Monday, September 26, 2022

Latest Posts

ಭಾರತ ಸ್ವಾತಂತ್ರ್ಯ ಅಮೃತ ಮಹೋತ್ಸವ ಪಂದ್ಯದಲ್ಲಿ ವಿಶ್ವ ದೈತ್ಯರ ವಿರುದ್ಧ ಗೆದ್ದುಬೀಗಿದ ಇಂಡಿಯಾ ಮಹಾರಾಜರು!

ಹೊಸದಿಗಂತ ಡಿಜಿಟಲ್ ಡೆಸ್ಕ್‌
ಭಾರತದ ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಅಂಗವಾಗಿ ಆಯೋಜಿಸಲಾಗಿದ್ದ ವಿಶೇಷ ಪಂದ್ಯದಲ್ಲಿ ಭಾರತದ ಮಹಾರಾಜರು ವಿಶ್ವ ದೈತ್ಯರ​ ವಿರುದ್ಧ ಭರ್ಜರಿ ಜಯ ಸಾಧಿಸಿದ್ದಾರೆ.
ಪ್ರಸ್ತುತ ನಡೆಯುತ್ತಿರುವ ಲೆಜೆಂಡ್ಸ್ ಕ್ರಿಕೆಟ್ ಲೀಗ್‌ನಲ್ಲೇ ನಡೆದ ಈ ವಿಶೇಷ ಪಂದ್ಯದಲ್ಲಿ ವರ್ಲ್ಡ್ ಜೈಂಟ್ಸ್ ತಂಡದ ನಾಯಕ ಜಾಕ್ವೆಸ್ ಕಾಲಿಸ್ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಅದರಂತೆ, ಇನ್ನಿಂಗ್ಸ್ ಆರಂಭಿಸಿದ ವರ್ಲ್ಡ್ ಜೈಂಟ್ಸ್ ತಂಡಕ್ಕೆ ಐರ್ಲೆಂಡ್ ನ ಮಾಜಿ ಆಟಗಾರ ಕೆವಿನ್ ಒ’ಬ್ರೇನ್ ಸ್ಫೋಟಕ ಆರಂಭ ಒದಗಿಸಿದರು.
ಒ’ಬ್ರೇನ್ ಕೇವಲ 31 ಎಸೆತಗಳಲ್ಲಿ 9 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 52 ರನ್ ಗಳಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ವೆಸ್ಟ್ ಇಂಡೀಸ್ ನ ಮಾಜಿ ಆಟಗಾರ ದಿನೇಶ್ ರಾಮ್ದಿನ್ 29 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 42 ರನ್ ಗಳಿಸಿದರು. ಇದರಿಂದಾಗಿ ವಿಶ್ವ ದೈತ್ಯ ತಂಡ ನಿಗದಿತ 20 ಓವರ್ ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 170 ರನ್ ಗಳಿಸಿತು. ಭಾರತ ಮಹಾರಾಜಸ್ ಪರ ಪಂಕಜ್ ಸಿಂಗ್ 4 ಓವರ್ ಗಳಲ್ಲಿ 26 ರನ್ ನೀಡಿ 5 ವಿಕೆಟ್ ಪಡೆದು ಮಿಂಚಿದರು.
171 ರನ್ ಗಳ ಬೃಹತ್ ಗುರಿ ಪಡೆದ ಭಾರತ ಮಹಾರಾಜಸ್ ಗೆ ಉತ್ತಮ ಆರಂಭ ಸಿಗಲಿಲ್ಲ. ವೀರೇಂದ್ರ ಸೆಹ್ವಾಗ್ ಕೇವಲ 4 ರನ್ ಗಳಿಸಿ ಔಟಾದರು, ನಂತರ ಪಾರ್ಥಿವ್ ಪಟೇಲ್ 18 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಮೊಹಮ್ಮದ್ ಕೈಫ್ 11 ರನ್ ಗಳಿಸಿ ಔಟಾದರು. ಈ ಹಂತದಲ್ಲಿ ಸೇರಿಕೊಂಡ ತನ್ಮಯ್ ಶ್ರೀವಾಸ್ತವ್ ಮತ್ತು ಯೂಸುಫ್ ಪಠಾಣ್ ಉತ್ತಮ ಜೊತೆಯಾಟ ತೋರಿದರು.
ನಾಲ್ಕನೇ ವಿಕೆಟ್‌ಗೆ ಯೂಸುಫ್ ಪಠಾಣ್ ಅವರೊಂದಿಗೆ 103 ರನ್‌ಗಳ ಜೊತೆಯಾಟ ನೀಡಿದ ತನ್ಮಯ್ ಶ್ರೀವಾಸ್ತವ್ 39 ಎಸೆತಗಳಲ್ಲಿ 54 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಆಗಲೇ ಗೆಲುವಿನ ಸನಿಹದಲ್ಲಿದ್ದ ಭಾರತ ಮಹಾರಾಜರ ಪರ ಯೂಸುಫ್ ಪಠಾಣ್ ತಮ್ಮ ಅಬ್ಬರದ ಬ್ಯಾಟಿಂಗ್ ಮುಂದುವರಿಸಿದರು.ಕೇವಲ 35 ಎಸೆತಗಳಲ್ಲಿ 2 ಸಿಕ್ಸರ್ ಹಾಗೂ 5 ಬೌಂಡರಿ ಸಹಿತ ಅರ್ಧಶತಕ ಪೂರೈಸಿದರು.
ಮತ್ತೊಂದೆಡೆ, ಐದನೇ ಕ್ರಮಾಂಕದಲ್ಲಿ ಬಂದ ಇರ್ಫಾನ್ ಪಠಾಣ್ ಕೇವಲ 9 ಎಸೆತಗಳಲ್ಲಿ 3 ಸಿಕ್ಸರ್ ಸೇರಿದಂತೆ 20 ರನ್ ಗಳಿಸಿದರು. ಅದರಂತೆ ಭಾರತ ಮಹಾರಾಜಾಸ್ 18.4 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 174 ರನ್ ಗಳಿಸಿ 6 ವಿಕೆಟ್ ಗಳ ಜಯ ಸಾಧಿಸಿತು. ಭಾರತ ಮಹಾರಾಜಸ್ ಪರ 5 ವಿಕೆಟ್ ಕಬಳಿಸಿದ ಪಂಕಜ್ ಸಿಂಗ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು. ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ನೆನಪಿಗಾಗಿ ಈ ಪಂದ್ಯದಲ್ಲಿ ಗೆದ್ದ ಭಾರತ ಮಹಾರಾಜಸ್ ತಂಡಕ್ಕೆ ವಿಶೇಷ ಟ್ರೋಫಿಯನ್ನು ಸಹ ನೀಡಲಾಯಿತು.

ಸಂಕ್ಷಿಪ್ತ ಸ್ಕೋರ್‌ಗಳು: 20 ಓವರುಗಳಲ್ಲಿ ವಿಶ್ವ ದೈತ್ಯರು 170/8 (ಕೆವಿನ್ ಒ’ಬ್ರಿಯಾನ್ 52, ದಿನೇಶ್ ರಾಮ್‌ದಿನ್ 42 ನಿ.; ಪಂಕಜ್ ಸಿಂಗ್ 5/26). ಭಾರತ ಮಹಾರಾಜರು 18.4 ಓವಿಗಳಲ್ಲಿ 175/4 (ತನ್ಮಯ್ ಶ್ರೀವಾಸ್ತವ 54, ಯೂಸುಫ್ ಪಠಾಣ್ 50 ನಿ.). ಮಹಾರಾಜರು 6 ವಿಕೆಟ್‌ಗಳಿಂದ ಗೆದ್ದರು.

ಭಾರತ ಮಹಾರಾಜರ ಪ್ಲೇಯಿಂಗ್ XI: ವೀರೇಂದ್ರ ಸೆಹ್ವಾಗ್, ತನ್ಮಯ್ ಶ್ರೀವಾಸ್ತವ, ಪಾರ್ಥಿವ್ ಪಟೇಲ್ (ವಿಕೆಟ್ ಕೀಪರ್), ಮೊಹಮ್ಮದ್ ಕೈಫ್, ಮನ್ವಿಂದರ್ ಬಿಸ್ಲಾ, ಇರ್ಫಾನ್ ಪಠಾಣ್, ಯೂಸುಫ್ ಪಠಾಣ್, ಹರ್ಭಜನ್ ಸಿಂಗ್ (ನಾಯಕ), ಜೋಗಿಂದರ್ ಶರ್ಮಾ, ಪಂಕಜ್ ಸಿಂಗ್, ಶ್ರೀಶಾಂತ್, ಅಶೋಕ್ ದಿಂಡಾ

ವಿಶ್ವ ದೈತ್ಯ ಆಟಗಾರರ XI: ಕೆವಿನ್ ಒ’ಬ್ರೇನ್, ಹ್ಯಾಮಿಲ್ಟನ್ ಮಸಕಡ್ಜಾ, ಜಾಕ್ವೆಸ್ ಕಾಲಿಸ್ (ನಾಯಕ), ದಿನೇಶ್ ರಾಮ್ದಿನ್ (ವಿಕೆಟ್ ಕೀಪರ್), ತಿಸಾರಾ ಪೆರೇರಾ, ತಟೆಂಡಾ ತೈಬು, ರಮೇಶ್ ಕಲುವಿತಾರಣ, ಡೇನಿಯಲ್ ವೆಟ್ಟೋರಿ, ಟಿಮ್ ಬ್ರೆಸ್ನನ್, ಮಾಂಟಿ ಪನೇಸರ್, ಫಿಡೆಲ್ ಎಡ್ವರ್ಡ್ಸ್

ಈ ಸುದ್ದಿ ಇತರರೊಂದಿಗೂ ಹಂಚಿಕೊಳ್ಳಿ

Latest Posts

Don't Miss

error: Content is protected !!