ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಒಡಿಶಾ ಮತ್ತು ಛತ್ತೀಸ್‌ಗಢ ರಾಜ್ಯಗಳ ನಡುವೆ ದಶಕಗಳಿಂದ ನೆನೆಗುದಿಗೆ ಬಿದ್ದಿರುವ ಮಹಾನದಿ ನದಿ ನೀರು ಹಂಚಿಕೆ ವಿವಾದಕ್ಕೆ ಸೌಹಾರ್ದಯುತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಗುರುವಾರ ದೆಹಲಿಯಲ್ಲಿ ಮಹತ್ವದ ಸಭೆಯ ನಡೆಸಿದ್ದಾರೆ.
ಕೇಂದ್ರ ಜಲಶಕ್ತಿ ಸಚಿವ ಸಿ.ಆರ್. ಪಾಟೀಲ್, ಛತ್ತೀಸ್‌ಗಢ ಮುಖ್ಯಮಂತ್ರಿ ವಿಷ್ಣು ದೇವ್ ಸಾಯಿ ಮತ್ತು ಒಡಿಶಾ ಮುಖ್ಯಮಂತ್ರಿ ಮೋಹನ್ ಚರಣ್ ಮಾಝಿ ಅವರು ಈ ಸಭೆಯಲ್ಲಿ ಪಾಲ್ಗೊಂಡು ದತ್ತಾಂಶ ಆಧಾರಿತ ಪರಿಹಾರದ ಕುರಿತು ಸುದೀರ್ಘ ಚರ್ಚೆ ನಡೆಸಿದರು.
ಸೌಹಾರ್ದಯುತ ಇತ್ಯರ್ಥಕ್ಕೆ ಒಲವು
ಉಭಯ ರಾಜ್ಯಗಳಲ್ಲಿ ಸದ್ಯ ಬಿಜೆಪಿ ಸರ್ಕಾರಗಳೇ ಅಸ್ತಿತ್ವದಲ್ಲಿದ್ದು, ನ್ಯಾಯಾಲಯದ ದೀರ್ಘ ಕಾನೂನು ಹೋರಾಟಗಳಿಗಿಂತ ಪರಸ್ಪರ ಮಾತುಕತೆ ಮತ್ತು ತಾಂತ್ರಿಕ ಸಮಾಲೋಚನೆಗಳ ಮೂಲಕ ವಿವಾದವನ್ನು ಬಗೆಹರಿಸಿಕೊಳ್ಳಲು ಎರಡೂ ರಾಜ್ಯಗಳು ಒಪ್ಪಿಗೆ ಸೂಚಿಸಿವೆ. ಕೇಂದ್ರ ಜಲ ಆಯೋಗ ತೆಗೆದುಕೊಳ್ಳುವ ಯಾವುದೇ ಅಂತಿಮ ನಿರ್ಧಾರಕ್ಕೆ ತಾವು ಬದ್ಧರಾಗಿರುವುದಾಗಿ ಎರಡೂ ರಾಜ್ಯಗಳು ಭರವಸೆ ನೀಡಿವೆ.
ವಿವಾದದ ಹಿನ್ನೆಲೆ
ಮಹಾನದಿಯ ಮೇಲ್ಭಾಗದಲ್ಲಿರುವ ಛತ್ತೀಸ್‌ಗಢವು ತನ್ನ ಕೃಷಿ, ಕೈಗಾರಿಕೆ ಮತ್ತು ಗೃಹಬಳಕೆಯ ಅಗತ್ಯಗಳಿಗಾಗಿ ಜಲ ಯೋಜನೆಗಳು ಮತ್ತು ಅಣೆಕಟ್ಟುಗಳನ್ನು ನಿರ್ಮಿಸುತ್ತಿದೆ. ಇದರಿಂದಾಗಿ ಮಳೆಗಾಲವಲ್ಲದ ದಿನಗಳಲ್ಲಿ ತಳಭಾಗದಲ್ಲಿರುವ ಒಡಿಶಾ ರಾಜ್ಯಕ್ಕೆ ನೀರಿನ ಹರಿವು ತೀವ್ರವಾಗಿ ಕುಂಠಿತಗೊಳ್ಳುತ್ತಿದೆ ಎಂಬುದು ಒಡಿಶಾದ ಮುಖ್ಯ ಆಕ್ಷೇಪಣೆಯಾಗಿದೆ.
ಕಾನೂನು ಹೋರಾಟದ ಹಾದಿ
ಈ ವಿವಾದ ಬಗೆಹರಿಯದ ಹಿನ್ನೆಲೆಯಲ್ಲಿ ಒಡಿಶಾ ಸರ್ಕಾರವು 2016 ರಲ್ಲಿ ಕೇಂದ್ರಕ್ಕೆ ದೂರು ನೀಡಿ ಪ್ರತ್ಯೇಕ ನ್ಯಾಯಾಧಿಕರಣ ರಚನೆಗೆ ಕೋರಿತ್ತು. ಅದರಂತೆ 2018 ರ ಮಾರ್ಚ್‌ನಲ್ಲಿ ‘ಮಹಾನದಿ ಜಲ ವಿವಾದ ನ್ಯಾಯಾಧಿಕರಣ’ವನ್ನು ಸ್ಥಾಪಿಸಲಾಗಿದ್ದು, ಸದ್ಯ ಸುಪ್ರೀಂ ಕೋರ್ಟ್‌ನ ನಿವೃತ್ತ ನ್ಯಾಯಮೂರ್ತಿ ಬೇಲಾ ಎಂ. ತ್ರಿವೇದಿ ನೇತೃತ್ವದಲ್ಲಿ ಇದರ ವಿಚಾರಣೆ ನಡೆಯುತ್ತಿದೆ.
ಇದನ್ನೂ ಓದಿ:
ಮುಂದಿನ ತಾಂತ್ರಿಕ ಪ್ರಕ್ರಿಯೆ
ಉಭಯ ರಾಜ್ಯಗಳ ಮುಖ್ಯ ಎಂಜಿನಿಯರ್‌ಗಳು ಈಗಾಗಲೇ ತಾಂತ್ರಿಕ ವಿವರಗಳನ್ನು ಚರ್ಚಿಸಿ ಕೇಂದ್ರ ಜಲ ಆಯೋಗಕ್ಕೆ ವರದಿ ಸಲ್ಲಿಸಿದ್ದಾರೆ. ಈ ವರದಿಯನ್ನು ಆಯೋಗವು ಶೀಘ್ರದಲ್ಲೇ ನ್ಯಾಯಾಧಿಕರಣಕ್ಕೆ ಸಲ್ಲಿಸಲಿದ್ದು, ಅಮಿತ್ ಶಾ ಅವರ ಈ ಸಭೆಯು ಎರಡೂ ರಾಜ್ಯಗಳ ನಡುವೆ ಪರಸ್ಪರ ವಿಶ್ವಾಸ ಮೂಡಿಸಲು ಹಾಗೂ ಅಂತಿಮ ಒಪ್ಪಂದಕ್ಕೆ ಬರಲು ಪ್ರಮುಖ ವೇದಿಕೆಯಾಗಿದೆ.
