ಮಹಿಳೆಯರ ಮಾಸಿಕ ಚಕ್ರದ ಸಮಯದಲ್ಲಿ ಆರಾಮ ಮತ್ತು ಸ್ವಚ್ಛತೆಯು ಅತಿ ಮುಖ್ಯ. ಇತ್ತೀಚಿನ ವರ್ಷಗಳಲ್ಲಿ ಪ್ಯಾಡ್ಗಳ ಪರ್ಯಾಯವಾಗಿ ಮೆನ್ಸ್ಟ್ರುವಲ್ ಕಪ್ಗಳು (Menstrual Cup) ಹೆಚ್ಚು ಜನಪ್ರಿಯವಾಗುತ್ತಿವೆ. ಆದರೆ, ಬಹುತೇಕ ಮಹಿಳೆಯರು “ಪ್ಯಾಡ್ಗಳೇ ಸುರಕ್ಷಿತ” ಎನ್ನುವ ನಂಬಿಕೆಯಿಂದ ಕಪ್ ಬಳಕೆಯಿಂದ ದೂರ ಉಳಿಯುತ್ತಾರೆ. ಹೀಗಾಗಿ, ಈ ಎರಡರ ಮಧ್ಯೆ ವ್ಯತ್ಯಾಸವೇನು? ಆರೋಗ್ಯದ ದೃಷ್ಟಿಯಿಂದ ಯಾವುದು ಉತ್ತಮ ಎಂಬುದನ್ನು ನೋಡೋಣ.
- ಸ್ವಚ್ಛತೆ ಮತ್ತು ಸೋಂಕಿನ ಅಪಾಯ: ಪ್ಯಾಡ್ಗಳನ್ನು ದೀರ್ಘ ಕಾಲ ಧರಿಸಿದರೆ ತೇವಾಂಶ ಹೆಚ್ಚಾಗಿ ಬ್ಯಾಕ್ಟೀರಿಯಾ ಬೆಳೆಯುವ ಸಾಧ್ಯತೆ ಇರುತ್ತದೆ. ಆದರೆ ಕಪ್ಗಳು ಮೆಡಿಕಲ್ ಗ್ರೇಡ್ ಸಿಲಿಕಾನ್ನಿಂದ ತಯಾರಾಗಿರುವುದರಿಂದ ಸೋಂಕಿನ ಅಪಾಯ ಕಡಿಮೆ. ಸರಿಯಾದ ರೀತಿಯಲ್ಲಿ ಸ್ವಚ್ಛಪಡಿಸಿದರೆ ಕಪ್ಗಳು ಅತ್ಯಂತ ಹೈಜಿನಿಕ್ ಆಯ್ಕೆಯಾಗುತ್ತವೆ.
- ಆರಾಮ ಮತ್ತು ಚಲನೆಯ ಸ್ವಾತಂತ್ರ್ಯ: ಕಪ್ಗಳನ್ನು ಸರಿಯಾಗಿ ಹಾಕಿಕೊಂಡರೆ ದೇಹದೊಳಗೆ ಅಸೌಕರ್ಯವಿಲ್ಲದೆ ಸರಿಯಾಗಿ ಫಿಟ್ ಆಗುತ್ತವೆ. ಹೀಗಾಗಿ ವ್ಯಾಯಾಮ, ಈಜು ಅಥವಾ ಟ್ರಾವೆಲ್ ವೇಳೆ ಕೂಡ ಚಿಂತೆ ಇಲ್ಲ. ಪ್ಯಾಡ್ಗಳು ಕೆಲವೊಮ್ಮೆ ಸೋರಿಕೆ ಅಥವಾ ಕಿರಿಕಿರಿ ಉಂಟುಮಾಡುತ್ತವೆ.
- ಪರಿಸರ ಸ್ನೇಹಿ ಆಯ್ಕೆ: ಒಂದು ಕಪ್ ಸುಮಾರು 5 ರಿಂದ 10 ವರ್ಷಗಳವರೆಗೆ ಬಳಸಬಹುದು. ಆದರೆ ಪ್ಯಾಡ್ಗಳು ಪ್ರತಿ ತಿಂಗಳು ಕಸವಾಗಿ ಪರಿಸರ ಮಾಲಿನ್ಯ ಹೆಚ್ಚಿಸುತ್ತವೆ. ಹೀಗಾಗಿ ಕಪ್ಗಳು ಪರಿಸರದ ದೃಷ್ಟಿಯಿಂದ ಹೆಚ್ಚು ಶ್ರೇಷ್ಠ.
- ವೆಚ್ಚದ ದೃಷ್ಟಿಯಿಂದ ಲಾಭಕಾರಿ: ಪ್ಯಾಡ್ಗಳ ಖರ್ಚು ಪ್ರತಿ ತಿಂಗಳು ಇರುತ್ತದೆ, ಕಪ್ ಒಮ್ಮೆ ಖರೀದಿಸಿದರೆ ವರ್ಷಗಳವರೆಗೆ ಬಳಸಬಹುದು. ದೀರ್ಘಾವಧಿಯಲ್ಲಿ ಇದು ಹೆಚ್ಚು ಆರ್ಥಿಕ ಆಯ್ಕೆ.
- ಆರೋಗ್ಯದ ದೃಷ್ಟಿಯಿಂದ ಸುರಕ್ಷತೆ: ಪ್ಯಾಡ್ಗಳಲ್ಲಿ ಬಳಸುವ ಸುಗಂಧ ಮತ್ತು ರಾಸಾಯನಿಕಗಳು ಕೆಲವರಿಗೆ ಚರ್ಮದ ಕಿರಿಕಿರಿ ಅಥವಾ ಅಲರ್ಜಿ ಉಂಟುಮಾಡಬಹುದು. ಕಪ್ಗಳು ಸಂಪೂರ್ಣ ರಾಸಾಯನಿಕ ಮುಕ್ತವಾಗಿದ್ದು ದೇಹದ ನೈಸರ್ಗಿಕ ಪಿಎಚ್ ಮಟ್ಟವನ್ನು ಕಾಪಾಡುತ್ತವೆ.
ಮೆನ್ಸ್ಟ್ರುವಲ್ ಕಪ್ ಮತ್ತು ಪ್ಯಾಡ್ ಎರಡರಲ್ಲಿಯೂ ಸೌಕರ್ಯ ಮತ್ತು ಅಪಾಯಗಳಿವೆ. ಆದರೆ ದೀರ್ಘಾವಧಿಯ ಆರೋಗ್ಯ, ಪರಿಸರ ಮತ್ತು ಆರ್ಥಿಕತೆ ಎನ್ನುವ ಮುಖ್ಯ ಮೂರು ಅಂಶಗಳ ದೃಷ್ಟಿಯಿಂದ ಮೆನ್ಸ್ಟ್ರುವಲ್ ಕಪ್ ಉತ್ತಮ ಆಯ್ಕೆ ಎನ್ನಬಹುದು. ಆದರೂ ಪ್ರಾರಂಭದಲ್ಲಿ ವೈದ್ಯರ ಸಲಹೆ ಪಡೆದು ಸರಿಯಾದ ಗಾತ್ರ ಮತ್ತು ಬಳಕೆ ವಿಧಾನ ತಿಳಿದುಕೊಳ್ಳುವುದು ಅತ್ಯಗತ್ಯ.
