ್ಟ್ರೀಯ ಸೈಬರ್ ಅಪರಾಧ ಸಹಾಯವಾಣಿ ಸಂಖ್ಯೆ 1930 ಗೆ ಕರೆ ಮಾಡಬೇಕು ಅಥವಾ ಅಧಿಕೃತ ವೆಬ್‌ಸೈಟ್ (www.cybercrime.gov.in) ಮೂಲಕ ದೂರು ದಾಖಲಿಸಬೇಕು ಎಂದು ಗೃಹ ಸಚಿವಾಲಯ ವಿನಂತಿಸಿದೆ