ಇಂದಿನ ವೇಗದ ಜಗತ್ತಿನಲ್ಲಿ ಮನುಷ್ಯ ಎಲ್ಲರೊಂದಿಗೂ ಸಂಪರ್ಕದಲ್ಲಿದ್ದರೂ ಸಹ ಒಳಗಿನಿಂದ ಒಂಟಿತನ ಅನುಭವಿಸುತ್ತಿದ್ದಾನೆ. ಆಧುನಿಕ ಜೀವನಶೈಲಿ ಮತ್ತು ನಾವು ಅರಿಯದೆ ರೂಢಿಸಿಕೊಂಡಿರುವ ಕೆಲವು ಹವ್ಯಾಸಗಳು ನಮ್ಮನ್ನು ಸಮಾಜದಿಂದ ಮತ್ತು ಪ್ರೀತಿಪಾತ್ರರಿಂದ ದೂರ ಮಾಡುತ್ತಿವೆ. ಮನಃಶಾಸ್ತ್ರಜ್ಞರ ಪ್ರಕಾರ, ಒಂಟಿತನವು ಕೇವಲ ಮಾನಸಿಕ ಸ್ಥಿತಿಯಲ್ಲ, ಅದು ದೈಹಿಕ ಆರೋಗ್ಯದ ಮೇಲೆಯೂ ಗಂಭೀರ ಪರಿಣಾಮ ಬೀರುತ್ತದೆ.
ಕೈಯಲ್ಲೊಂದು ಸ್ಮಾರ್ಟ್ಫೋನ್ ಇದ್ದರೆ ಜಗತ್ತೇ ನಮ್ಮ ಜೊತೆಗಿದೆ ಎಂದು ನಾವು ಭಾವಿಸುತ್ತೇವೆ. ಆದರೆ ವಾಸ್ತವದಲ್ಲಿ, ಇತರರ ‘ಪರ್ಫೆಕ್ಟ್’ ಜೀವನದ ಫೋಟೋಗಳನ್ನು ನೋಡಿ ನಮ್ಮ ಜೀವನವನ್ನು ಹೋಲಿಕೆ ಮಾಡಿಕೊಳ್ಳುವುದು ನಮ್ಮಲ್ಲಿ ಕೀಳರಿಮೆ ಮತ್ತು ಒಂಟಿತನವನ್ನು ಹೆಚ್ಚಿಸುತ್ತದೆ. ವರ್ಚುವಲ್ ಪ್ರಪಂಚದ ಹಿಂದೆ ಬಿದ್ದು, ನಿಜವಾದ ಸಂಬಂಧಗಳನ್ನು ನಾವು ಮರೆಯುತ್ತಿದ್ದೇವೆ.
“ನಾನು ಯಾರಿಗೂ ಬೇಡ”, “ನನ್ನನ್ನು ಯಾರೂ ಅರ್ಥ ಮಾಡಿಕೊಳ್ಳುವುದಿಲ್ಲ” ಎಂಬ ನಕಾರಾತ್ಮಕ ಆಲೋಚನೆಗಳು ನಿಮ್ಮನ್ನು ಇತರರಿಂದ ದೂರವಿಡುತ್ತವೆ. ನಿಮ್ಮ ಬಗ್ಗೆ ನೀವೇ ಕೆಟ್ಟದಾಗಿ ಯೋಚಿಸುವುದರಿಂದ ಆತ್ಮವಿಶ್ವಾಸ ಕುಗ್ಗಿ, ಜನರನ್ನು ಭೇಟಿಯಾಗಲು ಹಿಂಜರಿಕೆ ಉಂಟಾಗುತ್ತದೆ.
ವೃತ್ತಿಜೀವನದಲ್ಲಿ ಯಶಸ್ಸು ಗಳಿಸುವುದು ಮುಖ್ಯವೇ, ಆದರೆ ಅದಕ್ಕಾಗಿ ಕುಟುಂಬ ಮತ್ತು ಸ್ನೇಹಿತರನ್ನು ಕಡೆಗಣಿಸುವುದು ಸರಿಯಲ್ಲ. ಕೇವಲ ಕೆಲಸಕ್ಕೇ ಆದ್ಯತೆ ನೀಡುವುದರಿಂದ ವೈಯಕ್ತಿಕ ಸಂಬಂಧಗಳು ಸೊರಗಿ ಹೋಗುತ್ತವೆ, ಇದು ದೀರ್ಘಕಾಲದಲ್ಲಿ ನಿಮ್ಮನ್ನು ಒಂಟಿಯನ್ನಾಗಿ ಮಾಡುತ್ತದೆ.
ಹಳೆಯ ಸ್ನೇಹಿತರನ್ನೇ ನೆಚ್ಚಿಕೊಂಡಿರುವುದು ಅಥವಾ ಹೊಸ ವ್ಯಕ್ತಿಗಳ ಜೊತೆ ಮಾತನಾಡಲು ಸಂಕೋಚ ಪಡುವುದು ನಿಮ್ಮ ಸಾಮಾಜಿಕ ವಲಯವನ್ನು ಸಣ್ಣದಾಗಿಸುತ್ತದೆ. ಬದಲಾಗುತ್ತಿರುವ ಕಾಲಕ್ಕೆ ತಕ್ಕಂತೆ ಹೊಸಬರನ್ನು ಭೇಟಿ ಮಾಡದಿರುವುದು ಒಂಟಿತನಕ್ಕೆ ಮುಖ್ಯ ಕಾರಣ.
ಸರಿಯಾದ ನಿದ್ದೆ ಇಲ್ಲದಿರುವುದು ಮತ್ತು ವ್ಯಾಯಾಮ ಮಾಡದಿರುವುದು ಕೂಡ ನಿಮ್ಮ ಮನಸ್ಥಿತಿಯ ಮೇಲೆ ಪ್ರಭಾವ ಬೀರುತ್ತದೆ. ದೈಹಿಕವಾಗಿ ದಣಿದಾಗ ಅಥವಾ ಅಸ್ವಸ್ಥರಾದಾಗ ನಾವು ಸಹಜವಾಗಿಯೇ ಜನರ ಸಂಪರ್ಕದಿಂದ ದೂರ ಸರಿಯುತ್ತೇವೆ.
ಒಂಟಿತನ ಎಂಬುದು ಒಂದು ಸುಳಿಯಿದ್ದಂತೆ. ಅದರಿಂದ ಹೊರಬರಲು ಮೊದಲು ನಿಮ್ಮ ಅಭ್ಯಾಸಗಳನ್ನು ಬದಲಿಸಿಕೊಳ್ಳಿ. ಜನರೊಂದಿಗೆ ಬೆರೆಯಿರಿ, ಮುಕ್ತವಾಗಿ ಮಾತನಾಡಿ ಮತ್ತು ಡಿಜಿಟಲ್ ಲೋಕದಿಂದ ಹೊರಬಂದು ನೈಜ ಜಗತ್ತನ್ನು ಆಲಂಗಿಸಿ.
