ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಟೀಮ್ ಇಂಡಿಯಾವನ್ನು ಈವರೆಗೆ ಮುನ್ನಡೆಸಿರುವ 15 ನಾಯಕರಲ್ಲಿ ಯಾರೊಬ್ಬರೂ ಮಾಡದ ಅನಗತ್ಯ ದಾಖಲೆಯೊಂದು ಶ್ರೇಯಸ್ ಅಯ್ಯರ್ ಹೆಗಲೇರಿದೆ. ಇಂಗ್ಲೆಂಡ್ ವಿರುದ್ಧದ ದ್ವಿತೀಯ ಟಿ20 ಪಂದ್ಯದಲ್ಲಿ ಭಾರತ ತಂಡ 4 ವಿಕೆಟ್ಗಳ ಸೋಲನುಭವಿಸಿದ್ದು, ಅಯ್ಯರ್ ಅವರ ಗೆಲುವಿನ ಸುದೀರ್ಘ ಕಾಯುವಿಕೆ ಮುಂದುವರಿದಿದೆ. ಇದರೊಂದಿಗೆ ನಾಯಕತ್ವ ವಹಿಸಿಕೊಂಡ ಆರಂಭಿಕ ನಾಲ್ಕೂ ಪಂದ್ಯಗಳಲ್ಲಿ ಒಂದೂ ಜಯ ಕಾಣದ ಭಾರತದ ಮೊದಲ ಕ್ಯಾಪ್ಟನ್ ಎಂಬ ನಿರಾಶಾದಾಯಕ ಇತಿಹಾಸಕ್ಕೆ ಅವರು ಪಾತ್ರರಾಗಿದ್ದಾರೆ.
ಐರ್ಲೆಂಡ್ನಿಂದ ಇಂಗ್ಲೆಂಡ್ವರೆಗೆ ಸೋಲಿನ ಸರಣಿ
ಅಯ್ಯರ್ ನಾಯಕನಾಗಿ ಪಾದಾರ್ಪಣೆ ಮಾಡಿದ ಐರ್ಲೆಂಡ್ ವಿರುದ್ಧದ 2 ಪಂದ್ಯಗಳ ಸರಣಿಯಲ್ಲಿ ಭಾರತ 2-0 ಇಂದ ಸೋತಿತ್ತು. ಪ್ರಸ್ತುತ ಇಂಗ್ಲೆಂಡ್ ಸರಣಿಯ ಮೊದಲ ಮ್ಯಾಚ್ ಮಳೆಗೆ ಆಹುತಿಯಾಗಿದ್ದರೆ, ಎರಡನೇ ಪಂದ್ಯದಲ್ಲಿ ತಂಡ ಸೋಲೊಪ್ಪಿಕೊಂಡಿದೆ. ಅಂದರೆ ಅಯ್ಯರ್ ಸಾರಥ್ಯದಲ್ಲಿ ಆಡಿದ 4 ಪಂದ್ಯಗಳಲ್ಲಿ ಭಾರತಕ್ಕೆ ಒಂದೂ ಗೆಲುವು ಲಭಿಸಿಲ್ಲ. ಐಸಿಸಿ ಪೂರ್ಣ ಸದಸ್ಯತ್ವ ದೇಶಗಳ ಪೈಕಿ ಈ ರೀತಿ ಆರಂಭಿಕ 4 ಪಂದ್ಯ ಗೆಲ್ಲದ 9ನೇ ನಾಯಕರಾಗಿದ್ದಾರೆ ಅಯ್ಯರ್.
2021ರ ನಂತರ ದಾಖಲಾದ ಸತತ ಹಿನ್ನಡೆ
ಟೀಮ್ ಇಂಡಿಯಾ ಪರ ನಾಯಕನಾದ ಬೆನ್ನಲ್ಲೇ ಸತತ ಮೂರು ಪಂದ್ಯಗಳಲ್ಲಿ ಸೋತಿರುವುದು ಇದೇ ಮೊದಲು. ಅಷ್ಟೇ ಅಲ್ಲದೆ, 2021ರ ಬಳಿಕ ಭಾರತ ತಂಡ ಸತತವಾಗಿ 3 ಟಿ20 ಪಂದ್ಯಗಳನ್ನು ಸೋತಿರುವುದು ಕೂಡ ಇದೇ ಮೊದಲಿಗಾಗಿದೆ. ಈ ಆಘಾತಕಾರಿ ಪ್ರದರ್ಶನದಿಂದಾಗಿ ಇಂಗ್ಲೆಂಡ್ ವಿರುದ್ಧದ 5 ಪಂದ್ಯಗಳ ಸರಣಿಯಲ್ಲಿ ಭಾರತ ಸದ್ಯ 0-1 ಅಂತರದ ಹಿನ್ನಡೆ ಅನುಭವಿಸಿದೆ.
