ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಜಗತ್ತಿನಲ್ಲಿ ಅಮೆರಿಕ ಮಾತ್ರವೇ ಇಸ್ರೇಲ್ನ ಏಕೈಕ ಮತ್ತು ಪ್ರಬಲ ರಕ್ಷಕ ಎಂಬ ಯುಎಸ್ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಅವರ ಅಭಿಪ್ರಾಯವನ್ನು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸ್ಪಷ್ಟವಾಗಿ ನಿರಾಕರಿಸಿದ್ದಾರೆ. ವಾಷಿಂಗ್ಟನ್ ಜೊತೆಗಿನ ಸಂಬಂಧವನ್ನು ಗೌರವಿಸುತ್ತಲೇ, ಜಾಗತಿಕವಾಗಿ ತಮಗೆ ಭಾರತದಂತಹ ಪ್ರಭಾವಿ ದೇಶಗಳ ದೃಢ ಬೆಂಬಲವಿದೆ ಎಂದು ನೆತನ್ಯಾಹು ಹೆಮ್ಮೆಯಿಂದ ಪ್ರತಿಪಾದಿಸಿದ್ದಾರೆ.
ಭಾರತದ ಅಗಾಧ ಬೆಂಬಲಕ್ಕೆ ಪ್ರಶಂಸೆ
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇಸ್ರೇಲ್ನ ಪರಮ ಆಪ್ತರೆಂಬುದನ್ನು ಒಪ್ಪಿಕೊಂಡ ನೆತನ್ಯಾಹು, ವ್ಯಾನ್ಸ್ ಅವರ ಎಲ್ಲ ನಿಲುವುಗಳನ್ನು ಸ್ವೀಕರಿಸಲು ಸಾಧ್ಯವಿಲ್ಲ ಎಂದಿದ್ದಾರೆ. ಈ ಸಂದರ್ಭದಲ್ಲಿ 140 ಕೋಟಿ ಜನಸಂಖ್ಯೆಯ ಭಾರತವನ್ನು ವಿಶೇಷವಾಗಿ ಸ್ಮರಿಸಿದ ಅವರು, “ನನ್ನ ಫೇಸ್ಬುಕ್ ಪುಟವನ್ನು ಗಮನಿಸಿದರೆ ಸಾಕು, ಭಾರತೀಯರು ನಮ್ಮ ಮೇಲೆ ಸುರಿಸುತ್ತಿರುವ ಅಪಾರವಾದ ಪ್ರೀತಿ ಮತ್ತು ಜಾಗತಿಕ ಬೆಂಬಲದ ಅಲೆ ಯಾರಿಗಾದರೂ ಅರ್ಥವಾಗುತ್ತದೆ” ಎಂದು ಕೃತಜ್ಞತೆ ಸಲ್ಲಿಸಿದರು.
ಸಂಘರ್ಷಕ್ಕೆ ಕಾರಣವಾದ ವ್ಯಾನ್ಸ್ ಹೇಳಿಕೆ
ಇರಾನ್ ಹಾಗೂ ಅಮೆರಿಕ ನಡುವಿನ ಶಾಂತಿ ಒಪ್ಪಂದ ಪ್ರಕ್ರಿಯೆಯನ್ನು ಇಸ್ರೇಲ್ ವಿರೋಧಿಸುತ್ತಿರುವುದಕ್ಕೆ ಜೆಡಿ ವ್ಯಾನ್ಸ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ಇಸ್ರೇಲ್ ಕೇವಲ ಸೇನಾ ಬಲದಿಂದಲೇ ಎಲ್ಲಾ ಬಿಕ್ಕಟ್ಟುಗಳನ್ನು ಪರಿಹರಿಸಲಾಗದು ಮತ್ತು ಜಗತ್ತಿನಲ್ಲಿ ಟ್ರಂಪ್ ಹೊರತಾಗಿ ಇಸ್ರೇಲ್ಗೆ ಬೇರೆ ಶಕ್ತಿಶಾಲಿ ಮಿತ್ರರಿಲ್ಲ ಎಂದು ವ್ಯಾನ್ಸ್ ಈ ಹಿಂದೆ ಕಠಿಣ ಎಚ್ಚರಿಕೆ ನೀಡಿದ್ದರು. ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ತನಗೆ ಬೇರೆ ಆಪ್ತ ರಾಷ್ಟ್ರಗಳೂ ಇವೆ ಎಂದು ಸ್ಪಷ್ಟಪಡಿಸಿದೆ.
