ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವಯನಾಡಿನ ಮುಂಡಕೈಗೆ ತೆರಳಲು ಭಾರತೀಯ ಸೇನೆ ಬೈಲಿ ಸೇತುವೆಯನ್ನು ಸಂಪೂರ್ಣ ಸಿದ್ಧಪಡಿಸಿದೆ. ಬುಧವಾರ ಆರಂಭವಾದ ನಿರ್ಮಾಣವು ಎಲ್ಲ ಪ್ರತಿಕೂಲ ಪರಿಸ್ಥಿತಿಗಳನ್ನು ಮೆಟ್ಟಿ ನಿಂತು ಹಗಲಿರುಳು ಶ್ರಮಿಸಿದ ಬಳಿಕ ಇಂದು (ಗುರುವಾರ) ಸಂಜೆ 5.50ರ ಸುಮಾರಿಗೆ ಸಂಪೂರ್ಣ ಸಿದ್ಧಗೊಂಡ ಸೇತುವೆಯ ಮೂಲಕ ಮೊದಲ ವಾಹನ ಹಾದು ಹೋಗಿದೆ.
ದುರಂತದಲ್ಲಿ ಅಳಿದುಳಿದ ಮುಂಡಕೈಯಲ್ಲಿ ಅವಶೇಷಗಳ ಪತ್ತೆ, ಮನುಷ್ಯ, ಪ್ರಾಣಿಗಳ ರಕ್ಷಣೆಗೆ ಬೈಲಿ ಸೇತುವೆ ಹೆಚ್ಚಿನ ಸಹಕಾರಿಯಾಗಲಿದೆ. ಸೇನೆಯ ಮದ್ರಾಸ್ ಎಂಜಿನಿಯರಿಂಗ್ ಗ್ರೂಪ್ (MEG) ನೇತೃತ್ವದಲ್ಲಿ ಸೇತುವೆಯನ್ನು ನಿರ್ಮಿಸಲಾಗಿದೆ.
ಈ ಸೇತುವೆಯು ಮುಂಡಕೈ ಮತ್ತು ಚೂರಲ್ಮಲವನ್ನು ಸಂಪರ್ಕಿಸುತ್ತದೆ. ಪ್ರಸ್ತುತ ಸೇನೆ ನಿರ್ಮಿಸುತ್ತಿರುವ ಬೈಲಿ ಸೇತುವೆ ಒಂದು ಬಾರಿಗೆ 24 ಟನ್ ತೂಕವನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿದೆ. ಹಿಟಾಚಿ ಸೇರಿದಂತೆ ದೊಡ್ಡ ರಕ್ಷಣಾ ಸಾಧನಗಳನ್ನು ಬೈಲಿ ಸೇತುವೆಯ ಮೂಲಕ ಮುಂಡಕೈಗೆ ಸಾಗಿಸಬಹುದು.
ಭಾರತೀಯ ವಾಯುಪಡೆಯ ಹೆಮ್ಮೆಯ ಗ್ಲೋಬ್‌ಮಾಸ್ಟರ್‌ನಲ್ಲಿ ಸೇತುವೆಯನ್ನು ನಿರ್ಮಿಸಲು ದೆಹಲಿಯಿಂದ ವಸ್ತುಗಳನ್ನು ತರಲಾಯಿತು. ಕಣ್ಣೂರು ವಿಮಾನ ನಿಲ್ದಾಣಕ್ಕೆ ತಂದು ಅಲ್ಲಿಂದ 17 ಲಾರಿಗಳಲ್ಲಿ ಇದನ್ನು ವಯನಾಡಿಗೆ ತರಲಾಯಿತು.
ಈ ಹಿಂದೆ ಸೇನೆಯೇ ತಾತ್ಕಾಲಿಕ ಸೇತುವೆಯನ್ನು ನಿರ್ಮಿಸಿತ್ತು, ಆದರೆ ಯಾವುದೇ ಭಾರವನ್ನು ಅದರ ಮೂಲಕ ಸಾಗಿಸಲು ಸಾಧ್ಯವಾಗಲಿಲ್ಲ. ನದಿಯಲ್ಲಿ ನೀರಿನ ಮಟ್ಟ ಅಪಾಯಕಾರಿಯಾಗಿ ಏರಿದಾಗ ಈ ತಾತ್ಕಾಲಿಕ ಸೇತುವೆ ಮುಳುಗಡೆಯಾಗಿತ್ತು.
ಬೈಲಿ ಸೇತುವೆ ಎಂಬ ವಿಶಿಷ್ಟವಾದ ಮಿಲಿಟರಿ ಸೇತುವೆಯನ್ನು ವಿಶ್ವ ಯುದ್ಧ II ರ ಸಮಯದಲ್ಲಿ ಬ್ರಿಟಿಷ್ ಇಂಜಿನಿಯರ್ ಸರ್ ಡೊನಾಲ್ಡ್ ಬೈಲಿ ಅಭಿವೃದ್ಧಿಪಡಿಸಿದರು. ಯುದ್ಧ ವಲಯಗಳಲ್ಲಿ ತ್ವರಿತವಾಗಿ ನಿಯೋಜಿಸಬಹುದಾದ ತ್ವರಿತ-ಜೋಡಣೆ, ಪೋರ್ಟಬಲ್ ಸೇತುವೆಗಳ ಅಗತ್ಯಕ್ಕೆ ಪ್ರತಿಕ್ರಿಯೆಯಾಗಿ ವಿನ್ಯಾಸವನ್ನು ಕಲ್ಪಿಸಲಾಗಿದೆ.
ಸೇತುವೆ ನಿರ್ಮಾಣ ಪೂರ್ಣಗೊಳ್ಳುವ ಮುನ್ನ ಮಾಧ್ಯಮದವರೊಂದಿಗೆ ಮಾತನಾಡಿದ್ದ ಪ್ಯಾರಾ ರೆಜಿಮೆಂಟಲ್ ತರಬೇತಿ ಕೇಂದ್ರದ ಕಮಾಂಡೆಂಟ್ ಬ್ರಿಗೇಡಿಯರ್ ಅರ್ಜುನ್ ಸೆಗನ್, ’24 ಟನ್ ತೂಕದ ವರ್ಗದ ಬೈಲಿ ಸೇತುವೆಯ ಕೆಲಸವನ್ನು ನಾವು ಇಂದು ಮಧ್ಯಾಹ್ನದ ವೇಳೆಗೆ ಪೂರ್ಣಗೊಳಿಸಲು ಸಾಧ್ಯವಾಗುತ್ತದೆ ಎಂದು ನಾವು ಭಾವಿಸುತ್ತೇವೆ. ನಮ್ಮ ಇಂಜಿನಿಯರ್‌ಗಳು ರಾತ್ರಿಯಿಡೀ ಕೆಲಸದಲ್ಲಿದ್ದರು. ಇಂದು ನಾವು ಅನೇಕ ಅರ್ಥ್ ಮೂವರ್ಸ್ ಉಪಕರಣಗಳನ್ನು ಕಳುಹಿಸಿದ್ದೇವೆ. ಇದು ನಮ್ಮ ಶೋಧ ಕಾರ್ಯಾಚರಣೆಯನ್ನು ಹೆಚ್ಚು ಸುಲಭಗೊಳಿಸುತ್ತಿದೆ ಎಂದಿದ್ದಾರೆ.
