ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಉತ್ತರ ಕೊರಿಯಾದ ಅತ್ಯಂತ ಮಹತ್ವಾಕಾಂಕ್ಷೆಯ ಬೇಹುಗಾರಿಕಾ ಉಪಗ್ರಹವು ಸಮುದ್ರಕ್ಕೆ ಅಪ್ಪಳಿಸಿದೆ. ಉತ್ತರ ಕೊರಿಯಾದ ಅಧ್ಯಕ್ಷ ಕಿಮ್ ಜಾಂಗ್ ಉನ್ ಅವರು ಈ ಉಪಗ್ರಹ ಉಡಾವಣೆಯನ್ನು ಅತ್ಯಂತ ಮಹತ್ವದ್ದಾಗಿ ಪರಿಗಣಿಸಿದ್ದಾರೆ. ಜಪಾನ್ ಮತ್ತು ದಕ್ಷಿಣ ಕೊರಿಯಾದ ಆಕ್ಷೇಪಣೆಗಳಿಗೆ ಗಮನ ಕೊಡದೆ ಈ ಪ್ರಯೋಗವನ್ನು ನಡೆಸಲಾಯಿತು. ಉಪಗ್ರಹ ಉಡಾವಣೆ ವೇಳೆ ರಾಕೆಟ್ ನಲ್ಲಿ ತಾಂತ್ರಿಕ ದೋಷ ಉಂಟಾಗಿ ಸಮುದ್ರದಲ್ಲಿ ಕುಸಿದು ಬಿದ್ದಿರುವುದನ್ನು ಮಾಧ್ಯಮಗಳು ಬಹಿರಂಗಪಡಿಸಿವೆ.
ಕಿಮ್ ಈ ಪ್ರಯೋಗಕ್ಕೆ ಹೆಚ್ಚಿನ ಪ್ರಾಮುಖ್ಯತೆಯನ್ನು ನೀಡಿದರು. ಅವರೇ ಹೋಗಿ ವಿಜ್ಞಾನಿಗಳೊಂದಿಗೆ ಮಾತನಾಡಿ ಪ್ರಯೋಗವನ್ನು ಪರಿಶೀಲಿಸಿದರು. ರಾಕೆಟ್ ಉಡಾವಣಾ ಕೇಂದ್ರಕ್ಕೆ ಇತ್ತೀಚೆಗೆ ಮಗಳು ಝೂಯಿ ಜೊತೆಗೂಡಿ ಭೇಟಿ ನೀಡಿದ್ದರು. ಉತ್ತರ ಕೊರಿಯಾದ ಅಧಿಕಾರಿಗಳ ಪ್ರಕಾರ, ಉತ್ತರ ಪ್ಯೋಂಗನ್ ಪ್ರಾಂತ್ಯದ ಚೋಲ್ಸನ್ ಕೌಂಟಿಯಲ್ಲಿರುವ ಸೊಹೆ ಉಪಗ್ರಹ ಉಡಾವಣಾ ಕೇಂದ್ರದಿಂದ ಚೋಲ್ಲಿಮಾ-1 ಎಂಬ ರಾಕೆಟ್‌ನಿಂದ ಮಲ್ಲಿಗ್ಯಾಂಗ್-1 ಎಂಬ ಮಿಲಿಟರಿ ಪತ್ತೇದಾರಿ ಉಪಗ್ರಹವನ್ನು ಉಡಾವಣೆ ಮಾಡಲಾಯಿತು. ರಾಕೆಟ್‌ನ ಎರಡನೇ ಹಂತ ಮುಗಿದ ಬಳಿಕ ಎಂಜಿನ್‌ ಅಸಮರ್ಪಕವಾಗಿ ಕಾರ್ಯನಿರ್ವಹಿಸಿ ಸಾಗರಕ್ಕೆ ಅಪ್ಪಳಿಸಿತು. ವಿಫಲ ಉಡಾವಣೆಯ ಕಾರಣಗಳನ್ನು ತನಿಖೆ ಮಾಡಿದ ನಂತರ ಶೀಘ್ರದಲ್ಲೇ ಎರಡನೇ ಪರಮಾಣು ಪರೀಕ್ಷೆಯನ್ನು ನಡೆಸುವುದಾಗಿ ಉತ್ತರ ಕೊರಿಯಾ ಮಾಧ್ಯಮ ತಿಳಿಸಿದೆ.
ಉತ್ತರ ಕೊರಿಯಾ ರಾಕೆಟ್ ಉಡಾವಣೆ ನಡೆಸಿದೆ ಎಂದು ದಕ್ಷಿಣ ಕೊರಿಯಾದ ಸೇನೆ ಬಹಿರಂಗಪಡಿಸಿದೆ. ಉತ್ತರ ಕೊರಿಯಾ ಒಂದು ದಿನ ಮುಂಚಿತವಾಗಿ ರಾಕೆಟ್ ಉಡಾವಣೆಯ ಬಗ್ಗೆ ಜಪಾನ್‌ಗೆ ತಿಳಿಸಿತ್ತು. ಜಪಾನ್ ಮತ್ತು ದಕ್ಷಿಣ ಕೊರಿಯಾ ಈ ಪ್ರಯೋಗವನ್ನು ಬಲವಾಗಿ ಟೀಕಿಸಿವೆ. ಬ್ಯಾಲಿಸ್ಟಿಕ್ ಕ್ಷಿಪಣಿ ತಂತ್ರಜ್ಞಾನವನ್ನು ಒಳಗೊಂಡ ಯಾವುದೇ ಪರೀಕ್ಷೆಗಳನ್ನು ನಡೆಸದಂತೆ ತಡೆಯಲು ಯುಎನ್ ನಿರ್ಬಂಧಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಉತ್ತರ ಕೊರಿಯಾವನ್ನು ಟೀಕಿಸಲಾಗಿದೆ.
