ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಅಮೆರಿಕದ ಕ್ರಿಪ್ಟೋಕರೆನ್ಸಿ ಉದ್ಯಮದ ಪ್ರಮುಖ ವ್ಯಕ್ತಿ ಸ್ಯಾಮ್ ಬ್ಯಾಂಕ್ಮ್ಯಾನ್ ಫ್ರೈಡ್ಗೆ 25 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ.
ಈತ ಕ್ರಿಪ್ಟೋಕರೆನ್ಸಿ ಡೆರಿವೇಟಿವ್ಗಳ ಎಕ್ಸ್ಚೇಂಜ್ ಎಫ್ಟಿಎಕ್ಸ್ನ ಸಂಸ್ಥಾಪಕ ಮತ್ತು ಸಿಇಓಸ್ಯಾಮ್ ಬ್ಯಾಂಕ್ಮ್ಯಾನ್ ಫ್ರೈಡ್ 8 ಬಿಲಿಯಲ್ ಡಾಲರ್ ಹಣಕಾಸು ವಂಚನೆಯ ಆರೋಪದ ಪ್ರಕರಣದಲ್ಲಿ ತಪ್ಪಿತಸ್ಥರಾಗಿದ್ದಾರೆ. ಇವರ ಮೇಲೆ ಇದ್ದ ಎಲ್ಲಾ ಎಂಟು ದೂರುಗಳಲ್ಲೂ ಆರೋಪ ಸಾಬೀತಾಗಿದೆ.
ತೀರ್ಪು ನೀಡಿದ ನ್ಯಾಯಾಧೀಶರು, ಎಸ್ಬಿಎಫ್ ಅವರನ್ನು ಅಮೆರಿಕದ ಹಣಕಾಸು ಇತಿಹಾಸದಲ್ಲೇ ಅತಿದೊಡ್ಡ ವಂಚಕ ಎಂದು ಬಣ್ಣಿಸಿದ್ದಾರೆ.
ಅಮೆರಿಕದ ಸ್ಯಾಮ್ ಬ್ಯಾಂಕ್ಮನ್ ಫ್ರೈಡ್ 2019ರಲ್ಲಿ ಎಫ್ಟಿಎಕ್ಸ್ ಎಂಬ ಕ್ರಿಪ್ಟೋಕರೆನ್ಸಿ ಎಕ್ಸ್ಚೇಂಜ್ ಅನ್ನು ತೆರೆದಿದ್ದರು. ಆಗ ಕ್ರಿಪ್ಟೋಕರೆನ್ಸಿ ಬಹಳ ದೊಡ್ಡ ಭರವಸೆ ಹುಟ್ಟಿಸಿದ ಕ್ಷೇತ್ರ. ಕಡಿಮೆ ಶುಲ್ಕ ಹಾಗೂ ವೇಗದ ವಹಿವಾಟು ಇವೆರಡನ್ನೂ ಕೊಡುತ್ತಿದ್ದರಿಂದ ಎಫ್ಟಿಎಕ್ಸ್ ಬಹಳ ವೇಗದಲ್ಲಿ ಬೆಳೆಯಿತು. ಬಹಳ ಬೇಗ ಇದು ವಿಶ್ವದ ಎರಡನೇ ಅತಿದೊಡ್ಡ ಕ್ರಿಪ್ಟೋ ಎಕ್ಸ್ಚೇಂಜ್ ಎನಿಸಿತು.
ಸ್ಯಾಮ್ ಬ್ಯಾಂಕ್ಮ್ಯಾನ್ ಫ್ರೈಡ್ ಅತಿಕಿರಿಯ ವಯಸ್ಸಿನ ಬಿಲಿಯನೇರ್ ಎನಿಸಿದರು. ಅವರ ಸಂಪತ್ತು ಮೌಲ್ಯ 26.5 ಬಿಲಿಯನ್ ಡಾಲರ್ಗೆ ಹೋಯಿತು. ಬಿಂದಾಸ್ ಜೀವನಶೈಲಿಯ ಈತ ಒಂದು ರೀತಿಯಲ್ಲಿ ಕಲ್ಟ್ ಸ್ಟೇಟಸ್ ಗಿಟ್ಟಿಸಿದ್ದ. ವೈಯಕ್ತಿಕವಾಗಿ ಈತನಿಗೆ ಅಭಿಮಾನಿ ಬಳಗವೇ ಇತ್ತು. ಅಮೆರಿಕದ ಟಿವಿ ಶೋಗಳಲ್ಲಿ ದೊಡ್ಡ ದೊಡ್ಡ ಸೆಲಬ್ರಿಟಿ ಕಾರ್ಯಕ್ರಮಗಳಲ್ಲಿ ಈತ ಆಕರ್ಷಣೆಯಾಗಿದ್ದನು.
ಈತ ಎಫ್ಟಿಎಕ್ಸ್ ಅಲ್ಲದೇ ಇನ್ನೂ ಹಲವು ಕಂಪನಿಗಳನ್ನು ಹೊಂದಿದ್ದರು. ಅದರಲ್ಲಿ ಅಲಮೇಡಾ ರಿಸರ್ಚ್ ಒಂದು. ಎಫ್ಟಿಎಕ್ಸ್ನಿಂದ ಹೊರಡಿಸಲಾಗಿದ್ದ ಎಫ್ಟಿಟಿ ಎಂಬ ಕ್ರಿಪ್ಟೋ ಟೋಕನ್ನಲ್ಲಿ ಅಲಮೇಡಾ ಕಂಪನಿ ಬಹಳ ದೊಡ್ಡ ಮೊತ್ತದ ಹೂಡಿಕೆ ಮಾಡಿತ್ತು. ಇದು ಹಿತಾಸಕ್ತಿ ಘರ್ಷಣೆಗೆ ಎಡೆ ಮಾಡಿಕೊಟ್ಟಿತು. ಇಲ್ಲಿಂದ ಎಫ್ಟಿಎಕ್ಸ್ನ ಪತನ ಆರಂಭವಾಗುತ್ತದೆ.
2022ರ ನವೆಂಬರ್ ತಿಂಗಳಲ್ಲಿ ಎದುರಾಳಿ ಕಂಪನಿಯ ಸಿಇಒವೊಬ್ಬರು ಎಫ್ಟಿಎಕ್ಸ್ನ ಹಣಕಾಸು ಸ್ಥಿತಿ ಬಗ್ಗೆ ಅನುಮಾನ ಮೂಡಿಸುವಂತೆ ಟ್ವೀಟ್ ಮಾಡುತ್ತಾರೆ. ಇದು ಬಹಳಷ್ಟು ಹೂಡಿಕೆದಾರರನ್ನು ಕಂಗಾಲಾಗಿಸುತ್ತದೆ. ಎಫ್ಟಿಎಕ್ಸ್ ಎಕ್ಸ್ಚೇಂಜ್ನಲ್ಲಿ ತಾವಿರಿಸಿದ್ದ ಕ್ರಿಪ್ಟೋವನ್ನು ಹಿಂಪಡೆಯಲು ಎಲ್ಲರೂ ಮುಗಿಬೀಳುತ್ತಾರೆ. ಆದರೆ, ಅಷ್ಟು ಹೊರಹರಿವಿಗೆ ಸಾಕಾವಷ್ಟು ಫಂಡಿಂಗ್ ಎಫ್ಟಿಎಕ್ಸ್ನಲ್ಲಿ ಇರಲಿಲ್ಲ. ಆಗ ಎಫ್ಟಿಎಕ್ಸ್ನಿಂದ ಸಾಕಷ್ಟು ಮೊತ್ತದ ಹೂಡಿಕೆದಾರರ ಹಣ ನಾಪತ್ತೆಯಾಗಿರುವುದು ಬಹಿರಂಗವಾಗುತ್ತದೆ.ಸ್ಯಾಮ್ ಬ್ಯಾಂಕ್ಮ್ಯಾನ್ ಫ್ರೈಡ್ನನ್ನು ಬಹಾಮಾಸ್ನಲ್ಲಿ ಬಂಧಿಸಲಾಗುತ್ತದೆ. ತನ್ನದೇನೂ ತಪ್ಪಿಲ್ಲ ಎಂದು ಈತ ಹೇಳಿಕೊಂಡರೂ ಎಂಟು ಸಂಗತಿಗಳಲ್ಲಿ ಇವರ ಮೇಲಿನ ಆರೋಪ ಕೋರ್ಟ್ನಲ್ಲಿ ಸಾಬೀತಾಗಿದೆ. ಈಗ ಬರೋಬ್ಬರಿ 25 ವರ್ಷ ಜೈಲುಶಿಕ್ಷೆ ಅನುಭವಿಸುವಂತಾಗಿದೆ.