ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಉತ್ತರ ಕಾಶ್ಮೀರದ ಗಿರಿಧಾಮ ಪ್ರದೇಶವಾದ ಬಂಡಿಪೋರಾ ಜಿಲ್ಲೆಯಲ್ಲಿ ತಡರಾತ್ರಿ ಸಂಭವಿಸಿದ ಭೀಕರ ಮೇಘಸ್ಫೋಟದಿಂದಾಗಿ ಭಾರಿ ಪ್ರವಾಹ ಉಂಟಾಗಿದೆ. ಪರ್ವತ ಪ್ರದೇಶಗಳಿಂದ ಭೋರ್ಗರೆದು ಬಂದ ಕೆಸರುಮಿಶ್ರಿತ ನೀರು ವಸತಿ ಪ್ರದೇಶಗಳಿಗೆ ನುಗ್ಗಿದ್ದು, ವ್ಯಾಪಕ ಹಾನಿ ಸಂಭವಿಸಿದೆ.
ನಡುರಾತ್ರಿ ನುಗ್ಗಿದ ಜಲಕಂಟಕ
ಬಂಡಿಪೋರಾದ ಮೇಲ್ಭಾಗದ ಪರ್ವತಗಳಲ್ಲಿ ಹಠಾತ್ತಾಗಿ ಮೇಘಸ್ಫೋಟ ಸಂಭವಿಸಿದ್ದರಿಂದ ಸ್ಥಳೀಯ ನದಿ-ತೊರೆಗಳು ಉಕ್ಕಿ ಹರಿದಿವೆ. ಜನರು ಗಾಢ ನಿದ್ರೆಯಲ್ಲಿದ್ದಾಗ ದಿಢೀರ್ ಪ್ರವಾಹದ ನೀರು ತಗ್ಗು ಪ್ರದೇಶದ ಹಳ್ಳಿಗಳಿಗೆ ನುಗ್ಗಿದ್ದರಿಂದ ಇಡೀ ಭಾಗದಲ್ಲಿ ಆತಂಕದ ವಾತಾವರಣ ಸೃಷ್ಟಿಯಾಗಿತ್ತು. ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.
ಆಸ್ತಿಪಾಸ್ತಿ ನಾಶ, ಸಂಪರ್ಕ ಕಡಿತ
ಪ್ರವಾಹದ ತೀವ್ರತೆಗೆ ಹಲವು ಕಾಂಕ್ರೀಟ್ ಹಾಗೂ ಮರದ ಮನೆಗಳ ಗೋಡೆಗಳು ಕುಸಿದು ಬಿದ್ದಿವೆ. ಸಾರ್ವಜನಿಕ ಆಸ್ತಿಪಾಸ್ತಿಗಳಿಗೆ ತೀವ್ರ ಹಾನಿಯಾಗಿದ್ದು, ಇಡೀ ಜನಜೀವನ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ. ರಸ್ತೆಗಳ ಮೇಲೆ ಭಾರಿ ಪ್ರಮಾಣದ ಕೆಸರು ಮತ್ತು ಕಲ್ಲುಗಳು ಬಂದು ಬಿದ್ದಿರುವುದರಿಂದ, ಬಂಡಿಪೋರಾದ ಹಲವು ಹಳ್ಳಿಗಳ ನಡುವಿನ ರಸ್ತೆ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿದೆ. ಸದ್ಯ ಸ್ಥಳದಲ್ಲಿ ಪರಿಹಾರ ಕಾರ್ಯಗಳು ಚುರುಕಿನಿಂದ ಸಾಗಿವೆ.
