ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಗುಜರಾತ್‌ನ ವಡೋದರಾದಲ್ಲಿ ಟಾಟಾ-ಏರ್ಬಸ್’ನ ಸಿ-295 ಸಾರಿಗೆ ವಿಮಾನ ಉತ್ಪಾದನಾ ಘಟಕಕ್ಕೆ ಪ್ರಧಾನಿ ನರೇಂದ್ರ ಮೋದಿ ಶಂಕುಸ್ಥಾಪನೆ ನೆರವೇರಿಸಿದರು.
ಈ ವೇಳೆ ಮಾತನಾಡಿದ ಅವರು, ವಡೋದರಾದಲ್ಲಿರುವ ವಿಮಾನ ಉತ್ಪಾದನಾ ಸೌಲಭ್ಯವು ವೈಮಾನಿಕ ಕ್ಷೇತ್ರದಲ್ಲಿ ಸ್ವಾವಲಂಬಿಯಾಗುವತ್ತ ಭಾರತಕ್ಕೆ ಒಂದು ದೊಡ್ಡ ಜಿಗಿತವಾಗಿದೆ ಎಂದು ಹೇಳಿದರು .
ಮುಂಬರುವ ವರ್ಷಗಳಲ್ಲಿ, ರಕ್ಷಣಾ ಮತ್ತು ಏರೋಸ್ಪೇಸ್ ಕ್ಷೇತ್ರಗಳು ಭಾರತವನ್ನು ‘ಆತ್ಮನಿರ್ಭರ್’ ಮಾಡಲು ಎರಡು ಪ್ರಮುಖ ಆಧಾರಸ್ತಂಭಗಳಾಗಿವೆ. 2025 ರ ವೇಳೆಗೆ, ನಮ್ಮ ರಕ್ಷಣಾ ಉತ್ಪಾದನಾ ಪ್ರಮಾಣವು $ 25 ಶತಕೋಟಿಯನ್ನು ದಾಟಲಿದೆ. ಉತ್ತರ ಪ್ರದೇಶ ಮತ್ತು ತಮಿಳುನಾಡಿನಲ್ಲಿ ಸ್ಥಾಪಿಸಲಾದ ರಕ್ಷಣಾ ಕಾರಿಡಾರ್‌ಗಳು ಈ ಮಟ್ಟಕ್ಕೆ ಶಕ್ತಿ ತುಂಬಲಿವೆ ಎಂದು ಹೇಳಿದ್ದಾರೆ.
ಭಾರತದ ರಕ್ಷಣಾ ಏರೋಸ್ಪೇಸ್ ಕ್ಷೇತ್ರದಲ್ಲಿ ಇಷ್ಟು ದೊಡ್ಡ ಹೂಡಿಕೆ ನಡೆಯುತ್ತಿರುವುದು ಇದೇ ಮೊದಲು. ತಮ್ಮ ಸರ್ಕಾರವು ಹಲವು ವರ್ಷಗಳಿಂದ ಅನೇಕ ಆರ್ಥಿಕ ಸುಧಾರಣೆಗಳನ್ನು ಕೈಗೊಂಡಿದೆ. ಈ ಸುಧಾರಣೆಗಳು ಉತ್ಪಾದನಾ ವಲಯಕ್ಕೆ ಹೆಚ್ಚು ಪ್ರಯೋಜನ ಮತ್ತು ಉತ್ತೇಜನವನ್ನು ನೀಡಿದೆ ಎಂದು ಅವರು ಹೇಳಿದರು.
ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ವಿಮಾನಯಾನ ಕ್ಷೇತ್ರ ಇಂದು ಭಾರತದಲ್ಲಿದೆ. ನಾವು ವಾಯು ಸಂಚಾರದಲ್ಲಿ ಜಾಗತಿಕವಾಗಿ ಅಗ್ರ ಮೂರು ದೇಶಗಳಲ್ಲಿರಲಿದ್ದೇವೆ ಎಂದು ಅವರು ಹೇಳಿದರು.
ಪೂರೈಕೆ ಸರಪಳಿಯಲ್ಲಿನ ಅಡೆತಡೆಗಳ ಹೊರತಾಗಿಯೂ, ಕೋವಿಡ್ ಮತ್ತು ಯುದ್ಧದ ಸಂದರ್ಭಗಳ ನಡುವೆಯೂ, ಭಾರತವು ಉತ್ಪಾದನಾ ವಲಯದಲ್ಲಿ ಬೆಳವಣಿಗೆಯ ಆವೇಗವನ್ನು ಮುಂದುವರೆಸಿದೆ. ವಡೋದರಾದಲ್ಲಿ ನಿರ್ಮಾಣವಾಗಲಿರುವ ಸಾರಿಗೆ ವಿಮಾನಗಳು ನಮ್ಮ ಸೇನೆಗೆ ಬಲ ನೀಡುವುದಲ್ಲದೆ, ವಿಮಾನ ತಯಾರಿಕೆಗೆ ಹೊಸ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲಿದೆ ಎಂದು ಪ್ರಧಾನಿ ಮೋದಿ ಹೇಳಿದರು.
ವಡೋದರಾದಲ್ಲಿ ನಿರ್ಮಾಣವಾಗಲಿರುವ ಸಾರಿಗೆ ವಿಮಾನಗಳು ನಮ್ಮ ಸೇನೆಗೆ ಬಲ ನೀಡುವುದಲ್ಲದೆ, ವಿಮಾನ ತಯಾರಿಕೆಗೆ ಹೊಸ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲಿದೆ ಎಂದು ಪ್ರಧಾನಿ ಮೋದಿ ಹೇಳಿದರು. ಭಾರತ, ಮೇಕ್ ಇನ್ ಇಂಡಿಯಾ, ಮೇಕ್ ಫಾರ್ ದಿ ಗ್ಲೋಬ್ ಎಂಬ ಮಂತ್ರವನ್ನು ಅನುಸರಿಸಿ ಇಂದು ತನ್ನ ಸಾಮರ್ಥ್ಯವನ್ನು ಹೆಚ್ಚಿಸುತ್ತಿದೆ ಎಂದು ಅವರು ಹೇಳಿದರು.
