ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಮಾರುಕಟ್ಟೆಯಲ್ಲಿ ಸಕ್ಕರೆಯ ಬೆಲೆ ಏರಿಕೆಯಾಗುತ್ತಿರುವ ಬೆನ್ನಲ್ಲೇ ಕೇಂದ್ರ ಸರ್ಕಾರ ಪೂರೈಕೆ ಹೆಚ್ಚಿಸುವತ್ತ ಗಮನಹರಿಸಿದೆ. ವಿದೇಶದಿಂದ ಆಮದು ಮಾಡಿಕೊಳ್ಳುವ ಕಚ್ಚಾ ಸಕ್ಕರೆ ದೇಶೀಯ ಮಾರುಕಟ್ಟೆಗೆ ತಡವಾಗಿ ಬರುವುದನ್ನು ತಪ್ಪಿಸಲು ಇದೀಗ ಕಟ್ಟುನಿಟ್ಟಿನ ಗಡುವು ವಿಧಿಸಲಾಗಿದೆ.
ಆಮದು ಮಾಡಿಕೊಂಡ ಕಚ್ಚಾ ಸಕ್ಕರೆಯನ್ನು ನಿಗದಿತ ಅವಧಿಯೊಳಗೆ ಸಂಸ್ಕರಿಸಿ ಮಾರಾಟ ಮಾಡುವುದು ಕಡ್ಡಾಯವಾಗಲಿದೆ.
ಆಮದು ಮಾಡಿದ ಸಕ್ಕರೆ ಹೆಚ್ಚು ದಿನ ಗೋದಾಮಿನಲ್ಲಿ ಇರಲ್ಲ
TRQ ವ್ಯವಸ್ಥೆಯಡಿ ದೇಶಕ್ಕೆ ತರಲಾಗುವ ಕಚ್ಚಾ ಸಕ್ಕರೆಯನ್ನು ಆಮದು ಮಾಡಿಕೊಂಡ ದಿನಾಂಕದಿಂದ ಗರಿಷ್ಠ ಎರಡು ತಿಂಗಳೊಳಗೆ ಸಂಸ್ಕರಣೆ ಪೂರ್ಣಗೊಳಿಸಿ ಮಾರಾಟಕ್ಕೆ ಬಿಡುಗಡೆ ಮಾಡಬೇಕು. ಅಂದರೆ, ಸಕ್ಕರೆ ಆಮದು ಮಾಡಿದ ನಂತರ ಅದನ್ನು ದೀರ್ಘಕಾಲ ದಾಸ್ತಾನು ಮಾಡಿಕೊಂಡು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಅವಕಾಶವನ್ನು ಸರ್ಕಾರ ಕಡಿಮೆ ಮಾಡಿದೆ.
ಈ ಹಿಂದೆ 2026ರ ಅಕ್ಟೋಬರ್ 31ರವರೆಗೆ ಆಮದು ಸಕ್ಕರೆಯನ್ನು ಸಂಸ್ಕರಿಸಿ ಮಾರಾಟ ಮಾಡಲು ಅವಕಾಶವಿತ್ತು. ಇದೀಗ ಪ್ರತಿ ಆಮದು ಸರಕಿನ ಪ್ರವೇಶ ದಿನಾಂಕವನ್ನೇ ಗಡುವಿನ ಆರಂಭದ ದಿನವಾಗಿ ಪರಿಗಣಿಸಲಾಗುತ್ತದೆ.
10 ಲಕ್ಷ ಟನ್ ಸಕ್ಕರೆ ಆಮದಿಗೆ ಅವಕಾಶ
ದೇಶೀಯ ಮಾರುಕಟ್ಟೆಯಲ್ಲಿ ಪೂರೈಕೆ ಹೆಚ್ಚಿಸುವ ಉದ್ದೇಶದಿಂದ ಅಕ್ಟೋಬರ್ 31ರವರೆಗೆ ಒಟ್ಟು 10 ಲಕ್ಷ ಟನ್ ಸಕ್ಕರೆ ಆಮದು ಮಾಡಿಕೊಳ್ಳಲು ಕೇಂದ್ರ ಅವಕಾಶ ನೀಡಿದೆ. ಆಮದು ಸಕ್ಕರೆ ಹೆಚ್ಚಿನ ಪ್ರಮಾಣದಲ್ಲಿ ಸಂಗ್ರಹವಾಗದೆ ಬೇಗನೆ ಬಳಕೆಗೆ ಬರುವಂತೆ ಮಾಡುವುದೇ ಹೊಸ ನಿಯಮದ ಪ್ರಮುಖ ಉದ್ದೇಶವಾಗಿದೆ.
ಇದನ್ನೂ ಓದಿ:
ದೊಡ್ಡ ಪ್ರಮಾಣದಲ್ಲಿ ಸಕ್ಕರೆ ಖರೀದಿಸುವ ವ್ಯಾಪಾರಿಗಳು, ತಂಪು ಪಾನೀಯ ಮತ್ತು ಐಸ್ಕ್ರೀಂ ತಯಾರಿಕಾ ಕಂಪನಿಗಳ ದಾಸ್ತಾನಿನ ಮೇಲೂ ಸರ್ಕಾರ ನಿಗಾ ವಹಿಸಲಿದೆ.
ಉತ್ಪಾದನೆ ಕಡಿಮೆಯಾದರೂ ಕೊರತೆ ಇಲ್ಲ
ಸಕ್ಕರೆ ಉದ್ಯಮದ ಸಂಘಟನೆಯಾದ ISMA ಪ್ರಕಾರ, ಸದ್ಯ ದೇಶದಲ್ಲಿ ಬೇಡಿಕೆಗೆ ತಕ್ಕಷ್ಟು ಸಕ್ಕರೆ ಲಭ್ಯವಿದೆ. ಪ್ರಸಕ್ತ ಉತ್ಪಾದನೆ ಹಾಗೂ ಹಿಂದಿನ ದಾಸ್ತಾನು ಸೇರಿ ದೇಶೀಯ ಬಳಕೆಯನ್ನು ನಿಭಾಯಿಸಲು ಸಾಧ್ಯವಾಗಲಿದೆ ಎಂದು ಉದ್ಯಮ ವಲಯ ಅಭಿಪ್ರಾಯಪಟ್ಟಿದೆ.
ಕೇಂದ್ರದ ಹೊಸ ಆಮದು ನಿಯಮಗಳಿಂದ ಮಾರುಕಟ್ಟೆಗೆ ಸಕ್ಕರೆ ಪೂರೈಕೆ ವೇಗವಾಗಿ ಹೆಚ್ಚಾದರೆ, ಮುಂದಿನ ದಿನಗಳಲ್ಲಿ ಚಿಲ್ಲರೆ ಬೆಲೆಗಳ ಮೇಲಿನ ಒತ್ತಡ ಕಡಿಮೆಯಾಗುವ ಸಾಧ್ಯತೆ ಇದೆ.
