ಹಾಗಲಕಾಯಿ ಎಂದಾಕ್ಷಣ ಮೊದಲು ನೆನಪಾಗೋದು ಅದರ ಕಹಿ ರುಚಿ. ಆದರೆ ಅದೇ ಹಾಗಲಕಾಯಿಯನ್ನು ಸ್ವಲ್ಪ ವಿಭಿನ್ನವಾಗಿ ತಯಾರಿಸಿದ್ರೆ ಕಹಿ ಕಡಿಮೆಯಾಗಿ, ಸಿಹಿ-ಹುಳಿ-ಖಾರದ ರುಚಿಯ ಅದ್ಭುತ ಗೊಜ್ಜು ಸಿದ್ಧವಾಗುತ್ತದೆ. ಬಿಸಿ ಅನ್ನ, ರಾಗಿ ಮುದ್ದೆ ಅಥವಾ ಚಪಾತಿಯ ಜೊತೆ ಈ ಗೊಜ್ಜು ತುಂಬಾ ರುಚಿಯಾಗಿರುತ್ತದೆ. ಹಾಗಲಕಾಯಿಯ ಕಹಿ ಕಡಿಮೆ ಮಾಡಲು ಉಪ್ಪು ಹಾಕಿ ಸ್ವಲ್ಪ ಸಮಯ ಇಡುವುದು ಸಹಾಯ ಮಾಡುತ್ತದೆ.
ಬೇಕಾಗುವ ಸಾಮಗ್ರಿಗಳು
ಹಾಗಲಕಾಯಿ – 2
ತೆಂಗಿನಕಾಯಿ ತುರಿ – 1 ಕಪ್
ಬೆಲ್ಲ – 2 ರಿಂದ 3 ಚಮಚ
ಹುಣಸೆಹಣ್ಣಿನ ರಸ – 2 ಚಮಚ
ಸಾಂಬಾರ್ ಪುಡಿ – 1 ರಿಂದ 2 ಚಮಚ
ಅರಿಶಿನ – ಸ್ವಲ್ಪ
ಉಪ್ಪು – ರುಚಿಗೆ ತಕ್ಕಷ್ಟು
ಎಣ್ಣೆ – 2 ಚಮಚ
ಒಗ್ಗರಣೆಗೆ
ಸಾಸಿವೆ, ಜೀರಿಗೆ, ಒಣಮೆಣಸಿನಕಾಯಿ ಹಾಗೂ ಕರಿಬೇವು ಬೇಕಾಗುತ್ತದೆ.
ಮೊದಲು ಹಾಗಲಕಾಯಿಯ ಕಹಿ ಕಡಿಮೆ ಮಾಡಿ
ಹಾಗಲಕಾಯಿಯನ್ನು ಚೆನ್ನಾಗಿ ತೊಳೆದು ತೆಳುವಾಗಿ ಕತ್ತರಿಸಿ. ಬೀಜ ಹಾಗೂ ಒಳಗಿನ ಗಟ್ಟಿಯಾದ ಭಾಗವನ್ನು ತೆಗೆಯಿರಿ. ನಂತರ ಸ್ವಲ್ಪ ಉಪ್ಪು ಮತ್ತು ಅರಿಶಿನ ಹಾಕಿ ಚೆನ್ನಾಗಿ ಕಲಸಿ 20–30 ನಿಮಿಷ ಇಡಿ. ಬಳಿಕ ಕೈಯಿಂದ ಸ್ವಲ್ಪ ಹಿಂಡಿ ನೀರಿನಲ್ಲಿ ತೊಳೆದು ನೀರು ಸಂಪೂರ್ಣವಾಗಿ ತೆಗೆಯಿರಿ. ಈ ವಿಧಾನದಿಂದ ಕಹಿ ಕಡಿಮೆಯಾಗಲು ಸಹಾಯವಾಗುತ್ತದೆ.
ಗೊಜ್ಜು ಮಾಡುವ ವಿಧಾನ
ಬಾಣಲೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ. ಅದಕ್ಕೆ ಹಾಗಲಕಾಯಿ ತುಂಡುಗಳನ್ನು ಹಾಕಿ ಮಧ್ಯಮ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ. ತುಂಡುಗಳು ಸ್ವಲ್ಪ ಕಂದು ಬಣ್ಣಕ್ಕೆ ಬಂದು ಮೃದುವಾದಾಗ ತೆಗೆದಿಡಿ.
ಈಗ ತೆಂಗಿನಕಾಯಿ ತುರಿ, ಹುಣಸೆಹಣ್ಣಿನ ರಸ, ಬೆಲ್ಲ, ಸಾಂಬಾರ್ ಪುಡಿ ಹಾಗೂ ಸ್ವಲ್ಪ ಉಪ್ಪನ್ನು ಮಿಕ್ಸಿಗೆ ಹಾಕಿ ಅಗತ್ಯವಿರುವಷ್ಟು ನೀರು ಸೇರಿಸಿ ನಯವಾಗಿ ರುಬ್ಬಿಕೊಳ್ಳಿ.
ಅದೇ ಬಾಣಲೆಗೆ ರುಬ್ಬಿದ ಮಸಾಲೆ ಹಾಕಿ 2–3 ನಿಮಿಷ ಕುದಿಸಿ. ನಂತರ ಹುರಿದ ಹಾಗಲಕಾಯಿ ಸೇರಿಸಿ ಚೆನ್ನಾಗಿ ಕಲಸಿ. ಅಗತ್ಯವಿದ್ದರೆ ಸ್ವಲ್ಪ ನೀರು ಸೇರಿಸಿ 5 ನಿಮಿಷ ಮಂದ ಉರಿಯಲ್ಲಿ ಬೇಯಿಸಿ.
ಕೊನೆಯಲ್ಲಿ ಸಾಸಿವೆ, ಜೀರಿಗೆ, ಒಣಮೆಣಸಿನಕಾಯಿ ಹಾಗೂ ಕರಿಬೇವಿನ ಒಗ್ಗರಣೆ ಹಾಕಿ. ಒಮ್ಮೆ ಚೆನ್ನಾಗಿ ಕಲಿಸಿದರೆ ರುಚಿಯಾದ ಹಾಗಲಕಾಯಿ ಗೊಜ್ಜು ಸವಿಯಲು ಸಿದ್ಧ.
ಸಿಹಿ-ಹುಳಿ ರುಚಿಯೇ ಇದರ ಸ್ಪೆಷಲ್!
ಹಾಗಲಕಾಯಿಯ ಕಹಿಗೆ ಬೆಲ್ಲದ ಸಿಹಿ ಮತ್ತು ಹುಣಸೆಹಣ್ಣಿನ ಹುಳಿ ಸೇರಿ ರುಚಿ ಚೆನ್ನಾಗಿ ಬ್ಯಾಲೆನ್ಸ್ ಆಗುತ್ತದೆ. ಬಿಸಿ ಅನ್ನಕ್ಕೆ ಸ್ವಲ್ಪ ತುಪ್ಪ ಹಾಕಿಕೊಂಡು ಈ ಗೊಜ್ಜು ಸೇರಿಸಿ ತಿಂದರೆ ರುಚಿ ಸೂಪರ್.
