ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಇತ್ತೀಚೆಗೆ ಪ್ರಕಟವಾಗಿರುವ ವರದಿಯೊಂದು ಮಂಕೀಫಾಕ್ಸ್ ಕುರಿತು ಆತಂಕಕಾರಿ ಅಂಶವೊಂದನ್ನು ಹೊರಹಾಕಿದೆ. ಬ್ರಿಟಿಷ್ ಮೆಡಿಕಲ್ ಜರ್ನಲ್ (BMJ) ನಲ್ಲಿ ಪ್ರಕಟವಾದ ಒಂದು ಅಧ್ಯಯನವು ಪ್ರಸ್ತುತ ಏಕಾಏಕಿ ಕಂಡುಬರುತ್ತಿರುವ ಮಂಕಿಪಾಕ್ಸ್ ವೈರಸ್‌ನ ರೋಗಲಕ್ಷಣಗಳು ಏಳೆಂಟುವರ್ಷಗಳ ಹಿಂದೆ ಆಫ್ರಿಕಾದಲ್ಲಿ ಪತ್ತೆಯಾದ ಮಂಕಿಫಾಕ್ಸ್‌ ಪ್ರಕರಣಗಳಿಗಿಂತ ಭಿನ್ನವಾಗಿದೆ ಎಂಬ ಅಂಶವನ್ನು ಬಹಿರಂಗ ಪಡಿಸಿದೆ. ಅದು ಹಿಂದಿನ ಮಂಕಿಫಾಕ್ಸ್‌ ಪ್ರಕರಣಗಳಿಗಿಂತ ಗಮನಾರ್ಹ ವ್ಯತ್ಯಾಸಗಳನ್ನು ಹೊಂದಿವೆ ಎಂದು ಆ ವರದಿ ಹೇಳಿದೆ.
ಈ ವರದಿಯ ಅಧ್ಯಯನವು 197 ಜನರ ಅವಲೋಕನದ ವಿಶ್ಲೇಷಣೆಯನ್ನು ಮಾಡಿದೆ. ಅಧ್ಯಯನ ಮಾಡಿರುವ ಪ್ರಕರಣಗಳಲ್ಲಿ ಎಲ್ಲರೂ ಪುರುಷರಾಗಿದ್ದು ಲಂಡನ್‌ನಲ್ಲಿ ರೋಗಕ್ಕೆ ತುತ್ತಾದವರಾಗಿದ್ದಾರೆ. 197 ಪ್ರಕರಣಗಳಲ್ಲಿ 196 ಜನರು ತಮ್ಮನ್ನು ಸಲಿಂಗಕಾಮಿ, ದ್ವಿಲಿಂಗಿ ಅಥವಾ ಪುರುಷರೊಂದಿಗೆ ಸಂಭೋಗಿಸುವ ಇತರ ಪುರುಷರು ಎಂದು ಗುರುತಿಸಿಕೊಂಡಿದ್ದಾರೆ.
ಅಧ್ಯಯನದ ಪ್ರಕಾರ, ಈ ಹಿಂದೆ ಅಂದರೆ 2007-11ರಲ್ಲಿ ಕಾಂಗೋ ಗಣರಾಜ್ಯದಲ್ಲಿ ಮತ್ತು 2017-18ರಲ್ಲಿ ನೈಜೀರಿಯಾದಲ್ಲಿ ವರದಿಯಾಗಿದ್ದ ಮಂಕಿಫಾಕ್ಸ್‌ ಗೆ ಹೋಲಿಸಿದರೆ ಪ್ರಸ್ತುತ ಏಕಾಏಕಿ ಗುದನಾಳದ ನೋವು ಮತ್ತು ಶಿಶ್ನ ಊತ (ಎಡಿಮಾ) ಸಾಮಾನ್ಯವಾಗಿ ಕಂಡುಬರುತ್ತಿದೆ.
ಈ ರೋಗಲಕ್ಷಣಗಳನ್ನು ಹೊಂದಿರುವ ರೋಗಿಗಳನ್ನು ಮಂಕಿಪಾಕ್ಸ್ ವೈರಸ್‌ಗಾಗಿ ಪರೀಕ್ಷಿಸಲು ವೈದ್ಯರು ಶಿಫಾರಸು ಮಾಡಿದ್ದಾರೆ. ಇದಲ್ಲದೆ, ಮಂಕಿಪಾಕ್ಸ್‌ಗೆ ಧನಾತ್ಮಕವಾಗಿ ಪರೀಕ್ಷಿಸಿದ ರೋಗಿಗಳು ಮತ್ತು ವ್ಯಾಪಕವಾದ ಶಿಶ್ನ ಗಾಯಗಳು ಅಥವಾ ತೀವ್ರವಾದ ಗುದನಾಳದ ನೋವಿನ ಲಕ್ಷಣಗಳನ್ನು ಪ್ರದರ್ಶಿಸುತ್ತಿರುವವರು ಸದ್ಯ ನಡೆಯುತ್ತಿರುವ ಪರಿಶೀಲನೆಗೆ ಒಳಪಡಬೇಕು ಎಂದಿದ್ದಾರೆ. ಕೆಲವು ರೋಗಲಕ್ಷಣಗಳನ್ನು ಹೊಂದಿರುವ ವ್ಯಕ್ತಿಗಳಿಂದ ರೋಗ ಲಕ್ಷಣಗಳಿಲ್ಲದ ವ್ಯಕ್ತಿಗಳಿಗೆ ವೈರಸ್ ಹರಡುವ ಸಾಧ್ಯತೆ ಹೆಚ್ಚಿದೆ ಎಂದು ಅಧ್ಯಯನವು ಬಹಿರಂಗಪಡಿಸಿದೆ. ಏಕೆಂದರೆ ಅಧ್ಯಯನದಲ್ಲಿ ಭಾಗವಹಿಸಿದವರ ಒಂದು ಭಾಗವು (26.5%) ಮಂಕಿಪಾಕ್ಸ್ ಸೋಂಕನ್ನು ಹೊಂದಿರುವ ಯಾರೊಂದಿಗಾದರೂ ಸಂಪರ್ಕವನ್ನು ಹೊಂದಿರುವ ಕುರಿತು ದೃಢಪಡಿಸಿದೆ.
