ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರೀಚಾರ್ಜ್ ಮಾಡಿಸದೇ ಹೋದರೆ ಸಿಮ್ ಎಷ್ಟು ದಿನಗಳವರೆಗೆ ಕೆಲಸ ಮಾಡುತ್ತದೆ? ಈ ಬಗ್ಗೆ ಮಾಹಿತಿ ಇಲ್ಲಿದೆ..
ಒಂದಕ್ಕಿಂತ ಹೆಚ್ಚು ಮೊಬೈಲ್ ಸಿಮ್ಗಳನ್ನು ಹೊಂದಿರುವ ಗ್ರಾಹಕರಿಗೆ ಇದು ಮಹತ್ವದ ಮಾಹಿತಿ. ತಾವು ಎರಡನೇ ಸಿಮ್ ಅನ್ನು ರೀಚಾರ್ಜ್ ಮಾಡದೇ ಇದ್ದರೆ ಅದು ನಿಗದಿತ 90 ದಿನಗಳವರೆಗೂ ನಿಷ್ಕ್ರಿಯವಾಗುವುದಿಲ್ಲ. ಜೊತೆಗೆ ಕೇವಲ ವಾಯ್ಸ್ ಕರೆಗಳಿಗೆ ಮಾತ್ರ ಪ್ಲಾನ್ಗಳನ್ನು ರೂಪಿಸಲು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ ಟೆಲಿಕಾಂ ಕಂಪನಿಗಳಿಗೆ ನಿರ್ದೇಶನ ನೀಡಿದೆ.
ಸಿಮ್ ಕಾರ್ಡ್ಗಳ ನಿಷ್ಕ್ರಿಯತೆ ಮತ್ತು ವಾಯ್ಸ್ ಕರೆಗಳ ಯೋಜನೆಗಳಿಗೆ ಸಂಬಂಧಿಸಿದಂತೆ ಟ್ರಾಯ್ ಮಹತ್ವದ ನಿರ್ಧಾರ ಕೈಗೊಂಡಿದೆ. ಇದು ಇಂಟರ್ನೆಟ್ ಡೇಟಾ ಅಗತ್ಯವಿಲ್ಲದ ಬಳಕೆದಾರರಿಗೆ ಹೆಚ್ಚಿನ ಅನುಕೂಲ ನೀಡುತ್ತದೆ.
ಟೆಲಿಕಾಂ ಗ್ರಾಹಕ ಸಂರಕ್ಷಣಾ ನಿಯಮಗಳ 6ನೇ ತಿದ್ದುಪಡಿಯ ಪ್ರಕಾರ, ಯಾವುದೇ ಟೆಲಿಕಾಂ ಕಂಪನಿಯ ಬಳಕೆದಾರರು ತಾವು ಬಳಸುತ್ತಿರುವ ಸಿಮ್ಗಳನ್ನು ರೀಚಾರ್ಜ್ ಮಾಡದೇ ಹೋದಲ್ಲಿ ಗರಿಷ್ಠ 90 ದಿನಗಳವರೆಗೆ ಬಳಕೆ ಮಾಡಬಹುದಾಗಿದೆ. ಬಳಿಕ ರೀಚಾರ್ಜ್ ಮಾಡಲು 15 ದಿನ ಹೆಚ್ಚುವರಿ ಸಮಯ ನೀಡಲಾಗುತ್ತದೆ. ಇದಾದ ಬಳಿಕವೂ ಬಳಕೆದಾರರು ರೀಚಾರ್ಜ್ ಮಾಡದೇ ಹೋದಲ್ಲಿ ಸಿಮ್ ಅನ್ನು ಕಂಪನಿಗಳು ನಿಷ್ಕ್ರಿಯ ಮಾಡಲು ಅವಕಾಶವಿದೆ ಎಂದು ಟ್ರಾಯ್ ಹೇಳಿದೆ.