ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಚೆನ್ನೈನ ಮದ್ರಾಸ್ ಇಂಟರ್‌ನ್ಯಾಷನಲ್ ಸರ್ಕ್ಯೂಟ್‌ನಲ್ಲಿ ನಡೆದ ಇಂಡಿಯನ್ ರೇಸಿಂಗ್ ಫೆಸ್ಟಿವಲ್ 2026ರ ಭಾಗವಾದ ಎಫ್4 ಇಂಡಿಯನ್ ಚಾಂಪಿಯನ್‌ಶಿಪ್‌ನ 3ನೇ ಸುತ್ತಿನಲ್ಲಿ ಗೋವಾ ಏಸಸ್ ಜೆಎ ರೇಸಿಂಗ್‌ನ ಲುವಿವೆ ಸಂಬುದುಲಾ ಅದ್ಭುತ ಜಯಭೇರಿ ಬಾರಿಸಿದ್ದಾರೆ.
ಮೂರು ರೇಸ್‌ಗಳ ಪೈಕಿ ಎರಡರಲ್ಲಿ ಗೆಲುವು ಹಾಗೂ ಒಂದರಲ್ಲಿ ಮೂರನೇ ಸ್ಥಾನ ಪಡೆಯುವ ಮೂಲಕ ಒಟ್ಟು 138 ಅಂಕಗಳೊಂದಿಗೆ ಅವರು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದ್ದಾರೆ.
ಇದೇ ವೇಳೆ, ಕೋಲ್ಕತ್ತಾ ರಾಯಲ್ ಟೈಗರ್ಸ್ ತಂಡದ 15 ವರ್ಷದ ಯುವ ಚಾಲಕ ಆರನ್ ಮೆಹ್ತಾ ಮೂರನೇ ರೇಸ್ ಗೆಲ್ಲುವ ಮೂಲಕ ಚಾಂಪಿಯನ್‌ಶಿಪ್ ಇತಿಹಾಸದಲ್ಲೇ ಅತ್ಯಂತ ಕಿರಿಯ ರೇಸ್ ವಿಜೇತ ಎಂಬ ಐತಿಹಾಸಿಕ ದಾಖಲೆ ಬರೆದಿದ್ದಾರೆ.
ಎಫ್4 ಚಾಂಪಿಯನ್‌ಶಿಪ್: ಸಂಬುದುಲಾ ಅಬ್ಬರ
ಸದ್ಯ 138 ಅಂಕ ಗಳಿಸಿರುವ ಸಂಬುದುಲಾ, 117 ಅಂಕ ಹೊಂದಿರುವ ‘ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರು’ ತಂಡದ ಆರಿಸ್ ಕೈರಿಯಾಕು ಅವರಿಗಿಂತ 21 ಅಂಕಗಳ ಸ್ಪಷ್ಟ ಮುನ್ನಡೆ ಸಾಧಿಸಿದ್ದಾರೆ. ಆರನೇ ಸ್ಥಾನದಿಂದ ರೇಸ್ ಆರಂಭಿಸಿದ ಸಂಬುದುಲಾ, ಸುರಿಯುವ ಮಳೆಯ ನಡುವೆಯೂ ಅದ್ಭುತ ಕೌಶಲ್ಯ ಪ್ರದರ್ಶಿಸಿ 9.606 ಸೆಕೆಂಡ್‌ಗಳ ಭಾರೀ ಅಂತರದಲ್ಲಿ ಮೊದಲ ಸ್ಥಾನ ಪಡೆದರು. ದೆಹಲಿಯ ನ್ತಿಯಿಸೊ ಮಬುಂಡಾ ಎರಡನೇ ಸ್ಥಾನ ಹಾಗೂ ಗೋವಾ ಏಸಸ್‌ನ ಆರ್ಯನ್ ನರೋಲಾ ಮೂರನೇ ಸ್ಥಾನ ಪಡೆದರು.
13 ಲ್ಯಾಪ್‌ಗಳ ಈ ರೇಸ್‌ನಲ್ಲಿ ಸಂಬುದುಲಾ ಹಾಗೂ ದೆಹಲಿಯ ಮಬುಂಡಾ ನಡುವೆ ತೀವ್ರ ಪೈಪೋಟಿ ನಡೆಯಿತು. ಅಂತಿಮವಾಗಿ ಸಂಬುದುಲಾ 1.211 ಸೆಕೆಂಡ್‌ಗಳ ಅಂತರದಲ್ಲಿ ಗೆದ್ದರೆ, ಬೆಂಗಳೂರಿನ ಕೈರಿಯಾಕು ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟರು.
15ರ ಹರೆಯದ ಆರನ್ ಮೆಹ್ತಾ ಐತಿಹಾಸಿಕ ದಾಖಲೆ
ಮೂರನೇ ರೇಸ್‌ನಲ್ಲಿ ಮಳೆ, ರೆಡ್ ಫ್ಲ್ಯಾಗ್ ಮತ್ತು ಸೇಫ್ಟಿ ಕಾರ್‌ಗಳ ಎಂಟ್ರಿಯಿಂದಾಗಿ ರೇಸ್ ಹಲವು ತಿರುವುಗಳನ್ನು ಪಡೆದುಕೊಂಡಿತು. ಪೋಲ್ ಪೊಸಿಷನ್‌ನಿಂದ ರೇಸ್ ಆರಂಭಿಸಿದ್ದ ಕೋಲ್ಕತ್ತಾದ 15 ವರ್ಷದ ಆರನ್ ಮೆಹ್ತಾ, ಕೊನೆಯ ಲ್ಯಾಪ್‌ನಲ್ಲಿ ದೆಹಲಿಯ ನ್ತಿಯಿಸೊ ಮಬುಂಡಾ ನೀಡಿದ ಕಠಿಣ ಸವಾಲನ್ನು ಯಶಸ್ವಿಯಾಗಿ ಮೆಟ್ಟಿ ನಿಂತರು. ಕೇವಲ 0.546 ಸೆಕೆಂಡ್‌ಗಳ ರೋಮಾಂಚಕ ಅಂತರದಲ್ಲಿ ಗೆಲುವು ಸಾಧಿಸಿದ ಮೆಹ್ತಾ, ಎಫ್4 ಇತಿಹಾಸದಲ್ಲೇ ಅತ್ಯಂತ ಕಿರಿಯ ವಿಜೇತನಾಗಿ ಹೊರಹೊಮ್ಮಿದರು. ಮಬುಂಡಾ ಇಲ್ಲಿಯೂ ಎರಡನೇ ಸ್ಥಾನ ಪಡೆದರೆ, ಸಂಬುದುಲಾ ಮೂರನೇ ಸ್ಥಾನ ಗಳಿಸಿದರು.
ಇಂಡಿಯನ್ ರೇಸಿಂಗ್ ಲೀಗ್
ಇದೇ ಸರ್ಕ್ಯೂಟ್‌ನಲ್ಲಿ ನಡೆದ ಇಂಡಿಯನ್ ರೇಸಿಂಗ್ ಲೀಗ್‌ನ (IRL) ಮೊದಲ ರೇಸ್‌ನಲ್ಲಿ ‘ಸ್ಪೀಡ್ ಡೆಮನ್ಸ್ ದೆಹಲಿ’ ತಂಡದ ಶಹಾನ್ ಅಲಿ ಮೊಹ್ಸಿನ್ ರೋಮಾಂಚಕ ಜಯ ದಾಖಲಿಸಿದ್ದಾರೆ. ಎಂಟು ಲ್ಯಾಪ್‌ಗಳ ಈ ವೇಗದ ರೇಸ್‌ನಲ್ಲಿ ಗೋವಾ ಏಸಸ್‌ನ ರೌಲ್ ಹೈಮನ್ ಅವರಿಗೆ ಕೇವಲ 0.506 ಸೆಕೆಂಡ್‌ಗಳ ಅಂತರದಲ್ಲಿ ಆಘಾತ ನೀಡಿ ಮೊಹ್ಸಿನ್ ಮೊದಲ ಸ್ಥಾನ ಪಡೆದರು.
ಈ ರೇಸ್‌ನಲ್ಲಿ ಹೈದರಾಬಾದ್ ಬ್ಲ್ಯಾಕ್‌ಬರ್ಡ್ಸ್‌ನ ಮೊಹಮ್ಮದ್ ರಯಾನ್ ನಾಲ್ಕನೇ ಸ್ಥಾನ, ಕಿಚ್ಚಾಸ್ ಕಿಂಗ್ಸ್ ಬೆಂಗಳೂರಿನ ಎಮಿಲ್ ಹೇಯರ್ಡಾಲ್ ಐದನೇ ಸ್ಥಾನ ಹಾಗೂ ಚೆನ್ನೈ ಟರ್ಬೊ ರೈಡರ್ಸ್‌ನ ಸಾಯಿ ಶಿವ ಶಂಕರನ್ ಆರನೇ ಸ್ಥಾನ ಪಡೆದರು. ಮೊದಲ 8 ಚಾಲಕರು ಕೇವಲ 8.523 ಸೆಕೆಂಡ್‌ಗಳ ಅಂತರದಲ್ಲಿ ರೇಸ್ ಪೂರ್ಣಗೊಂಡಿದ್ದು, ಇದು ಸ್ಪರ್ಧೆಯ ತೀವ್ರತೆಯನ್ನು ತೋರಿಸಿದೆ.
