ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಪ್ರಧಾನಿ ನರೇಂದ್ರ ಮೋದಿ ಅಸ್ಸಾಂ ಮೊದಲ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲಿಗೆ ವಿಡಿಯೋ ಕಾನ್ಫರೆನ್ಸಿಂಗ್ ಮೂಲಕ ಇಂದು ಚಾಲನೆ ನೀಡಿದರು.
ವಂದೇ ಭಾರತ್ ಪಶ್ಚಿಮ ಬಂಗಾಳದ ನ್ಯೂ ಜಲ್ಪೈಗುರಿ ನಿಲ್ದಾಣದಿಂದ ಅಸ್ಸಾಂನ ಗುವಾಹಟಿಗೆ ಸಂಚರಿಸಲಿದೆ. ಈ ಅತ್ಯಾಧುನಿಕ ರೈಲು, ವೇಗ, ಸೌಕರ್ಯ ಮತ್ತು ವರ್ಧಿತ ಸಂಪರ್ಕವನ್ನು ಒದಗಿಸುವ ಜತೆಗೆ ನಮ್ಮ ಬದ್ಧತೆಯನ್ನು ಸಾಕಾರಗೊಳಿಸುತ್ತದೆ ಎಂದು ಪ್ರಧಾನಿ ಮೋದಿ ಭಾನುವಾರ ಟ್ವೀಟ್ ಮಾಡಿದ್ದಾರೆ.
ಇದು ಪ್ರವಾಸೋದ್ಯಮವನ್ನು ಉತ್ತೇಜಿಸುತ್ತದೆ ಮತ್ತು ಸಾಮಾಜಿಕ-ಆರ್ಥಿಕ ಅಭಿವೃದ್ಧಿಯನ್ನು ಉತ್ಕೃಷ್ಟಗೊಳಿಸುತ್ತದೆ ಎಂದು ಹೇಳಿದ್ದಾರೆ.
ಈ ರೈಲು ವಾರದಲ್ಲಿ ಆರು ದಿನಗಳು ಚಲಿಸುತ್ತದೆ ಮತ್ತು ಆರು ನಿಲ್ದಾಣಗಳಲ್ಲಿ ನಿಲ್ಲುತ್ತದೆ. ನ್ಯೂ ಅಲಿಪುರ್ದೂರ್, ಕೊಕ್ರಜಾರ್, ನ್ಯೂ ಬೊಂಗೈಗಾಂವ್ ಮತ್ತು ಕಾಮಾಖ್ಯ, ಹಾಗೆಯೇ ನ್ಯೂ ಜಲ್ಪೈಗುರಿ ಮತ್ತು ಗುವಾಹಟಿ ಜಂಕ್ಷನ್‌ಗಳಲ್ಲಿ ಈ ರೈಲಿನ ಸೇವೆ ಲಭ್ಯವಿದೆ.
ರೈಲು ನ್ಯೂ ಜಲ್ಪೈಗುರಿಯಿಂದ ಬೆಳಿಗ್ಗೆ 6.10 ಕ್ಕೆ ಹೊರಟು ಮಧ್ಯಾಹ್ನ ಗುವಾಹಟಿಗೆ ತಲುಪುತ್ತದೆ. ವಂದೇ ಭಾರತ್ ಎಕ್ಸ್‌ಪ್ರೆಸ್ ಗುವಾಹಟಿಯಿಂದ ಸಂಜೆ 4.30 ಕ್ಕೆ ಹೊರಟು ನ್ಯೂ ಜಲ್ಪೈಗುರಿಗೆ ರಾತ್ರಿ 10.20ರ ಸುಮಾರಿಗೆ ತಲುಪಲಿದೆ.
