ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರಾಜ್ಯವನ್ನು ಬೆಚ್ಚಿಬೀಳಿಸಿರುವ ನಕಲಿ ಔಷಧ ದಂಧೆ ಪ್ರಕರಣದ ತನಿಖೆ ಮುಂದುವರಿದಂತೆ, ಆರೋಪಿಗಳ ಕಾರ್ಯವೈಖರಿಯ ಕುರಿತು ಮತ್ತಷ್ಟು ಆಘಾತಕಾರಿ ಮಾಹಿತಿಗಳು ಬೆಳಕಿಗೆ ಬರುತ್ತಿವೆ.
ಪ್ರಕರಣದ ಪ್ರಮುಖ ಆರೋಪಿ ಎಂದು ಗುರುತಿಸಲಾಗಿರುವ ಪ್ರಶಾಂತ್, ನಕಲಿ ಔಷಧಗಳಿಗೆ ಬಳಸಲು ಮೂಲ ಫಿಜರ್ ಲೇಬಲ್‌ಗಳನ್ನು ಪಡೆಯುವ ಉದ್ದೇಶದಿಂದ ಟರ್ಕಿಗೆ ಹಲವು ಬಾರಿ ಪ್ರಯಾಣಿಸಿದ್ದ ಎನ್ನುವುದು ವಿಶೇಷ ತನಿಖಾ ತಂಡದ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ವೀಸಾ ರದ್ದುಗೊಂಡರೂ ನೆರೆಯ ದೇಶಗಳ ಮೂಲಕ ಚಟುವಟಿಕೆ
ಆರೋಪಿಯ ನಿರಂತರ ಟರ್ಕಿ ಭೇಟಿಗಳ ಹಿನ್ನೆಲೆಯಲ್ಲಿ ಆತನ ವೀಸಾ ರದ್ದುಗೊಂಡ ಬಳಿಕ, ನೆರೆಯ ದೇಶಗಳ ಮೂಲಕ ಇದೇ ರೀತಿಯ ಚಟುವಟಿಕೆ ಮುಂದುವರಿಸಿದ್ದ ಎನ್ನಲಾಗಿದೆ. ಇತ್ತೀಚೆಗೆ ಅಜರ್‌ಬೈಜಾನ್‌ಗೆ ತೆರಳಿದ್ದ ಪ್ರಶಾಂತ್, ಸೆಪ್ಟೆಂಬರ್ 28ರಂದು ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಮರಳಿದಾಗ ಅಧಿಕಾರಿಗಳ ವಶಕ್ಕೆ ಸಿಕ್ಕಿದ್ದಾನೆ. ಆತನ ವಿರುದ್ಧ ಲುಕ್‌ಔಟ್ ನೋಟಿಸ್ ಜಾರಿಯಾಗಿದ್ದ ಹಿನ್ನೆಲೆಯಲ್ಲಿ ವಿಮಾನ ನಿಲ್ದಾಣದಲ್ಲೇ ಬಂಧಿಸಿ, ಎಸಿಪಿ ಅಂಜನ್ ಕುಮಾರ್ ನೇತೃತ್ವದ ತಂಡಕ್ಕೆ ಹಸ್ತಾಂತರಿಸಲಾಗಿತ್ತು.
ಇದನ್ನೂ ಓದಿ:
ಮಧ್ಯವರ್ತಿಗಳ ಮೂಲಕ ಲೇಬಲ್‌ಗಳ ಸಂಗ್ರಹ
ತನಿಖೆಯ ಪ್ರಕಾರ, ಪ್ರಶಾಂತ್ ನೇರವಾಗಿ ಲೇಬಲ್‌ಗಳನ್ನು ಪಡೆಯುವ ಬದಲು ಮಧ್ಯವರ್ತಿಗಳ ನೆರವಿನಿಂದ ಟರ್ಕಿಯಿಂದ ಫಿಜರ್‌ನ ಮೂಲ ಲೇಬಲ್‌ಗಳನ್ನು ತರಿಸಿಕೊಳ್ಳುತ್ತಿದ್ದ ಎನ್ನಲಾಗಿದೆ. ಬಳಿಕ ಈ ನೈಜ ಲೇಬಲ್‌ಗಳನ್ನು ನಕಲಿ ಔಷಧಗಳ ಪ್ಯಾಕೆಟ್‌ಗಳಿಗೆ ಅಂಟಿಸಿ, ಅವುಗಳನ್ನು ಅಸಲಿ ಉತ್ಪನ್ನಗಳಂತೆ ಮಾರುಕಟ್ಟೆಗೆ ಕಳುಹಿಸಲಾಗುತ್ತಿತ್ತು ಎಂದು ಅಧಿಕಾರಿಗಳು ಶಂಕಿಸಿದ್ದಾರೆ.
ಅಸಲಿ ಮತ್ತು ನಕಲಿ ಔಷಧಗಳ ಮಿಶ್ರಣ
ಇದಕ್ಕಿಂತಲೂ ಆಘಾತಕಾರಿ ಅಂಶವೆಂದರೆ, ಕೆಲವು ಸಂದರ್ಭಗಳಲ್ಲಿ ಒಂದೇ ಸರಕಿನಲ್ಲಿ ಅಸಲಿ ಮತ್ತು ನಕಲಿ ಔಷಧಗಳನ್ನು ಮಿಶ್ರಣ ಮಾಡಿ ಪೂರೈಕೆ ಮಾಡಲಾಗುತ್ತಿತ್ತು ಎನ್ನುವುದು ತನಿಖೆಯಲ್ಲಿ ಪತ್ತೆಯಾಗಿದೆ. ಈ ಮೂಲಕ ಗ್ರಾಹಕರು ಮತ್ತು ವಿತರಕರಿಗೆ ಉತ್ಪನ್ನದ ನೈಜತೆಯನ್ನು ಗುರುತಿಸುವುದು ಮತ್ತಷ್ಟು ಕಷ್ಟವಾಗುತ್ತಿತ್ತು ಎನ್ನಲಾಗಿದೆ.
ಪ್ರಕರಣದಲ್ಲಿ ವೀರೇಶ್ ಜೈನ್ ಕೂಡ ಪ್ರಮುಖ ಆರೋಪಿಯಾಗಿದ್ದು, ನಕಲಿ ಔಷಧಗಳ ಉತ್ಪಾದನೆ ಮತ್ತು ಪೂರೈಕೆ ಜಾಲದಲ್ಲಿ ಪಾತ್ರ ವಹಿಸಿದ್ದಾನೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಬೆಂಗಳೂರಿನ ಆಸ್ಪತ್ರೆಗಳು ಮತ್ತು ಔಷಧ ಅಂಗಡಿಗಳಿಗೆ ನಕಲಿ ಔಷಧಗಳನ್ನು ಪೂರೈಸಿದ ಆರೋಪವೂ ಆತನ ಮೇಲಿದೆ.
