ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಸುಡಾನ್ ದೇಶ ಮಿಲಿಟರಿ ಬಣಗಳ ನಡುವಿನ ಸಂಘರ್ಷದಿಂದ ನಲುಗುತ್ತಿದೆ. ದೇಶದಲ್ಲಿ ಸೇನೆ ಮತ್ತು ಅರೆಸೇನಾ ಗುಂಪುಗಳ ನಡುವೆ ತೀವ್ರ ಸಂಘರ್ಷ 12 ವಾರಗಳಿಂದ ನಡೆಯುತ್ತಿದೆ. ಈ ಎರಡು ಬಣಗಳ ಮುಖಂಡರ ನಡುವಿನ ಕಾಳಗ ಇಡೀ ದೇಶವನ್ನೇ ತತ್ತರಿಸುವಂತೆ ಮಾಡಿದೆ. ಪಶ್ಚಿಮ ಒಮ್ದುರ್ಮನ್ ಮೇಲೆ ಸುಡಾನ್ ಸೇನೆಯ ಇತ್ತೀಚಿನ ವಾಯುದಾಳಿಯಲ್ಲಿ ಕನಿಷ್ಠ 22 ಜನರು ಸಾವನ್ನಪ್ಪಿದ್ದು, ಅನೇಕ ಜನರು ಗಾಯಗೊಂಡಿದ್ದಾರೆ. ಅರೆಸೈನಿಕ ಪಡೆಗಳು ಏಪ್ರಿಲ್‌ನಲ್ಲಿ ರಾಜಧಾನಿ ಖಾರ್ಟೂಮ್‌ನ ಅವಳಿ ನಗರಗಳಾದ ಒಮ್ದುರ್ಮನ್ ಮತ್ತು ಬಹ್ರಿಯಲ್ಲಿ ಹೋರಾಟದಲ್ಲಿ ಪ್ರಾಬಲ್ಯ ಸಾಧಿಸಿದವು. ಈ ಹಿನ್ನೆಲೆಯಲ್ಲಿ ಸೇನೆ ಹೊಸದಾಗಿ ವಾಯುದಾಳಿ ನಡೆಸಿದೆ.
ಆದರೆ ಈ ಬಿಕ್ಕಟ್ಟನ್ನು ತಪ್ಪಿಸಲು ಹಲವು ದೇಶಗಳು ಮಧ್ಯಸ್ಥಿಕೆ ಪ್ರಯತ್ನಗಳನ್ನು ಪ್ರಾರಂಭಿಸಿದರೂ ಅದು ಅಂತ್ಯಗೊಂಡಿಲ್ಲ. ದೇಶವು ಆಳವಾದ ಅಂತರ್ಯುದ್ಧದತ್ತ ಸಾಗುತ್ತಿದೆ. ಪ್ರಜಾಪ್ರಭುತ್ವವನ್ನು ಮರುಸ್ಥಾಪಿಸುವ ಪ್ರಯತ್ನಗಳ ಭಾಗವಾಗಿ ಅರೆಸೇನಾಪಡೆ ಮತ್ತು ಸೇನೆಯ ಏಕೀಕರಣದಿಂದ ಬಿಕ್ಕಟ್ಟು ಉಂಟಾಗಿದೆ. ಈ ಘರ್ಷಣೆಗಳಲ್ಲಿ ಇದುವರೆಗೆ ಕನಿಷ್ಠ 1,133 ಜನರು ಸಾವನ್ನಪ್ಪಿದ್ದಾರೆ. ರಾಜಧಾನಿಯ ಜೊತೆಗೆ, ಕೊರ್ಡೋಫಾನ್ ಮತ್ತು ಡಾರ್ಫರ್ ಪ್ರದೇಶಗಳಲ್ಲಿಯೂ ಘರ್ಷಣೆಗಳು ಭುಗಿಲೆದ್ದವು. ರಾಜಧಾನಿಯೊಂದಿಗೆ 7 ಲಕ್ಷ ಜನರು ಎಲ್ಲಾ ಪ್ರದೇಶಗಳಿಂದ ನೆರೆಯ ದೇಶಗಳಿಗೆ ವಲಸೆ ಹೋಗಿದ್ದಾರೆ.
ಸೇನಾ ಮುಖ್ಯಸ್ಥ ಅಬ್ದೆಲ್ ಫತ್ತಾಹ್ ಅಲ್-ಬುರ್ಹಾನ್ ಮತ್ತು ಅರೆಸೈನಿಕ ಕಮಾಂಡರ್ ಜನರಲ್ ಮೊಹಮ್ಮದ್ ಹಮ್ದಾನ್ ದಗಾಲೊ ನಡುವಿನ ತೀವ್ರ ಭಿನ್ನಾಭಿಪ್ರಾಯದಿಂದಾಗಿ ದಾಳಿಗಳು ನಡೆಯುತ್ತಿವೆ.
