ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಲಕ್ಷಾಂತರ ಶಿವಭಕ್ತರು ಕಾತರದಿಂದ ಕಾಯುತ್ತಿದ್ದ ಪವಿತ್ರ ಅಮರನಾಥ ಯಾತ್ರೆಗೆ ದಿನಗಣನೆ ಆರಂಭವಾಗಿದೆ. ಜುಲೈ 3ರಿಂದ ಆಗಸ್ಟ್ 28ರವರೆಗೆ ಈ ಪುಣ್ಯಯಾತ್ರೆ ನಡೆಯಲಿದೆ. ಜ್ಯೇಷ್ಠ ಪೌರ್ಣಮಿಯ ಶುಭ ಸಂದರ್ಭದಲ್ಲಿ ಜಮ್ಮು-ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಅವರು ಸಾಂಪ್ರದಾಯಿಕ ಪ್ರಥಮ ಪೂಜೆ ನೆರವೇರಿಸಿ ಚಾಲನೆ ನೀಡಿದ್ದಾರೆ. ದುರ್ಗಮ ಹಿಮಾಲಯದ ಹವಾಮಾನವು ಕ್ಷಣಕ್ಷಣಕ್ಕೂ ಬದಲಾಗುವುದರಿಂದ, ಯಾತ್ರೆಗೆ ಹೊರಡುವ ಮುನ್ನ ಅಗತ್ಯ ಮುನ್ನೆಚ್ಚರಿಕೆ ವಹಿಸುವುದು ಅತ್ಯಗತ್ಯ.
ಬ್ಯಾಗ್ನಲ್ಲಿರಲಿ ಬೆಚ್ಚಗಿನ ಉಡುಪುಗಳು
ಅಮರನಾಥದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ತಾಪಮಾನವು ಹಠಾತ್ ಕುಸಿಯುತ್ತದೆ. ಹೀಗಾಗಿ ನಿಮ್ಮ ಪ್ರಯಾಣದ ಬ್ಯಾಗ್ನಲ್ಲಿ ಇವು ತಪ್ಪದೇ ಇರಲಿ:
- ಥರ್ಮಲ್ ಇನರ್ಸ್, ಉಣ್ಣೆ ಸ್ವೆಟರ್ ಹಾಗೂ ಕೈಗವಸುಗಳು.
- ಜಲನಿರೋಧಕ (Waterproof) ಅಥವಾ ವಿಂಡ್ ಬ್ರೇಕರ್ ಜಾಕೆಟ್.
- ಉಣ್ಣೆಯ ಟೋಪಿ, ಮಫ್ಲರ್, ಹೆಚ್ಚುವರಿ ಸಾಕ್ಸ್ ಹಾಗೂ ರೇನ್ಕೋಟ್.
ಆರೋಗ್ಯ ಮತ್ತು ಅಗತ್ಯ ಔಷಧಿಗಳು
ಬಿಪಿ, ಮಧುಮೇಹ ಅಥವಾ ಆಸ್ತಮಾದಂತಹ ದೀರ್ಘಕಾಲದ ಕಾಯಿಲೆ ಇರುವವರು ಸಾಕಷ್ಟು ಬ್ಯಾಕಪ್ ಮಾತ್ರೆಗಳನ್ನು ಕೊಂಡೊಯ್ಯಬೇಕು. ಇದರೊಂದಿಗೆ ಪ್ರಥಮ ಚಿಕಿತ್ಸಾ ಕಿಟ್ನಲ್ಲಿ ಜ್ವರ, ಮೈಕೈ ನೋವು, ವಾಂತಿ ನಿವಾರಕ ಮಾತ್ರೆಗಳು ಹಾಗೂ ಗಾಯಗಳಿಗೆ ಬಳಸುವ ಮುಲಾಮುಗಳನ್ನು ಇಟ್ಟುಕೊಳ್ಳಿ.
ಕಡ್ಡಾಯವಾಗಿ ಬೇಕಾಗುವ ದಾಖಲೆಗಳು
ಪ್ರಯಾಣದ ವೇಳೆ ಯಾವುದೇ ತೊಂದರೆಯಾಗದಂತೆ ಕೆಳಗಿನ ದಾಖಲೆಗಳ ಹಾರ್ಡ್ ಕಾಪಿ ಮತ್ತು ಮೊಬೈಲ್ನಲ್ಲಿ ಡಿಜಿಟಲ್ ಪ್ರತಿಗಳನ್ನು ಸುರಕ್ಷಿತವಾಗಿಡಿ:
- ಯಾತ್ರಾ ನೋಂದಣಿ ಚೀಟಿ.
- ಕಡ್ಡಾಯ ಆರೋಗ್ಯ ಪ್ರಮಾಣಪತ್ರ.
- ಆಧಾರ್ ಕಾರ್ಡ್ ಅಥವಾ ಸರ್ಕಾರಿ ಫೋಟೋ ಗುರುತಿನ ಚೀಟಿ.
- ತುರ್ತು ಸಂಪರ್ಕ ಸಂಖ್ಯೆಗಳ ಪಟ್ಟಿ.
