ನಮ್ಮ ಜೀವನದಲ್ಲಿ ನಾವು ಗಳಿಸುವ ಗೌರವ ಮತ್ತು ಯಶಸ್ಸು ಕೇವಲ ನಮ್ಮ ಕಠಿಣ ಪರಿಶ್ರಮದಿಂದ ಮಾತ್ರವಲ್ಲ, ನಾವು ಇತರರೊಂದಿಗೆ ಹೇಗೆ ನಡೆದುಕೊಳ್ಳುತ್ತೇವೆ ಎಂಬುದರ ಮೇಲೂ ಅವಲಂಬಿತವಾಗಿರುತ್ತದೆ. ಹಿರಿಯರು ಮತ್ತು ಶಾಸ್ತ್ರಗಳ ಪ್ರಕಾರ, ಕೆಲವು ನಿರ್ದಿಷ್ಟ ವ್ಯಕ್ತಿಗಳಿಗೆ ನಾವು ತೋರುವ ಗೌರವವು ನಮ್ಮ ಭವಿಷ್ಯವನ್ನು ನಿರ್ಧರಿಸುತ್ತದೆ. ತಿಳಿಯದೋ ಅಥವಾ ಅಚಾತುರ್ಯದಿಂದಲೋ ಈ ಕೆಳಗಿನ ಜನರನ್ನು ಅವಮಾನಿಸಿದರೆ, ಅದು ನಮ್ಮ ವ್ಯಕ್ತಿತ್ವಕ್ಕೆ ಕುಂದು ತರುವುದಲ್ಲದೆ ಜೀವನದಲ್ಲಿ ಸಂಕಷ್ಟಗಳನ್ನು ತಂದೊಡ್ಡಬಹುದು.
ನಮಗೆ ಹಸಿವಾದಾಗ ತುತ್ತು ಅನ್ನ ನೀಡುವ ರೈತರು ಭೂಮಿಯ ಮೇಲಿರುವ ದೈವಸ್ವರೂಪಿಗಳು. ಆಹಾರದ ಮಹತ್ವ ಅರಿತವರು ಯಾರೂ ರೈತನನ್ನು ಅಥವಾ ಆಹಾರವನ್ನು ಅವಮಾನಿಸುವುದಿಲ್ಲ. ಕಷ್ಟಪಟ್ಟು ಬೆಳೆ ಬೆಳೆಯುವವರನ್ನು ಲೇವಡಿ ಮಾಡುವುದು ಅಥವಾ ಅವರ ಶ್ರಮವನ್ನು ಕಡೆಗಣಿಸುವುದು ನಿಮ್ಮ ಪುಣ್ಯದ ಫಲವನ್ನು ಕಡಿಮೆ ಮಾಡುತ್ತದೆ.
“ಗುರು ಬ್ರಹ್ಮ ಗುರು ವಿಷ್ಣು..” ಎಂಬ ಮಾತಿನಂತೆ, ನಮಗೆ ಅಕ್ಷರ ಕಲಿಸಿದ ಅಥವಾ ಜೀವನದ ದಾರಿ ತೋರಿಸಿದ ಗುರುಗಳನ್ನು ಯಾವತ್ತೂ ಹಗುರವಾಗಿ ಕಾಣಬಾರದು. ಗುರುಗಳ ಆಶೀರ್ವಾದವಿಲ್ಲದೆ ಜ್ಞಾನವು ಸಿದ್ಧಿಸುವುದಿಲ್ಲ. ಅವರನ್ನು ಅವಮಾನಿಸುವುದು ನಿಮ್ಮ ಪ್ರಗತಿಗೆ ನೀವೇ ಅಡ್ಡಗೋಡೆ ಹಾಕಿಕೊಂಡಂತೆ.
ನಮ್ಮನ್ನು ಈ ಜಗತ್ತಿಗೆ ತಂದ ತಂದೆ-ತಾಯಿ ಮತ್ತು ಅನುಭವದ ಬುತ್ತಿ ಹೊತ್ತಿರುವ ಹಿರಿಯರನ್ನು ಗೌರವಿಸುವುದು ನಮ್ಮ ಆದ್ಯ ಕರ್ತವ್ಯ. ವಯಸ್ಸಾದ ಕಾಲದಲ್ಲಿ ಅವರನ್ನು ಕಡೆಗಣಿಸುವುದು ಅಥವಾ ಕಠೋರ ಮಾತುಗಳಿಂದ ನೋಯಿಸುವುದು ದೊಡ್ಡ ಪಾಪವೆಂದು ಪರಿಗಣಿಸಲಾಗುತ್ತದೆ. ಹಿರಿಯರ ಹರಕೆ ಸದಾ ನಿಮ್ಮನ್ನು ರಕ್ಷಿಸುತ್ತದೆ.
ನಾವು ಸೋತು ಸುಣ್ಣವಾದಾಗ ಅಥವಾ ದಿಕ್ಕು ತೋಚದ ಸ್ಥಿತಿಯಲ್ಲಿದ್ದಾಗ ಯಾರು ನಮಗೆ ಸಹಾಯ ಹಸ್ತ ಚಾಚಿದ್ದಾರೋ, ಅವರನ್ನು ಜೀವನಪರ್ಯಂತ ನೆನಪಿಸಿಕೊಳ್ಳಬೇಕು. ಕಾಲ ಬದಲಾದಂತೆ ಅವರ ಸಹಾಯವನ್ನು ಮರೆತು ಅವರನ್ನು ಅವಮಾನಿಸಿದರೆ, ಅದು ಕೃತಘ್ನತೆಯಾಗುತ್ತದೆ. ಇಂತಹ ಗುಣವು ಮನುಷ್ಯನನ್ನು ಪತನದತ್ತ ಕೊಂಡೊಯ್ಯುತ್ತದೆ.
ಯಾವುದೇ ಕೆಲಸವು ಸಣ್ಣದಲ್ಲ. ನಮ್ಮ ಸುತ್ತಮುತ್ತಲಿನ ಪರಿಸರವನ್ನು ಸ್ವಚ್ಛವಾಗಿಡುವ ಅಥವಾ ನಮಗೆ ದಿನನಿತ್ಯದ ಸೇವೆ ನೀಡುವ ಜನರನ್ನು ಕೀಳಾಗಿ ಕಾಣುವುದು ಅಮಾನವೀಯ. ಅವರ ಶ್ರಮಕ್ಕೆ ಬೆಲೆ ನೀಡಿ, ಗೌರವದಿಂದ ನಡೆಸಿಕೊಂಡರೆ ಸಮಾಜದಲ್ಲಿ ನಿಮ್ಮ ಗೌರವವೂ ಹೆಚ್ಚಾಗುತ್ತದೆ.
ನೆನಪಿಡಿ.. ಗೌರವ ಎನ್ನುವುದು ಕೊಟ್ಟು ಪಡೆಯುವಂಥದ್ದು. ನಾವು ಇತರರಿಗೆ ನೀಡುವ ಮರ್ಯಾದೆಯೇ ನಮಗೆ ಮರಳಿ ಬರುತ್ತದೆ.
