ಐಪಿಎಲ್ 2026ರ 14ನೇ ಪಂದ್ಯ ಕ್ರಿಕೆಟ್ ಅಭಿಮಾನಿಗಳಿಗೆ ಕೊನೆಯ ಎಸೆತದವರೆಗೂ ರೋಚಕತೆಯನ್ನು ನೀಡಿತು. ಗೆಲುವಿನ ಅಂಚಿನವರೆಗೆ ಬಂದಿದ್ದ ಡೆಲ್ಲಿ ಕ್ಯಾಪಿಟಲ್ಸ್, ಗುಜರಾತ್ ಟೈಟಾನ್ಸ್ ವಿರುದ್ಧ ಕೇವಲ ಒಂದು ರನ್ ಅಂತರದಲ್ಲಿ ಸೋಲನ್ನು ಎದುರಿಸಿತು. ಆದರೆ ಪಂದ್ಯದ ಅಂತ್ಯಕ್ಕಿಂತ ಹೆಚ್ಚು ಗಮನ ಸೆಳೆದದ್ದು ಡೇವಿಡ್ ಮಿಲ್ಲರ್ ಅವರ ಭಾವುಕ ಕ್ಷಣ.
ಕೊನೆಯ ಓವರ್ನಲ್ಲಿ ಡೆಲ್ಲಿಗೆ ಗೆಲ್ಲಲು 13 ರನ್ ಅಗತ್ಯವಿದ್ದಾಗ ಮಿಲ್ಲರ್ ಅಚ್ಚರಿಯ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ದೊಡ್ಡ ಹೊಡೆತಗಳ ಮೂಲಕ ಪಂದ್ಯವನ್ನು ಕೊನೆಯ ಎರಡು ಎಸೆತಗಳಲ್ಲಿ ಕೇವಲ 2 ರನ್ ಅಗತ್ಯಕ್ಕೆ ತಂದು ನಿಲ್ಲಿಸಿದರು. ಇದರಿಂದ ಡೆಲ್ಲಿ ಗೆಲುವಿನ ಭರವಸೆ ಹೆಚ್ಚಾಗಿತ್ತು.
ಆದರೆ ಐದನೇ ಎಸೆತದಲ್ಲಿ ಚೆಂಡನ್ನು ಹೊಡೆದ ಬಳಿಕ ಸಿಂಗಲ್ ಓಡುವ ಅವಕಾಶ ಇದ್ದರೂ ಮಿಲ್ಲರ್ ಅದನ್ನು ಕೈಬಿಟ್ಟರು. ಪಂದ್ಯವನ್ನು ಬೌಂಡರಿ ಅಥವಾ ಸಿಕ್ಸರ್ ಮೂಲಕ ಮುಗಿಸುವ ಉದ್ದೇಶ ಅವರದ್ದಾಗಿತ್ತು ಎನ್ನಲಾಗಿದೆ. ಅಂತಿಮ ಎಸೆತದಲ್ಲಿ ಪ್ರಸಿದ್ಧ್ ಕೃಷ್ಣ ಎಸೆದ ಬೌನ್ಸರ್ ಅನ್ನು ಅವರು ಸರಿಯಾಗಿ ಸಂಪರ್ಕಿಸಲು ವಿಫಲರಾದರು.
ಇದನ್ನೂ ಓದಿ:
ಬೈ ರನ್ ಪಡೆಯಲು ಯತ್ನಿಸಿದ ವೇಳೆ ಕುಲ್ದೀಪ್ ಯಾದವ್ ರನ್ ಔಟ್ ಆಗುತ್ತಿದ್ದಂತೆ ಡೆಲ್ಲಿ ಸೋಲು ಖಚಿತವಾಯಿತು. ಈ ಸೋಲು ಮಿಲ್ಲರ್ ಅವರನ್ನು ತೀವ್ರವಾಗಿ ಕಾಡಿದಂತಿದ್ದು, ಪೆವಿಲಿಯನ್ ಕಡೆ ಸಾಗುವಾಗ ಅವರು ಕಣ್ಣೀರಿಟ್ಟ ದೃಶ್ಯ ಅಭಿಮಾನಿಗಳ ಮನಸ್ಸು ಮುಟ್ಟಿತು.
ಪಂದ್ಯ ಬಳಿಕ ರಶೀದ್ ಖಾನ್, ಶುಭ್ಮನ್ ಗಿಲ್ ಮತ್ತು ಅಕ್ಷರ್ ಪಟೇಲ್ ಮಿಲ್ಲರ್ ಅವರನ್ನು ಸಮಾಧಾನಪಡಿಸಿದರು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅವರ ಸಮರ್ಪಣೆಗೆ ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
