100 ರೂಗೆ 10 ಬಗೆಯ ತರಕಾರಿ ಪ್ಯಾಕೇಜ್: ತಮಿಳುನಾಡು ಸರ್ಕಾರದ ಯೋಜನೆ ಇದು

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ದೀಪಾವಳಿ ಹಬ್ಬದ ಖರೀದಿಯ ನಡುವೆ ಏರುತ್ತಿರುವ ತರಕಾರಿ ಬೆಲೆಗಳಿಂದ ಕಂಗಾಲಾಗಿರುವ ಕುಟುಂಬಗಳಿಗೆ ತಮಿಳುನಾಡು ಸರ್ಕಾರ ಪರಿಹಾರ ನೀಡಲು ಮುಂದಾಗಿದೆ.

ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ನೇತೃತ್ವದ ಸರ್ಕಾರವು ಕೇವಲ 100ಕ್ಕೆ 10 ಬಗೆಯ ಅಗತ್ಯ ತರಕಾರಿ ಹಾಗೂ ಅಡುಗೆ ಸಾಮಗ್ರಿಗಳನ್ನು ಒಳಗೊಂಡ ವಿಶೇಷ ಪ್ಯಾಕೇಜ್‌ ಬಿಡುಗಡೆ ಮಾಡಿದೆ. ‘ವೆಟ್ರಿ ಸ್ಪೆಷಲ್ ವೆಜಿಟೆಬಲ್ ಪ್ಯಾಕೇಜ್’ ಹೆಸರಿನ ಈ ಯೋಜನೆ ನವೆಂಬರ್ 5ರಿಂದ 7ರವರೆಗೆ ರಾಜ್ಯದ ಆಯ್ದ ಸಹಕಾರಿ ಮಳಿಗೆಗಳಲ್ಲಿ ಲಭ್ಯವಿರಲಿದೆ.

218 ಸಹಕಾರಿ ಮಳಿಗೆಗಳಲ್ಲಿ ಮಾರಾಟ

ರಾಜ್ಯ ಸಹಕಾರ ಇಲಾಖೆಯ ಮೂಲಕ ಜಾರಿಯಾಗುತ್ತಿರುವ ಯೋಜನೆಯಡಿ ತಮಿಳುನಾಡಿನ 218 ಸಹಕಾರಿ ಮಳಿಗೆಗಳಲ್ಲಿ ಪ್ಯಾಕೇಜ್‌ಗಳನ್ನು ವಿತರಿಸಲಾಗುತ್ತದೆ. ಚೆನ್ನೈನ ಪೂಂಗಾ ನಗರ ಸಹಕಾರಿ ಸಗಟು ಮಳಿಗೆಯ 15ನೇ ಮುಖ್ಯ ರಸ್ತೆಯಲ್ಲಿರುವ ಮಳಿಗೆಯಲ್ಲಿ ಯೋಜನೆಗೆ ಅಧಿಕೃತ ಚಾಲನೆ ನೀಡಲಾಗಿದೆ. ಗ್ರಾಹಕರಿಗೆ ಸುಲಭವಾಗಿ ಪ್ಯಾಕೇಜ್‌ ತಲುಪಿಸಲು ಚೆನ್ನೈನಲ್ಲಿ ನಾಲ್ಕು ಸಂಚಾರಿ ತರಕಾರಿ ಮಾರಾಟ ವಾಹನಗಳನ್ನೂ ನಿಯೋಜಿಸಲಾಗಿದೆ.

ಇದನ್ನೂ ಓದಿ:

100 ಪ್ಯಾಕೇಜ್‌ನಲ್ಲಿ ಏನೇನಿದೆ?

ಪ್ರತಿ ಪ್ಯಾಕೇಜ್‌ನಲ್ಲಿ ಸುಮಾರು 2.55ರಿಂದ 2.60 ಕೆ.ಜಿ. ತೂಕದ ತರಕಾರಿ ಮತ್ತು ಅಡುಗೆ ಸಾಮಗ್ರಿಗಳಿವೆ. 500 ಗ್ರಾಂ ಈರುಳ್ಳಿ, 500 ಗ್ರಾಂ ಟೊಮೆಟೊ, ತಲಾ 250 ಗ್ರಾಂ ಬದನೆಕಾಯಿ ಮತ್ತು ಆಲೂಗಡ್ಡೆ, ತಲಾ 200 ಗ್ರಾಂ ಕ್ಯಾರೆಟ್ ಮತ್ತು ಬೀನ್ಸ್, ತಲಾ 100 ಗ್ರಾಂ ಹಸಿಮೆಣಸು ಮತ್ತು ನಿಂಬೆ, 50 ಗ್ರಾಂ ಶುಂಠಿ ಹಾಗೂ 400ರಿಂದ 450 ಗ್ರಾಂ ತೂಕದ ಒಂದು ತೆಂಗಿನಕಾಯಿ ನೀಡಲಾಗುತ್ತದೆ.

ಗುಣಮಟ್ಟ ಮತ್ತು ಸಮರ್ಪಕ ವಿತರಣೆಗೆ ಒತ್ತು

ತರಕಾರಿಗಳನ್ನು ಸ್ವಚ್ಛ ಪರಿಸರದಲ್ಲಿ ಸಂಗ್ರಹಿಸಿ, ಗುಣಮಟ್ಟ ಪರಿಶೀಲಿಸಿ, ತೂಕ ಮಾಡಿ ಪ್ಯಾಕ್ ಮಾಡಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮಾರುಕಟ್ಟೆ ಬೆಲೆಗಿಂತ ಕಡಿಮೆ ದರದಲ್ಲಿ ಅಗತ್ಯ ವಸ್ತುಗಳನ್ನು ಒದಗಿಸುವ ಉದ್ದೇಶ ಹೊಂದಲಾಗಿದೆ. ಹೆಚ್ಚಿನ ಪ್ರಮಾಣದಲ್ಲಿ ಖರೀದಿಸಿ ಸಂಗ್ರಹಿಸುವುದನ್ನು ತಡೆಯಲು ಒಬ್ಬರಿಗೆ ಒಂದು ಪ್ಯಾಕೇಜ್‌ ಮಾತ್ರ ಮಾರಾಟ ಮಾಡಲಾಗುತ್ತದೆ.