ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:
ಪಹಲ್ಗಾಮ್‌ನಲ್ಲಿ ನಡೆದ ಭೀಕರ ದಾಳಿಯಲ್ಲಿ ಅನ್ಯಾಯವಾಗಿ ಪ್ರವಾಸಿಗರು ಪ್ರಾಣಕಳೆದುಕೊಂಡಿದ್ದಾರೆ. ಪಹಲ್ಗಾಮ್ ಬಿಟ್ಟು ಜಮ್ಮು ಕಾಶ್ಮೀರದ ಬೇರೆ ಭಾಗದಲ್ಲಿದ್ದ ಪ್ರವಾಸಿಗರು ಕೂಡ ನಿಂತಲ್ಲೇ ನಡುಗಿಹೋಗಿದ್ದಾರೆ. ನಮ್ಮೂರಿಗೆ ಜೀವಂತವಾಗಿ ವಾಪಾಸಾದರೆ ಸಾಕು ಎಂದು ಭಗವಂತನನ್ನು ಪ್ರಾರ್ಥಿಸಿದ್ದಾರೆ.
ಅಲ್ಲಿಯೇ ಇದ್ದು ಪ್ರಾಣ ಉಳಿಸಿಕೊಂಡವರು ತಮ್ಮ ಕರಾಳ ಅನುಭವವನ್ನು ಬಿಚ್ಚಿಟ್ಟಿದ್ದಾರೆ. ಕಾಶ್ಮೀರಿ ವಾಹನ ಚಾಲಕರಿಂದಾಗಿ ನಮ್ಮ ಜೀವ ಉಳಿದಿದೆ ಎಂದಿದ್ದಾರೆ.
ನಾವೆಲ್ಲರೂ ಪಹಲ್ಗಾಮ್‌ಗೆ ಹೊರಡಲು ಸಿದ್ಧರಾಗಿದ್ದಾಗ, ಸಂಬಂಧಿಕರೊಬ್ಬರು ನನಗೆ ಕರೆ ಮಾಡಿ ಅಲ್ಲಿ ನಡೆದ ಭಯೋತ್ಪಾದಕ ದಾಳಿಯ ಬಗ್ಗೆ ಮಾಹಿತಿ ನೀಡಿದರು, ಈ ವೇಳೆ ನಾವು ನಮ್ಮ ಚಾಲಕನನ್ನು ಮಾತ್ರ ಸಂಪರ್ಕಿಸಲು ಸಾಧ್ಯವಾಯಿತು, ಅವರು ಕೆಲವೇ ಗಂಟೆಗಳಲ್ಲಿ ಗುಲ್ಮಾರ್ಗ್‌ನಲ್ಲಿರುವ ನಮ್ಮ ಹೋಟೆಲ್‌ನಿಂದ ಶ್ರೀನಗರದಲ್ಲಿರುವ ಅವರ ನಿವಾಸಕ್ಕೆ ನಮ್ಮನ್ನು ಕರೆದೊಯ್ಯುವ ಮೂಲಕ ನಮ್ಮ ಸುರಕ್ಷಿತವಾಗಿರಿಸಿದರು ಎಂದು ಅಂತರರಾಷ್ಟ್ರೀಯ ಬ್ಯಾಂಕಿನಲ್ಲಿ ಕೆಲಸ ಮಾಡುವ ಬೆಂಗಳೂರಿನ ಪ್ರವಾಸಿ ಪೂಜಾ ಮಾನೆ ವಿವರಿಸಿದ್ದಾರೆ.
ದಾಳಿ ನಡೆದಾಗ ನಾವು ಪಹಲ್ಗಾಮ್ ತೊರೆದಿದ್ದೆವು. ಭಯೋತ್ಪಾದಕರು ಸೇನಾ ಸಮವಸ್ತ್ರ ಧರಿಸಿದ್ದರಿಂದ, ಹೆಚ್ಚಿನ ಜನರು ಇದು ಮಿಲಿಟರಿ ಕವಾಯತು ಎಂದು ಭಾವಿಸಿದ್ದರು. ಇದು ಭಯೋತ್ಪಾದಕ ದಾಳಿ ಎಂದು ಯಾರಿಗೂ ತಿಳಿದಿರಲಿಲ್ಲ ಎಂದು ಅವರು ಮತ್ತೊಬ್ಬ ಪ್ರವಾಸಿ ನಮ್ರತಾ ಹೇಳಿದರು. ಮಧ್ಯಾಹ್ನ 2.45 ರ ಸುಮಾರಿಗೆ ಈ ಘಟನೆ ನಡೆಯಿತು.
ಈ ಪ್ರದೇಶದಲ್ಲಿ ಇಂಟರ್ನೆಟ್ ಸಂಪರ್ಕ ಕಳಪೆಯಾಗಿರುವುದರಿಂದ ಹೆಚ್ಚಿನ ಪ್ರವಾಸಿಗರನ್ನು ತಕ್ಷಣವೇ ತಲುಪಲು ಸಾಧ್ಯವಾಗಲಿಲ್ಲ ಸಂಜೆಯ ನಂತರ ಮಿಲಿಟರಿ ತಪಾಸಣೆಗಳನ್ನು ತೀವ್ರಗೊಳಿಸುವುದು ಮತ್ತು ಕರ್ಫ್ಯೂ ವಿಧಿಸುವುದನ್ನು ನಾವು ನೋಡಿದಾಗ, ಏನೋ ಗಂಭೀರವಾದ ಘಟನೆ ನಡೆದಿದೆ ಎಂದು ನಮಗೆ ಅರಿವಾಯಿತು ಎಂದು ಅವರು ಹೇಳಿದರು. ಕಾಶ್ಮೀರಿ ಜನರು, ಸ್ಥಳೀಯರು ನಮ್ಮನ್ನು ಚೆಕ್‌ಪೋಸ್ಟ್‌ವರೆಗೂ ಬಿಟ್ಟರು. ಅವರನ್ನು ಯಾವಾಗಲೂ ನೆನೆಪಿನಲ್ಲಿಯೇ ಇಟ್ಟುಕೊಳ್ಳುತ್ತೇವೆ. ಸಹಾಯ ಮಾಡಿದ ಪ್ರತಿಯೊಬ್ಬರಿಗೂ ಒಳ್ಳೆಯದಾಗಲಿ ಎಂದು ಪ್ರವಾಸಿಗರು ಹೇಳಿದ್ದಾರೆ.
