ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ದೇಶದಲ್ಲಿ ಆರೋಗ್ಯಕರ ಜೀವನಶೈಲಿ ಮತ್ತು ನೈರ್ಮಲ್ಯವನ್ನು ಉತ್ತೇಜಿಸುವ ಉದ್ದೇಶದಿಂದ ನವದೆಹಲಿಯ ಕನಾಟ್ ಪ್ಲೇಸ್‌ನಲ್ಲಿ ‘ಫಿಟ್ ಇಂಡಿಯಾ ಸಂಡೇಸ್ ಆನ್ ಸೈಕಲ್’ ಕಾರ್ಯಕ್ರಮದ 93ನೇ ಆವೃತ್ತಿಯನ್ನು ಆಯೋಜಿಸಲಾಗಿತ್ತು. ರಾಹಗಿರಿ ಫೌಂಡೇಶನ್ ಸಹಯೋಗದೊಂದಿಗೆ ಹಮ್ಮಿಕೊಂಡಿದ್ದ ಈ ವಿಶೇಷ ಕಾರ್ಯಕ್ರಮದಲ್ಲಿ ಸಾವಿರಕ್ಕೂ ಹೆಚ್ಚು ಕ್ರೀಡಾಸಕ್ತರು ಹಾಗೂ ನಾಗರಿಕರು ಉತ್ಸಾಹದಿಂದ ಭಾಗವಹಿಸಿದ್ದರು.
ಏಷ್ಯನ್ ಗೇಮ್ಸ್ ವಿಜೇತರಿಗೆ ಗೌರವ
ಇತ್ತೀಚೆಗಷ್ಟೇ ಮುಕ್ತಾಯಗೊಂಡ 2026ರ ಐಚಿ-ನಗೋಯಾ ಏಷ್ಯನ್ ಗೇಮ್ಸ್‌ನಲ್ಲಿ ದೇಶಕ್ಕೆ ಕೀರ್ತಿ ತಂದ ಭಾರತೀಯ ಪದಕ ವಿಜೇತ ಕ್ರೀಡಾಪಟುಗಳನ್ನು ಈ ವೇದಿಕೆಯಲ್ಲಿ ಸನ್ಮಾನಿಸಲಾಯಿತು. ಭಾರತದ ಮೊದಲ ಏಷ್ಯನ್ ಗೇಮ್ಸ್ ಎಂಎಂಎ (MMA) ಪದಕ ವಿಜೇತೆ ಸುಚಿಕಾ ತರಿಯಾಲ್ ಹೂಡಾ, ಸಾಫ್ಟ್ ಟೆನ್ನಿಸ್‌ನಲ್ಲಿ ಐತಿಹಾಸಿಕ ಪದಕ ಗೆದ್ದ ಜಯ್ ಮೀನಾ ಮತ್ತು ವುಶು ಬೆಳ್ಳಿ ಪದಕ ವಿಜೇತೆ ನೌರೆಮ್ ರೋಶಿಬಿನಾ ದೇವಿ ಅವರನ್ನು ಗೌರವಿಸಲಾಯಿತು.
ಮಾದಕ ಮುಕ್ತ ಭಾರತದ ಸಂಕಲ್ಪ
ಗಾಂಧಿ ಜಯಂತಿಯ ಬೆನ್ನಲ್ಲೇ ನಡೆದ ಈ ಕಾರ್ಯಕ್ರಮದಲ್ಲಿ ಸ್ವಚ್ಛತೆ ಹಾಗೂ ನಾಗರಿಕ ಜವಾಬ್ದಾರಿಯ ಸಂದೇಶವನ್ನು ಸಾರಲಾಯಿತು. ಭಾಗವಹಿಸಿದ್ದ ನೂರಾರು ಯುವಕರು ವ್ಯಸನ ಮುಕ್ತ ಬದುಕಿಗಾಗಿ ‘ನಶಾ ಮುಕ್ತ್ ಭಾರತ್’ ಪ್ರತಿಜ್ಞೆ ಸ್ವೀಕರಿಸಿದರು. ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದ ದೆಹಲಿ ಸಚಿವ ಆಶಿಶ್ ಸೂದ್ ಮಾತನಾಡಿ, ‘ಸ್ವಚ್ಛ ಭಾರತವು ಜನರ ಆಂದೋಲನವಾಗಿದ್ದು, ಸಾರ್ವಜನಿಕರು ಜವಾಬ್ದಾರಿ ತಗೆದುಕೊಂಡಾಗ ಮಾತ್ರ ಆರೋಗ್ಯಕರ ಸಮಾಜ ನಿರ್ಮಾಣ ಸಾಧ್ಯ’ ಎಂದರು.
ಇದನ್ನೂ ಓದಿ:
ಸೈಕ್ಲಿಂಗ್ ಜಾಗೃತಿ
ಬೆಳಗ್ಗೆ 5:30ಕ್ಕೇ ಆರಂಭವಾದ ಈ ಫಿಟ್ನೆಸ್ ಹಬ್ಬದಲ್ಲಿ ಸಾರ್ವಜನಿಕರು ಯೋಗ, ಜುಂಬಾ ನೃತ್ಯ, ರೋಪ್ ಸ್ಕಿಪ್ಪಿಂಗ್ ಹಾಗೂ 5 ಕಿ.ಮೀ. ಓಟ ಮತ್ತು ಸೈಕ್ಲಿಂಗ್‌ನಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡರು. ಇದರೊಂದಿಗೆ ಕ್ಯಾರಂ, ಚೆಸ್, ಬ್ಯಾಡ್ಮಿಂಟನ್ ಹಾಗೂ ಹಗ್ಗಜಗ್ಗಾಟದಂತಹ ಕ್ರೀಡೆಗಳು ಆಯೋಜಿಸಲಾಗಿತ್ತು. ಕೇಂದ್ರ ಯುವಜನ ವ್ಯವಹಾರ ಮತ್ತು ಕ್ರೀಡಾ ಸಚಿವಾಲಯದ ವತಿಯಿಂದ ದೇಶಾದ್ಯಂತ ಪ್ರತಿ ವಾರ ಇಂತಹ ಸೈಕ್ಲಿಂಗ್ ಜಾಗೃತಿಯನ್ನು ಯಶಸ್ವಿಯಾಗಿ ನಡೆಸಲಾಗುತ್ತಿದೆ.
