ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕೇರಳ ರಾಜಕಾರಣದಲ್ಲಿ ಮದ್ಯದ ತೆರಿಗೆ ವಿಚಾರವಾಗಿ ಭಾರಿ ರಾಜಕೀಯ ಬಿಕ್ಕಟ್ಟು ಸೃಷ್ಟಿಯಾಗಿದೆ. ಯುಡಿಎಫ್ ಸರ್ಕಾರವು ತನ್ನ ಮೊದಲ ಬಜೆಟ್ನಲ್ಲಿ ಕಡಿಮೆ ಆಲ್ಕೋಹಾಲ್ ಹೊಂದಿರುವ ಪಾನೀಯಗಳ ಮೇಲಿನ ತೆರಿಗೆಯನ್ನು ಭಾರಿ ಪ್ರಮಾಣದಲ್ಲಿ ಇಳಿಕೆ ಮಾಡಿರುವುದನ್ನು ವಿರೋಧ ಪಕ್ಷದ ನಾಯಕ ಪಿಣರಾಯಿ ವಿಜಯನ್ ಕಟುವಾಗಿ ಟೀಕಿಸಿದ್ದಾರೆ. ಈ ನಿರ್ಧಾರವು ಕೇವಲ ಖಾಸಗಿ ಮದ್ಯದ ದಂಧೆಕೋರರಿಗೆ ನೆರವಾಗಲು ಮಾಡಿರುವ ಯೋಜಿತ ಸಂಚು ಎಂದು ಅವರು ಆರೋಪಿಸಿದ್ದಾರೆ.
ತೆರಿಗೆಯಲ್ಲಿ ಭಾರಿ ಕಡಿತ
ಕಡಿಮೆ ಆಲ್ಕೋಹಾಲ್ ಹೊಂದಿರುವ ಪಾನೀಯಗಳ ಮೇಲಿನ ತೆರಿಗೆಯನ್ನು ಶೇಕಡಾ 251% ರಿಂದ 120% ಕ್ಕೆ ಇಳಿಸಲಾಗಿದೆ. ಈ ತೆರಿಗೆ ವಿನಾಯಿತಿಯಿಂದ ಕೇರಳದ ರೈತರಿಗಾಗಲಿ ಅಥವಾ ಗ್ರಾಹಕರಿಗಾಗಲಿ ಯಾವುದೇ ಲಾಭವಿಲ್ಲ, ಬದಲಿಗೆ ನೆರೆಯ ಕರ್ನಾಟಕದ ಮದ್ಯದ ಕಂಪನಿಗಳಿಗೆ ಇದರಿಂದ ಭಾರಿ ಲಾಭವಾಗಲಿದೆ ಎಂದು ವಿಜಯನ್ ದೂರಿದ್ದಾರೆ.
ಸಂಬಂಧಪಟ್ಟ ಇಲಾಖೆಗಳು ಅಥವಾ ಸಚಿವ ಸಂಪುಟದೊಂದಿಗೆ ಯಾವುದೇ ಸೂಕ್ತ ಸಮಾಲೋಚನೆ ನಡೆಸದೆ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಈ ಪ್ರಸ್ತಾವನೆಯನ್ನು ಆತುರವಾಗಿ ಹಣಕಾಸು ವಿಧೇಯಕದಲ್ಲಿ ಸೇರಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ಸಾರ್ವಜನಿಕ ಆರೋಗ್ಯಕ್ಕೆ ಕಂಟಕ
ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮದ ಪೋಸ್ಟ್ನಲ್ಲಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿರುವ ಪಿಣರಾಯಿ ವಿಜಯನ್, “ಸರ್ಕಾರಗಳು ಸಾಮಾನ್ಯವಾಗಿ ಮದ್ಯದ ಬಳಕೆಯನ್ನು ಕಡಿಮೆ ಮಾಡಲು ತೆರಿಗೆಯನ್ನು ಹೆಚ್ಚಿಸುತ್ತವೆ. ಆದರೆ ಇಲ್ಲಿ ಮದ್ಯದ ಬೆಲೆಯನ್ನು ಅಗ್ಗವಾಗಿಸಿ, ಜನರು ಹೆಚ್ಚು ಮದ್ಯ ಸೇವಿಸುವಂತೆ ಪ್ರೇರೇಪಿಸಲಾಗುತ್ತಿದೆ. ಈ ಹಿಂದೆ ಎಲ್ಡಿಎಫ್ ಸರ್ಕಾರವು ಸ್ಥಳೀಯ ರೈತರನ್ನು ಬೆಂಬಲಿಸಲು ಹಲಸಿನ ಹಣ್ಣು ಮತ್ತು ಗೋಡಂಬಿ ಹಣ್ಣುಗಳಿಂದ ತಯಾರಿಸುವ ಕಡಿಮೆ ಆಲ್ಕೋಹಾಲ್ ಪಾನೀಯಗಳನ್ನು ಉತ್ತೇಜಿಸಲು ಯೋಚಿಸಿತ್ತು. ಆದರೆ ಇಂದಿನ ಸರ್ಕಾರವು ಸ್ಪಿರಿಟ್ ಆಧಾರಿತ ರೆಡಿ-ಟು-ಡ್ರಿಂಕ್ ಪಾನೀಯ ಕಂಪನಿಗಳಿಗೆ ರತ್ನಗಂಬಳಿ ಹಾಸಿದೆ,” ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ:
ಟೀಮ್ ಯುಡಿಎಫ್’ ಈಗ ಮದ್ಯದ ಕಂಪನಿಗಳ ಮೈತ್ರಿಕೂಟ!
ಚುನಾವಣಾ ಸಮಯದಲ್ಲಿ ಜನರ ಮುಂದೆ ಪ್ರಸ್ತಾಪಿಸಲಾಗಿದ್ದ ‘ಟೀಮ್ ಯುಡಿಎಫ್’ಎಂಬ ಪರಿಕಲ್ಪನೆ ಈಗ ಎಲ್ಲೂ ಕೇಳಿಬರುತ್ತಿಲ್ಲ. ಇಂದು ಕರಾವಳಿ ವಲಯವನ್ನು ನಿಯಂತ್ರಿಸಲು ಹವಣಿಸುತ್ತಿರುವ ದೊಡ್ಡ ಮದ್ಯದ ಕಂಪನಿಗಳು ಮತ್ತು ಏಕಸ್ವಾಮ್ಯದ ಹಿತಾಸಕ್ತಿಗಳೇ ಯುಡಿಎಫ್ನ ಹೊಸ ಮಿತ್ರರಾಗಿದ್ದಾರೆ ಎಂದು ವಿಜಯನ್ ವ್ಯಂಗ್ಯವಾಡಿದ್ದಾರೆ. ಈ ಹಣಕಾಸು ವಿಧೇಯಕವು ವಿಧಾನಸಭೆಯಲ್ಲಿ ಅಂಗೀಕಾರವಾದರೆ ಇದು ಕಾನೂನಾಗಿ ಬದಲಾಗಲಿದ್ದು, ಇದನ್ನು ಹಿಂಪಡೆಯಲು ಸಾಧ್ಯವಿಲ್ಲದ ಕಾರಣ ಸರ್ಕಾರ ತಕ್ಷಣವೇ ಈ ಪ್ರಸ್ತಾವನೆಯನ್ನು ಕೈಬಿಡಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
