ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದೇಶಾದ್ಯಂತ ದಸರಾ ಸಂಭ್ರಮ ಕಳೆಗಟ್ಟಿದ್ದು, ಒಂಬತ್ತು ದಿನಗಳ ಶಕ್ತಿ ಆರಾಧನೆಯ ನವರಾತ್ರಿ ಉತ್ಸವಕ್ಕೆ ಇಂದಿನಿಂದ ಚಾಲನೆ ಸಿಕ್ಕಿದೆ. ಶಕ್ತಿ ಸ್ವರೂಪಿಣಿಯಾದ ಜಗನ್ಮಾತೆಯನ್ನು ಆರಾಧಿಸುವ ಈ ಶುಭ ಪರ್ವದಲ್ಲಿ ಮೊದಲ ದಿನ ಯಾವ ದೇವತೆಯನ್ನು ಪೂಜಿಸಬೇಕು, ಪೂಜಾ ವಿಧಿವಿಧಾನಗಳೇನು ಎನ್ನುವ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಮೊದಲ ದಿನ ಶೈಲಪುತ್ರಿ ದೇವಿಯ ಆರಾಧನೆ
ನವರಾತ್ರಿಯ ಪ್ರಥಮ ದಿನದಂದು ನವದುರ್ಗೆಯರ ಮೊದಲ ರೂಪವಾದ ‘ಮಾತಾ ಶೈಲಪುತ್ರಿ’ ಯನ್ನು ಶ್ರದ್ಧಾಭಕ್ತಿಯಿಂದ ಪೂಜಿಸಲಾಗುತ್ತದೆ. ಪರ್ವತರಾಜ ಹಿಮವಂತನ ಮಗಳಾಗಿ ಜನ್ಮತಾಳಿದ ಕಾರಣ ಈ ದೇವಿಗೆ ‘ಶೈಲಪುತ್ರಿ’ ಎಂಬ ಹೆಸರು ಬಂದಿದೆ. ದೇವಿಯು ನಂದಿ ಬಸವನ ಮೇಲೆ ಸವಾರಳಾಗಿ, ಒಂದು ಕೈಯಲ್ಲಿ ತ್ರಿಶೂಲ ಹಾಗೂ ಇನ್ನೊಂದು ಕೈಯಲ್ಲಿ ಕಮಲದ ಹೂವನ್ನು ಹಿಡಿದು ನಗೆಬೀರುತ್ತಾ ಭಕ್ತರಿಗೆ ದರುಶನ ನೀಡುತ್ತಾಳೆ. ದೇವಿಯ ಈ ಸ್ವರೂಪವು ದೃಢತೆ, ತಾಳ್ಮೆ ಮತ್ತು ಸ್ಥಿರತೆಗೆ ಸಂಕೇತವಾಗಿದೆ.
ಘಟಸ್ಥಾಪನೆ
ನವರಾತ್ರಿಯ ಮೊದಲ ದಿನದ ಅತ್ಯಂತ ಪ್ರಮುಖ ಧಾರ್ಮಿಕ ವಿಧಿ ಎಂದರೆ ಕಲಶ ಸ್ಥಾಪನೆ ಅಥವಾ ಘಟಸ್ಥಾಪನೆ. ಈ ದಿನ ಮನೆಯ ಪೂಜಾ ಕೊಠಡಿಯನ್ನು ಶುಚಿಗೊಳಿಸಿ, ತಾಮ್ರ ಅಥವಾ ಹಿತ್ತಾಳೆಯ ಕಲಶದಲ್ಲಿ ನೀರು, ಅಕ್ಷತೆ, ನಾಣ್ಯಗಳನ್ನು ಹಾಕಿ, ಮಾವಿನ ಎಲೆ ಹಾಗೂ ತೆಂಗಿನಕಾಯಿಯನ್ನಿಟ್ಟು ಶಾಸ್ತ್ರೋಕ್ತವಾಗಿ ಸ್ಥಾಪಿಸಲಾಗುತ್ತದೆ. ಕೆಲವರು ಕಲಶದ ಜೊತೆಗೆ ಸಪ್ತಧಾನ್ಯಗಳನ್ನು ಬಿತ್ತಿ ನವರಾತ್ರಿಯ ವ್ರತವನ್ನು ಪ್ರಾರಂಭಿಸುತ್ತಾರೆ.
ಶೈಲಪುತ್ರಿ ದೇವಿಯ ಪೂಜೆಯ ಮಹತ್ವ ಮತ್ತು ಬಣ್ಣ
ಪರ್ವತದ ಮಗಳಾದ ಶೈಲಪುತ್ರಿ ದೇವಿ ದೃಢತೆ, ಶಾಂತಿ ಮತ್ತು ಸ್ಥಿರತೆಯ ಸಂಕೇತ. ಈಕೆಯನ್ನು ಪೂಜಿಸುವುದರಿಂದ ಜೀವನದಲ್ಲಿ ಬರುವ ಕಷ್ಟಗಳನ್ನು ಎದುರಿಸುವ ಶಕ್ತಿ ಸಿಗುತ್ತದೆ.
ಇಂದಿನ ವಿಶೇಷ ಬಣ್ಣ: ನವರಾತ್ರಿಯ ಮೊದಲ ದಿನವಾದ ಇಂದು ಕಿತ್ತಳೆ ಬಣ್ಣಕ್ಕೆ ಹೆಚ್ಚಿನ ಪ್ರಾಮುಖ್ಯತೆಯಿದೆ. ಇದು ಉತ್ಸಾಹ, ಶಕ್ತಿ ಮತ್ತು ನವಚೈತನ್ಯವನ್ನು ಸೂಚಿಸುತ್ತದೆ.
ನೈವೇದ್ಯ: ದೇವಿಗೆ ಇಂದು ಶುದ್ಧವಾದ ತುಪ್ಪ ಅಥವಾ ಹಾಲಿನಿಂದ ತಯಾರಿಸಿದ ಸಿಹಿ ಪದಾರ್ಥಗಳನ್ನು ನೈವೇದ್ಯವಾಗಿ ಸಮರ್ಪಿಸಲಾಗುತ್ತದೆ.
ಭಕ್ತಿಯಿಂದ ತಾಯಿ ಶೈಲಪುತ್ರಿಯನ್ನು ಸ್ಮರಿಸಿದರೆ ಮನೆಯಲ್ಲಿ ಸುಖ, ಶಾಂತಿ ಮತ್ತು ಸಮೃದ್ಧಿ ನೆಲೆಸುತ್ತದೆ ಎಂಬುದು ಭಕ್ತರ ನಂಬಿಕೆಯಾಗಿದೆ.
