ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಯುರೋಪಿನ ಪ್ರಮುಖ ಜಲಮಾರ್ಗವಾಗಿರುವ ಡ್ಯಾನ್ಯೂಬ್ ನದಿಯ ನೀರಿನ ಮಟ್ಟ ದಾಖಲೆ ಮಟ್ಟಕ್ಕೆ ಕುಸಿದಿರುವ ಪರಿಣಾಮ, ಎರಡನೇ ವಿಶ್ವಯುದ್ಧದ ಕಾಲದಲ್ಲಿ ಮುಳುಗಿಸಿಡಲಾಗಿರುವ ಜರ್ಮನಿಯ ಯುದ್ಧನೌಕೆಗಳ ಅವಶೇಷಗಳು ಮತ್ತೆ ಹೊರಗೆ ಕಾಣಿಸಿಕೊಂಡಿವೆ.
ಸರ್ಬಿಯಾದ ಪ್ರಹೋವೊ ಬಂದರು ಸಮೀಪ ನದಿಯ ಮಧ್ಯಭಾಗದಲ್ಲಿ ಹಲವು ದಶಕಗಳಿಂದ ನೀರಿನೊಳಗಿದ್ದ ನೌಕೆಗಳ ತುಕ್ಕು ಹಿಡಿದ ಭಾಗಗಳು ಮತ್ತು ಮುರಿದ ರಚನೆಗಳು ಈಗ ಸ್ಪಷ್ಟವಾಗಿ ಗೋಚರಿಸುತ್ತಿವೆ. ತೀವ್ರ ಉಷ್ಣತೆ, ದೀರ್ಘಕಾಲದ ಮಳೆಯ ಕೊರತೆ ಮತ್ತು ಬರ ಪರಿಸ್ಥಿತಿಯಿಂದ ಡ್ಯಾನ್ಯೂಬ್ನ ನೀರಿನ ಮಟ್ಟ ಕುಸಿಯುತ್ತಿದ್ದು, ಇದರ ಪರಿಣಾಮ ಕೇವಲ ಹಳೆಯ ಯುದ್ಧನೌಕೆಗಳು ಹೊರ ಕಾಣಿಸಿರುವುದು ಅಷ್ಟೇ ಅಲ್ಲದೆ, ಈ ಬೆಳವಣಿಗೆ ನದಿಯಲ್ಲಿನ ಸರಕು ಸಾಗಣೆ, ನೌಕಾಯಾನ ಮತ್ತು ವಿದ್ಯುತ್ ಉತ್ಪಾದನೆಯ ಮೇಲೂ ಗಂಭೀರ ಪರಿಣಾಮ ಬೀರಿದೆ.
1944ರಲ್ಲಿ ಏನಾಗಿತ್ತು?
ಎರಡನೇ ವಿಶ್ವಯುದ್ಧದ ಅಂತಿಮ ಹಂತದಲ್ಲಿ 1944ರ ಸೆಪ್ಟೆಂಬರ್ನಲ್ಲಿ ಸೋವಿಯತ್ ಪಡೆಗಳು ಪೂರ್ವ ಯುರೋಪಿನಲ್ಲಿ ವೇಗವಾಗಿ ಮುನ್ನಡೆಯುತ್ತಿದ್ದವು. ಇದೇ ಸಂದರ್ಭದಲ್ಲಿ ಜರ್ಮನಿಯ ಸೇನೆ ಹಿಮ್ಮೆಟ್ಟುತ್ತಿತ್ತು. ಜರ್ಮನಿಯ ಕಪ್ಪು ಸಮುದ್ರದ ನೌಕಾಪಡೆಯ ಹಲವು ನೌಕೆಗಳು ಡ್ಯಾನ್ಯೂಬ್ ಮೂಲಕ ಹಿಂತಿರುಗುತ್ತಿದ್ದವು. ಸರ್ಬಿಯಾ ಮತ್ತು ರೊಮೇನಿಯಾ ಗಡಿಯಲ್ಲಿರುವ ಐರನ್ ಗೇಟ್ಸ್ ಪ್ರದೇಶದ ಕಿರಿದಾದ ಜಲಮಾರ್ಗದ ಬಳಿ ಸೋವಿಯತ್ ಪಡೆಗಳ ಮುನ್ನಡೆಯನ್ನು ತಡೆಯುವ ಉದ್ದೇಶದಿಂದ ಜರ್ಮನ್ ಪಡೆಗಳು ಹಲವು ನೌಕೆಗಳನ್ನು ಉದ್ದೇಶಪೂರ್ವಕವಾಗಿ ನದಿಯಲ್ಲಿ ಮುಳುಗಿಸಿದ್ದವು. ಇತಿಹಾಸಕಾರರ ಪ್ರಕಾರ, ಈ ಪ್ರದೇಶದಲ್ಲಿ ಸುಮಾರು 200 ಜರ್ಮನ್ ನೌಕೆಗಳನ್ನು ಮುಳುಗಿಸಲಾಗಿತ್ತು. ಅವುಗಳಲ್ಲಿ ವಿವಿಧ ರೀತಿಯ ಸೇನಾ ನೌಕೆಗಳು ಸೇರಿದ್ದವು.
ಈ ನೌಕೆಗಳ ಅವಶೇಷಗಳು ಹಿಂದೆ ಕೂಡ ಬೇಸಿಗೆಯ ತೀವ್ರ ಬರದ ಸಂದರ್ಭದಲ್ಲಿ ಕೆಲವೊಮ್ಮೆ ಕಾಣಿಸಿಕೊಂಡಿದ್ದವು. ಆದರೆ ಈ ಬಾರಿ ಡ್ಯಾನ್ಯೂಬ್ನ ನೀರಿನ ಮಟ್ಟ ತೀವ್ರವಾಗಿ ಕುಸಿದಿರುವುದರಿಂದ ಸಾಮಾನ್ಯವಾಗಿ ನೀರಿನೊಳಗೆ ಮುಳುಗಿರುವ ಹಲವು ನೌಕೆಗಳ ಭಾಗಗಳು ಕೂಡ ಹೊರಬಂದಿವೆ. ಪ್ರಹೋವೊ ಸಮೀಪದ ಕೆಲವು ಪ್ರದೇಶಗಳಲ್ಲಿ ದೊಡ್ಡ ಹಡಗುಗಳ ಕಬ್ಬಿಣದ ದೇಹಗಳು ನದಿಯ ತಳದಲ್ಲಿ ಕಾಣಿಸುತ್ತಿವೆ. ಕೆಲವು ನೌಕೆಗಳಲ್ಲಿ ಯುದ್ಧಸಾಮಗ್ರಿಗಳು ಇನ್ನೂ ಉಳಿದಿರುವ ಸಾಧ್ಯತೆಯೂ ಇದೆ.
ನದಿಯೊಳಗೆ ಇನ್ನೂ ಸ್ಫೋಟಕಗಳಿವೆಯೇ?
ಇದೇ ಈಗ ಎಲ್ಲರ ಕಾದಿಟ್ಟಿರುವ ದೊಡ್ಡ ಆತಂಕ. 1944ರಲ್ಲಿ ಮುಳುಗಿಸಲಾದ ನೌಕೆಗಳಲ್ಲಿ ಕೆಲವು ಶಸ್ತ್ರಾಸ್ತ್ರಗಳು ಮತ್ತು ಸ್ಫೋಟಕಗಳು ಇನ್ನೂ ಇರಬಹುದೆಂದು ಅಧಿಕಾರಿಗಳು ಮತ್ತು ತಜ್ಞರು ಎಚ್ಚರಿಸಿದ್ದಾರೆ. ಹೀಗಾಗಿ ಈ ಅವಶೇಷಗಳು ಕುತೂಹಲ ಮಾತ್ರವಲ್ಲ ಅಪಾಯಕಾರಿಯೂ ಆಗಿದೆ. ನೀರಿನ ಮಟ್ಟ ಮತ್ತಷ್ಟು ಕಡಿಮೆಯಾದಂತೆ ಈ ಅವಶೇಷಗಳು ನೌಕಾಯಾನದ ಮಾರ್ಗಕ್ಕೆ ಇನ್ನಷ್ಟು ಅಡ್ಡಿಯಾಗುವ ಸಾಧ್ಯತೆಯಿದೆ.
ಸರ್ಬಿಯಾ ಸರ್ಕಾರ ಹಲವು ವರ್ಷಗಳಿಂದ ಡ್ಯಾನ್ಯೂಬ್ನಲ್ಲಿರುವ ಅಪಾಯಕಾರಿ ನೌಕೆಗಳ ಅವಶೇಷಗಳನ್ನು ತೆರವುಗೊಳಿಸುವ ಪ್ರಯತ್ನ ನಡೆಸುತ್ತಿದೆ. ಯುರೋಪಿಯನ್ ಒಕ್ಕೂಟದ ಆರ್ಥಿಕ ಬೆಂಬಲವೂ ಈ ಕಾರ್ಯಕ್ಕೆ ದೊರೆಯುತ್ತಿದೆ. ತೆರವುಗೊಳಿಸಲು ಗುರುತಿಸಲಾಗಿರುವ ಅವಶೇಷಗಳ ಪೈಕಿ 21 ನೌಕೆಗಳ ಯೋಜನೆಯಲ್ಲಿ 2026ರ ಏಪ್ರಿಲ್ ವೇಳೆಗೆ ಏಳು ನೌಕೆಗಳ ತೆರವು ಅಥವಾ ಸುರಕ್ಷಿತ ನಿರ್ವಹಣೆ ಪೂರ್ಣಗೊಂಡಿತ್ತು ಎಂದು ವರದಿಯಾಗಿದೆ. ಆದರೆ ಪ್ರತಿಯೊಂದು ನೌಕೆಯನ್ನೂ ಮೇಲಕ್ಕೆತ್ತುವುದು ಸುಲಭದ ಕೆಲಸವಲ್ಲ. ಸ್ಫೋಟಕಗಳು ಮತ್ತು ಹಳೆಯ ಯುದ್ಧಸಾಮಗ್ರಿಗಳ ಸಾಧ್ಯತೆಯಿಂದ ತಜ್ಞರು ಅತ್ಯಂತ ಎಚ್ಚರಿಕೆಯಿಂದ ಕಾರ್ಯಾಚರಣೆ ನಡೆಸಬೇಕಾಗಿದೆ.
