ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬಹುನಿರೀಕ್ಷಿತ ತೆಲುಗು ಸಿನಿಮಾ ‘ದಿ ಪ್ಯಾರಡೈಸ್’ ಸೆ.24ರಂದು ತೆರೆಗೆ ಬಂದಿದ್ದು, ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಚಿತ್ರದ ಕೆಲವು ಅಂಶಗಳಿಗೆ ಮೆಚ್ಚುಗೆ ವ್ಯಕ್ತವಾಗಿದ್ದರೆ, ಕಥೆಯ ನಿರೂಪಣೆ, ಸ್ಕ್ರೀನ್ಪ್ಲೇ ಹಾಗೂ ದ್ವಿತೀಯಾರ್ಧದ ಬಗ್ಗೆ ಇನ್ನು ಕೆಲವರು ಅಸಮಾಧಾನ ಹೊರಹಾಕಿದ್ದಾರೆ.
ಈ ನಡುವೆ ಸಿನಿಮಾದ ಬಗ್ಗೆ ಬಂದಿರುವ ವಿಮರ್ಶೆಗಳು ಮತ್ತು ಸಾಮಾಜಿಕ ಜಾಲತಾಣದ ಪ್ರತಿಕ್ರಿಯೆಗಳಿಗೆ ನಟ ನಾನಿ ಮುಕ್ತವಾಗಿ ಪ್ರತಿಕ್ರಿಯಿಸಿದ್ದಾರೆ.
‘ದಸರಾ’ ಚಿತ್ರದ ಬಳಿಕ ನಿರ್ದೇಶಕ ಶ್ರೀಕಾಂತ್ ಒಡೆಲಾ ಹಾಗೂ ನಾನಿ ಮತ್ತೊಮ್ಮೆ ‘ದಿ ಪ್ಯಾರಡೈಸ್’ ಮೂಲಕ ಒಂದಾಗಿದ್ದಾರೆ. ವಿಭಿನ್ನ ಕಥಾಹಂದರ, ದೊಡ್ಡ ಮಟ್ಟದ ನಿರ್ಮಾಣ ಹಾಗೂ ಆ್ಯಕ್ಷನ್ ದೃಶ್ಯಗಳ ಕಾರಣದಿಂದ ಸಿನಿಮಾ ಬಿಡುಗಡೆಗೂ ಮುನ್ನವೇ ಸಾಕಷ್ಟು ನಿರೀಕ್ಷೆ ಮೂಡಿಸಿತ್ತು. ಇದೀಗ ಸಿನಿಮಾ ಬಿಡುಗಡೆಯಾದ ಬಳಿಕ ಪ್ರೇಕ್ಷಕರ ಅಭಿಪ್ರಾಯಗಳು ವಿಭಿನ್ನವಾಗಿರುವ ಹಿನ್ನೆಲೆಯಲ್ಲಿ ನಾನಿ ತಮ್ಮ ಎಕ್ಸ್ ಖಾತೆಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ.
ನಾನಿ ಹೇಳಿದ್ದೇನು?
ನಿಮ್ಮ ಎಲ್ಲ ಪ್ರತಿಕ್ರಿಯೆಗಳನ್ನು ನೋಡಿದ್ದೇನೆ. ನೀವು ನೀಡಿದ ಪ್ರೀತಿಯನ್ನು ಸ್ವೀಕರಿಸಿದ್ದೇನೆ. ಅದೇ ರೀತಿ ನಿಮ್ಮ ಹಾಸ್ಯಭರಿತ ಟ್ರೋಲ್ಗಳನ್ನೂ ಎಂಜಾಯ್ ಮಾಡಿದ್ದೇನೆ. ಪ್ರೇಕ್ಷಕರು ಸಿನಿಮಾವನ್ನು ತಮ್ಮದೇ ಎನ್ನುವ ರೀತಿಯಲ್ಲಿ ಸ್ವೀಕರಿಸಿರುವುದು ನನ್ನ ಹೃದಯ ತುಂಬಿಸಿದೆ. ವಿಮರ್ಶಕರು ಹಾಗೂ ರಿವ್ಯೂವರ್ ಗಳಿಂದ ಚಿತ್ರದ ನ್ಯೂನತೆಗಳಿಂದಲೂ ಕಲಿತಿದ್ದೇನೆ ಎಂದು ನಾನಿ ಹೇಳಿದ್ದಾರೆ.
ಸಿನಿಮಾ ನಿರ್ಮಾಣದ ಹಿಂದೆ ತಂಡದ ಅಪಾರ ಪರಿಶ್ರಮವಿದೆ ಎಂದು ಹೇಳಿರುವ ನಾನಿ, ‘ದಿ ಪ್ಯಾರಡೈಸ್’ನ್ನು ವಿಭಿನ್ನ ಅನುಭವ ನೀಡುವ ಉದ್ದೇಶದಿಂದ ಸಾಕಷ್ಟು ಶ್ರಮದಿಂದ ರೂಪಿಸಲಾಗಿದೆ ಎಂದು ತಿಳಿಸಿದ್ದಾರೆ. ಚಿತ್ರವನ್ನು ಪ್ರೇಕ್ಷಕರು ಹೇಗೆ ಸ್ವೀಕರಿಸುತ್ತಾರೆ ಅಥವಾ ವಿಮರ್ಶಿಸುತ್ತಾರೆ ಎಂಬುದು ಅವರ ಹಕ್ಕು ಎಂದೂ ಅವರು ಹೇಳಿದ್ದಾರೆ.
ಬಾಕ್ಸ್ ಆಫೀಸ್ ಕಲೆಕ್ಷನ್
ಬಾಕ್ಸ್ ಆಫೀಸ್ ವಿಚಾರದಲ್ಲೂ ಚಿತ್ರ ಆರಂಭಿಕ ದಿನಗಳಲ್ಲಿ ಗಮನ ಸೆಳೆದಿದೆ. ವರದಿಗಳ ಪ್ರಕಾರ, ಪೇಯ್ಡ್ ಪ್ರಿವ್ಯೂ ಸೇರಿದಂತೆ ಮೊದಲ ದಿನ ಚಿತ್ರ 11.60 ಕೋಟಿ ಗಳಿಸಿದ್ದು, ಬಿಡುಗಡೆಯ ದಿನ 34.65 ಕೋಟಿ ಕಲೆಕ್ಷನ್ ಮಾಡಿದೆ. ಸೆ.25ರಂದು ಸಂಜೆಯವರೆಗೆ ಭಾರತದಲ್ಲಿ 6.58 ಕೋಟಿ ಗಳಿಸಿದ್ದು, ಒಟ್ಟು ಗಳಿಕೆ 52.83 ಕೋಟಿಗೆ ತಲುಪಿದೆ ಎಂದು ವರದಿಯಾಗಿದೆ.
ಒಟ್ಟಿನಲ್ಲಿ, ‘ದಿ ಪ್ಯಾರಡೈಸ್’ ಕುರಿತು ಪ್ರೇಕ್ಷಕರ ಅಭಿಪ್ರಾಯಗಳು ವಿಭಿನ್ನವಾಗಿದ್ದರೂ, ಬಂದಿರುವ ಪ್ರತಿಕ್ರಿಯೆಗಳನ್ನು ಸಕಾರಾತ್ಮಕವಾಗಿ ಸ್ವೀಕರಿಸಿರುವ ನಾನಿ, ಟೀಕೆಗಳಿಂದಲೂ ಕಲಿಯುವ ಮನೋಭಾವ ತೋರಿಸಿದ್ದಾರೆ.
