ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಐಪಿಎಲ್ನಲ್ಲಿ ಹಲವು ಬಾರಿ ದೊಡ್ಡ ನಿರೀಕ್ಷೆ ಮೂಡಿಸಿದ್ದರೂ ಡೆಲ್ಲಿ ಕ್ಯಾಪಿಟಲ್ಸ್ಗೆ ಇನ್ನೂ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗಿಲ್ಲ. ಹೀಗಾಗಿ IPL 2027ಕ್ಕೂ ಮುನ್ನ ತಂಡದಲ್ಲಿ ದೊಡ್ಡ ಬದಲಾವಣೆಗೆ ಸಿದ್ಧತೆ ನಡೆಯುತ್ತಿರುವಂತೆ ಕಾಣುತ್ತಿದೆ.
ಈ ಬಾರಿ ಡಿಸಿಯ ಹಿಂದೆ ನಿಂತಿರುವ ಹೆಸರುಗಳು ಕ್ರಿಕೆಟ್ ಅಭಿಮಾನಿಗಳ ಗಮನ ಸೆಳೆಯುತ್ತಿವೆ. ಸೌರವ್ ಗಂಗೂಲಿ ಮತ್ತು ಯುವರಾಜ್ ಸಿಂಗ್ ತಂಡದ ಹೊಸ ಜವಾಬ್ದಾರಿ ವಹಿಸಿಕೊಳ್ಳುವ ಸಾಧ್ಯತೆ ಇದೀಗ ಹೆಚ್ಚಾಗಿದೆ.
ಬೆಂಗಳೂರಿನಲ್ಲಿ ನಡೆದ DC ಟ್ರಯಲ್ಸ್
ಬೆಂಗಳೂರಿನ ಜಸ್ಟ್ ಕ್ರಿಕೆಟ್ ಅಕಾಡೆಮಿಯಲ್ಲಿ ನಡೆದ ಡೆಲ್ಲಿ ಕ್ಯಾಪಿಟಲ್ಸ್ನ ಆಟಗಾರರ ಆಯ್ಕೆ ಟ್ರಯಲ್ಸ್ನಲ್ಲಿ ಸೌರವ್ ಗಂಗೂಲಿ ಮತ್ತು ಯುವರಾಜ್ ಸಿಂಗ್ ಕಾಣಿಸಿಕೊಂಡರು. ಯುವ ಬ್ಯಾಟರ್ಗಳ ಸಾಮರ್ಥ್ಯವನ್ನು ಪರಿಶೀಲಿಸಿದ ಯುವರಾಜ್, ಪವರ್ ಹಿಟ್ಟಿಂಗ್ ಸೇರಿದಂತೆ ಬ್ಯಾಟಿಂಗ್ನ ಹಲವು ಅಂಶಗಳ ಬಗ್ಗೆ ಆಟಗಾರರಿಗೆ ಸಲಹೆ ನೀಡಿದರು. ಗಂಗೂಲಿ ಕೂಡ ತಂಡದ ಭವಿಷ್ಯದ ಯೋಜನೆಗಳ ಬಗ್ಗೆ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ಮಾಜಿ ಸ್ಪಿನ್ನರ್ ಅಮಿತ್ ಮಿಶ್ರಾ ಕೂಡ ಟ್ರಯಲ್ಸ್ನಲ್ಲಿ ಉಪಸ್ಥಿತರಿದ್ದರು.
DC ಕೋಚಿಂಗ್ ತಂಡದಲ್ಲಿ ಬದಲಾವಣೆ?
ಮುಂಬರುವ IPL ಸೀಸನ್ನಲ್ಲಿ ಸೌರವ್ ಗಂಗೂಲಿ ಪ್ರಮುಖ ಕೋಚಿಂಗ್ ಜವಾಬ್ದಾರಿ ಅಥವಾ ಕ್ರಿಕೆಟ್ ನಿರ್ದೇಶಕರಾಗಿ ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ. ಯುವರಾಜ್ ಸಿಂಗ್ ಬ್ಯಾಟಿಂಗ್ ಕೋಚ್ ಅಥವಾ ಮೆಂಟರ್ ಪಾತ್ರದಲ್ಲಿ ತಂಡ ಸೇರಿಕೊಳ್ಳಬಹುದು. ಅಮಿತ್ ಮಿಶ್ರಾ ಸ್ಪಿನ್ ಬೌಲಿಂಗ್ ವಿಭಾಗದ ಜವಾಬ್ದಾರಿ ಪಡೆಯುವ ಸಾಧ್ಯತೆ ಇದೆ.
ಇದನ್ನೂ ಓದಿ:
JSW ಸ್ಪೋರ್ಟ್ಸ್ಗೆ ನಿರ್ವಹಣೆ
2027 ಮತ್ತು 2028ರ ಅವಧಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪುರುಷರ ತಂಡದ ಕಾರ್ಯಾಚರಣೆಯನ್ನು JSW ಸ್ಪೋರ್ಟ್ಸ್ ನಿರ್ವಹಿಸಲಿದೆ. ಇದೇ ಹಿನ್ನೆಲೆಯಲ್ಲಿ ಕೋಚಿಂಗ್ ವಿಭಾಗದಲ್ಲೂ ಹೊಸ ಮುಖಗಳನ್ನು ಕರೆತರುವ ಪ್ರಯತ್ನ ನಡೆಯುತ್ತಿದೆ.
ಯುವರಾಜ್-ಗಂಗೂಲಿ ಜೋಡಿಯಿಂದ ಹೊಸ ನಿರೀಕ್ಷೆ
ಯುವ ಆಟಗಾರರಿಗೆ ಮಾರ್ಗದರ್ಶನ ನೀಡುವಲ್ಲಿ ಯುವರಾಜ್ ಸಿಂಗ್ ಅನುಭವ, ಗಂಗೂಲಿಯ ನಾಯಕತ್ವ ಮತ್ತು ಕ್ರಿಕೆಟ್ ಆಡಳಿತದ ಜ್ಞಾನ ಡೆಲ್ಲಿ ಕ್ಯಾಪಿಟಲ್ಸ್ಗೆ ಬಲ ನೀಡಬಹುದು. IPL 2027 ಮೆಗಾ ಹರಾಜಿಗೂ ಮುನ್ನವೇ ಈ ಬದಲಾವಣೆಗಳು ನಡೆದರೆ, ಮುಂದಿನ ಸೀಸನ್ನಲ್ಲಿ DC ಹೊಸ ರೂಪದಲ್ಲಿ ಕಣಕ್ಕಿಳಿಯುವ ಸಾಧ್ಯತೆಯಿದೆ.
