ಶ್ರೇಯಸ್, ಧವನ್, ಶುಬ್ಮನ್ ಗಿಲ್ ಅಬ್ಬರ: ಕಿವೀಸ್‌ ವಿರುದ್ಧ ಬೃಹತ್‌ ಮೊತ್ತ ಕಲೆಹಾಕಿದ ಟೀಂ ಇಂಡಿಯಾ!

ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌
ಆಕ್ಲೆಂಡ್​ನ ಈಡೆನ್ ಪಾರ್ಕ್ ಮೈದಾನದಲ್ಲಿ ಆತಿಥೇಯ ನ್ಯೂಜಿಲೆಂಡ್ ವಿರುದ್ಧ ನಡೆಯುತ್ತಿರುವ ಮೊದಲ ಏಕದಿನ ಪಂದ್ಯದಲ್ಲಿ ನಾಯಕ ಶಿಖರ್ ಧವನ್, ಶುಭ್​ಮನ್ ಗಿಲ್ ಹಾಗೂ ಶ್ರೇಯಸ್ ಅಯ್ಯರ್ ಅವರ ಅಬ್ಬರದ  ಆಟದ ಬಲದಿಂದ ಟೀಮ್ ಇಂಡಿಯಾ ನಿಗದಿತ 50 ಓವರ್​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 306 ರನ್ ಗಳ ಬೃಹತ್‌ ಮೊತ್ತ ಕಲೆಹಾಕಿದೆ.
ಟಾಸ್ ಸೋತು ಬ್ಯಾಟಿಂಗ್​ಗೆ ಇಳಿದ ಭಾರತ ಆರಂಭಿಕ ಜೋಡಿ ಪರ ಧವನ್ ಹಾಗೂ ಗಿಲ್ ಉತ್ತಮ ಆಟ ಪ್ರದರ್ಶಿಸಿದರು. ಈ ಜೋಡಿ ಮೊದಲ ವಿಕೆಟ್​ಗೆ 23.1 ಓವರ್​ಗಳಲ್ಲಿ 124 ರನ್ ಕಲೆಹಾಕಿತು. ಗಿಲ್ 65 ಎಸೆತಗಳಲ್ಲಿ 1 ಫೋರ್, 3 ಸಿಕ್ಸರ್​​ನೊಂದಿಗೆ 50 ರನ್ ಗಳಿಸಿದರೆ, ಶಿಖರ್ 77 ಎಸೆತಗಳಲ್ಲಿ 13 ವಬೌಂಡರಿಗಳಿದ್ದ 72 ರನ್‌ ಕಲೆಹಾಕಿ ಔಟಾದರು.  15 ರನ್ ಗಳಿಸಿ ಔಟಾಗುವ ಮೂಲಕ ಪಂತ್ ಪಂತ್ ಮತ್ತೊಮ್ಮೆ ವೈಫಲ್ಯ ಅನುಭವಿಸಿದರು.  ಸೂರ್ಯಕುಮಾರ್ ಯಾದವ್ (4 ರನ್) ಬ್ಯಾಟ್‌ ಇಂದು ಅಬ್ಬರಿಸಲಿಲ್ಲ.
ಈ ಹಂತದಲ್ಲಿ ತಂಡವನ್ನು ಆಧರಿಸಿದ ಶ್ರೇಯಸ್ ಅಯ್ಯರ್ 76 ಎಸೆತಗಳಲ್ಲಿ 4 ಫೋರ್, 4 ಸಿಕ್ಸರ್​ ಗಳಿದ್ದ ಭರ್ಜರಿ 80 ರನ್ ಸಿಡಿಸಿ ತಂಡಕ್ಕೆ ನೆರವಾದರು. ಇವರಿಗೆ ಮುತ್ತಮ ಸಾಥ್‌ ನೀಡಿದ ಸಂಜು 38 ಎಸೆತಗಳಲ್ಲಿ 36 ರನ್ ಗಳಿಸಿದರು. ಕೊನೆಯಲ್ಲಿ ಆರ್ಭಟಿಸಿದ ವಾಷಿಂಗ್ಟನ್ ಸುಂದರ್ ಕೇವಲ 16 ಎಸೆತಗಳಲ್ಲಿ 3 ಫೋರ್, 3 ಸಿಕ್ಸರ್​ನೊಂದಿಗೆ 37 ರನ್​ ಸಿಡಿಸಿ ತಂಡವನ್ನು 300 ರ ಗಡಿ ಮುಟ್ಟಿಸಿದರು. ನ್ಯೂಜಿಲೆಂಡ್ ಪರ ಲೂಕಿ ಫರ್ಗುಸನ್ 59 ರನ್ ನೀಡಿ 3 ವಿಕೆಟ್ ಕಬಳಿಸಿದರು. ಟಿಮ್ ಸೌಥಿ 2 ಹಾಗೂ ಆ್ಯಡಂ ಮಿಲ್ನೆ 1 ವಿಕೆಟ್ ಗಳಿಸಿದರು.