ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಈಗಾಗಲೇ ಡೆಲ್ಲಿ ತಂಡದ ಮಿಚೆಲ್ ಮಾರ್ಷ್ ಕೋವಿಡ್ ಸೋಂಕು ತಗುಲಿಆಸ್ಪತ್ರೆ ಸೇರಿದ್ದು, ಇದೀಗ ಬುಧವಾರ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯಕ್ಕೂ ಮುನ್ನ ಮತ್ತೊಬ್ಬ ವಿದೇಶಿ ಆಟಗಾರನಿಗೂ ಸೋಂಕು ತಗುಲಿದೆ .
ಬುಧವಾರ ಪಂಜಾಬ್ ಕಿಂಗ್ಸ್ ವಿರುದ್ಧ ಪಂದ್ಯಕ್ಕೂ ಮುನ್ನ ಬಿಸಿಸಿಐ ನಡೆಸಿದ ಕೋವಿಡ್ 19 ಟೆಸ್ಟ್ನಲ್ಲಿ ನ್ಯೂಜಿಲ್ಯಾಂಡ್ನ ವಿಕೆಟ್ ಕೀಪರ್ ಬ್ಯಾಟರ್ ಟಿಮ್ ಸೀಫರ್ಟ್ ಪಾಸಿಟಿವ್ ಬಂದಿದ್ದು, ಇದು ಡೆಲ್ಲಿ ಕ್ಯಾಂಪಟ್ನಲ್ಲಿ ಕಂಡುಬಂದ 6ನೇ ಕೋವಿಡ್ 19 ಪ್ರಕರಣವಾಗಿದೆ.
ಬ್ರಬೋರ್ನ್ನಲ್ಲಿ ಇಂದು ಸಂಜೆ ಪಂದ್ಯ ನಡೆಯುವುದಕ್ಕೂ ಮುನ್ನ ಬಿಸಿಸಿಐ ಮತ್ತೊಂದು ಸುತ್ತಿನ ಪರೀಕ್ಷೆ ನಡೆಸಲಿದೆ ಎಂದು ತಿಳಿದುಬಂದಿದೆ.ಎಲ್ಲಾ ಆಟಗಾರರನ್ನು ತಮ್ಮ ರೂಮಿನಲ್ಲಿರಲು ತಿಳಿಸಲಾಗಿದ್ದು, ಆಟಗಾರರ ಕೊಠಡಿಗೆ ತೆರಳಿ ಪರೀಕ್ಷೆ ಮಾಡಲು ಬಿಸಿಸಿಐ ಯೋಜನೆ ರೂಪಿಸಿದೆ. ಈ ಪರೀಕ್ಷೆಯಲ್ಲಿ ನೆಗೆಟಿವ್ ಬಂದವರು ಪಂಜಾಬ್ ವಿರುದ್ಧ ಕಣಕ್ಕಿಳಿಯಲಿದ್ದಾರೆ.
ಐಪಿಎಲ್ ನಿಯಮಗಳ ಪ್ರಕಾರ ಕಡಿಮೆ ಅಂದರೂ 7 ಭಾರತೀಯ ಆಟಗಾರರು ಸೇರಿದಂತೆ ತಂಡದಲ್ಲಿ 12 ಆಟಗಾರು ಇದ್ದರೆ ಮಾತ್ರ ಪಂದ್ಯ ವೇಳಾಪಟ್ಟಿಯಂತೆ ನಡೆಯಲಿದೆ. ಒಂದು ವೇಳೆ 12 ಆಟಗಾರರ ತಂಡ ಮಾಡಲು ಸಾಧ್ಯವಾಗದಿದ್ದರೆ ಪಂದ್ಯವನ್ನು ಮುಂದೂಡಬಹುದಾಗಿದೆ.