ಬಾಕ್ಸ್ ಆಫೀಸ್‌ ಲೆಕ್ಕಾಚಾರ: ಬಿಡುಗಡೆಯಾದ ಮೊದಲ ದಿನವೇ ದಾಖಲೆ ಬರೆದ ‘ರಾಮಾಯಣ’!

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಹಾಗೂ ಅದ್ಧೂರಿ ನಿರ್ಮಾಣವಾಗಿರುವ, ನಿತೀಶ್ ತಿವಾರಿ ನಿರ್ದೇಶನದ ‘ರಾಮಾಯಣ: ಪಾರ್ಟ್ 1’ ಇಂದು ವಿಶ್ವದಾದ್ಯಂತ ಅದ್ದೂರಿಯಾಗಿ ತೆರೆಗೆ ಬಂದಿದೆ. ದೀಪಾವಳಿ ಹಬ್ಬದ ಶುಭ ಸಂದರ್ಭದಲ್ಲಿ ಬಿಡುಗಡೆಯಾಗಿರುವ ಈ ಪೌರಾಣಿಕ ದೃಶ್ಯಕಾವ್ಯವು, ಮೊದಲ ದಿನವೇ ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರ ಮಹಾಪೂರವನ್ನೇ ಹರಿಸಿದೆ.

ವಿಜಯದಶಮಿಯಂದು ಆರಂಭವಾಗಿದ್ದ ಮುಂಗಡ ಟಿಕೆಟ್ ಬುಕಿಂಗ್, ವಿತರಕರು ಹಾಗೂ ಪ್ರದರ್ಶಕರ ನಡುವಿನ ಮಾತುಕತೆ ಸುಗಮವಾದ ಬಳಿಕ ಭಾರೀ ವೇಗ ಪಡೆದುಕೊಂಡಿತ್ತು. ಪರಿಣಾಮವಾಗಿ, ಸಿನಿಮಾ ಬಿಡುಗಡೆಯಾಗುವ ವೇಳೆಗೆ ವಿಶ್ವದಾದ್ಯಂತ 200 ಕೋಟಿ ಮೌಲ್ಯದ ಟಿಕೆಟ್‌ಗಳು ಮಾರಾಟವಾಗಿದ್ದವು. ಇದರಲ್ಲಿ ಭಾರತವೊಂದರಲ್ಲೇ 120 ಕೋಟಿಗೂ ಅಧಿಕ ಪ್ರಿ-ಸೇಲ್ಸ್ ಆದಾಯ ಹರಿದುಬಂದಿದ್ದು, ಮೊದಲ ದಿನದ ಆರಂಭಿಕ ಅವಧಿಯಲ್ಲೇ 45 ಕೋಟಿ ಗ್ರಾಸ್ ಕಲೆಕ್ಷನ್ ದಾಖಲಾಗಿತ್ತು.

ಸಾಲು ಸಾಲು ಹೌಸ್‌ಫುಲ್ ಪ್ರದರ್ಶನ ಕಂಡುಬಂದಿದ್ದು, ಬಿಡುಗಡೆಯಾದ ಮೊದಲ ದಿನದ ಸಂಜೆ 7 ಗಂಟೆಯ ವೇಳೆಗೆ ಭಾರತದಲ್ಲಿ ಬರಿ ನೆಟ್ ಕಲೆಕ್ಷನ್ 49.34 ಕೋಟಿಗೆ ತಲುಪಿತ್ತು. ಹಿಂದಿ ಆವೃತ್ತಿಯಲ್ಲಿ ಅತ್ಯುತ್ತಮ ಪ್ರದರ್ಶನ ಕಂಡರೆ, ತೆಲುಗಿನಲ್ಲೂ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ. ರಾವಣನಾಗಿ ಕನ್ನಡಿಗರ ಹೆಮ್ಮೆಯ ನಟ ‘ರಾಕಿಂಗ್ ಸ್ಟಾರ್’ ಯಶ್ ಅಭಿನಯಿಸಿದ್ದರೂ, ಕನ್ನಡ ಆವೃತ್ತಿಯು 5.67 ಕೋಟಿಗಳಷ್ಟು ಸಾಧಾರಣ ಕಲೆಕ್ಷನ್‌ನೊಂದಿಗೆ ಶುರುಮಾಡಿದೆ. ಇನ್ನು ತಮಿಳು ಮತ್ತು ಮಲಯಾಳಂ ಆವೃತ್ತಿಗಳು ಸಾಧಾರಣ ಮಟ್ಟದಲ್ಲಿ ಸಾಗಿವೆ.

ಚಿತ್ರವು ಮೊದಲ ದಿನವೇ 70 ಕೋಟಿ ನೆಟ್ ಕಲೆಕ್ಷನ್ ಗಡಿ ದಾಟುವುದು ಖಚಿತವಾಗಿದ್ದು, ‘ಪಠಾಣ್’ (57 ಕೋಟಿ), ‘ಅನಿಮಲ್’ (63 ಕೋಟಿ), ‘ದೃಶ್ಯಂ 2’ (62 ಕೋಟಿ) ಹಾಗೂ ಶಾರುಖ್ ಖಾನ್ ಅವರ ‘ಜವಾನ್’ (75 ಕೋಟಿ) ಗಳಿಕೆಯನ್ನು ಹಿಂದಿಕ್ಕುವ ಸೂಚನೆ ನೀಡಿದೆ. ಸದ್ಯ ರಣವೀರ್ ಸಿಂಗ್ ಅಭಿನಯದ ‘ಧುರಂಧರ್ 2’ ಹೆಸರಿನಲ್ಲಿರುವ ಸಾರ್ವಕಾಲಿಕ ಮೊದಲ ದಿನದ ದಾಖಲೆಯನ್ನು (102 ಕೋಟಿ) ಮುರಿಯಲು ‘ರಾಮಾಯಣ’ ಮುನ್ನುಗ್ಗುತ್ತಿದೆ.