ದೆಹಲಿ, ಬೆಂಗಳೂರಿನಲ್ಲಿ H1N1 ಪ್ರಕರಣಗಳ ಹೆಚ್ಚಳ: ಆತಂಕ ಬೇಡ, ಸೂಕ್ತ ಮುನ್ನೆಚ್ಚರಿಕೆಯಿಂದ ಆರೋಗ್ಯ ಕಾಪಾಡಿಕೊಳ್ಳಿ!

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ರಾಷ್ಟ್ರೀಯ ರೋಗ ನಿಯಂತ್ರಣ ಕೇಂದ್ರ ನೀಡಿರುವ ಇತ್ತೀಚಿನ ಮಾಹಿತಿಯಂತೆ ದೆಹಲಿ, ಕೋಲ್ಕತ್ತಾ ಹಾಗೂ ಬೆಂಗಳೂರು ಸೇರಿದಂತೆ ಪ್ರಮುಖ ನಗರಗಳಲ್ಲಿ ಹೆಚ್1ಎನ್1 (H1N1) ಇನ್ಫ್ಲುಯೆಂಜಾ ಪ್ರಕರಣಗಳಲ್ಲಿ ಏರಿಕೆ ಕಂಡುಬಂದಿದೆ. ಆದರೆ, “ಇದಕ್ಕೆ ಯಾವುದೇ ಹೊಸ ತಳಿ ಕಾರಣವಲ್ಲ, ಇದು ಸಾಮಾನ್ಯ ಋತುಮಾನದ ಜ್ವರ” ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ಸ್ಪಷ್ಟಪಡಿಸಿದ್ದು, ಜನರು ಆತಂಕ ಪಡುವ ಅಗತ್ಯವಿಲ್ಲ ಎಂದು ಅಭಯ ನೀಡಿದೆ.

ಎಚ್1ಎನ್‌1 ಮತ್ತು ಕೋವಿಡ್-19: ಗೊಂದಲ ಬೇಡ, ವ್ಯತ್ಯಾಸ ತಿಳಿಯಿರಿ

ಸಾಮಾನ್ಯ ಲಕ್ಷಣಗಳು: ಜ್ವರ, ಕೆಮ್ಮು, ಗಂಟಲು ನೋವು, ಮೈಕೈ ನೋವು ಮತ್ತು ಆಯಾಸ.

ಆದಾಗ್ಯೂ, ಎರಡೂ ವಿಭಿನ್ನ ವೈರಸ್‌ಗಳಿಂದ ಬರುತ್ತವೆ. ಎಚ್1ಎನ್‌1 ‘ಇನ್ಫ್ಲುಯೆಂಜಾ A’ ವೈರಸ್‌ನಿಂದ ಬಂದರೆ, ಕೋವಿಡ್ ‘ಸಾರ್ಸ್-ಕೋವ್-2’ ವೈರಸ್‌ನಿಂದ ಬರುತ್ತದೆ.

ಎಚ್1ಎನ್‌1: ಈ ಜ್ವರ ತಕ್ಷಣವೇ ಕಾಣಿಸಿಕೊಳ್ಳುತ್ತದೆ (ಉದಾಹರಣೆ: ಇದ್ದಕ್ಕಿದ್ದಂತೆ ಹೆಚ್ಚಿನ ಜ್ವರ, ಮೈಕೈ ನೋವು).

ಕೋವಿಡ್-19: ಇದರಲ್ಲಿ ವಾಸನೆ ಮತ್ತು ರುಚಿ ಕಳೆದುಕೊಳ್ಳುವುದು, ಹಾಗೂ ಕೆಲವೊಮ್ಮೆ ಹೊಟ್ಟೆಗೆ ಸಂಬಂಧಿಸಿದ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.

ವೈದ್ಯರ ಸಲಹೆ ಪಡೆಯಿರಿ

ಲಕ್ಷಣಗಳು ಒಂದೇ ತರಹ ಕಾಣುವುದರಿಂದ ಸ್ವಯಂ ಚಿಕಿತ್ಸೆ ಮಾಡಿಕೊಳ್ಳದೆ, ವೈದ್ಯರ ಬಳಿ ತಪಾಸಣೆ ಮಾಡಿಸಿಕೊಳ್ಳುವುದು ಉತ್ತಮ.

ಸರಳ ಆರೋಗ್ಯ ನಿಯಮಗಳು

ಮಾಸ್ಕ್ ಧರಿಸುವುದು, ಕೈಗಳನ್ನು ಆಗಾಗ ಸ್ವಚ್ಛಗೊಳಿಸುವುದು ಮತ್ತು ಪೌಷ್ಟಿಕ ಆಹಾರ ಸೇವನೆಯಿಂದ ಯಾವುದೇ ವೈರಸ್‌ನಿಂದ ಸುಲಭವಾಗಿ ರಕ್ಷಣೆ ಪಡೆಯಬಹುದು.

ಸಂಪೂರ್ಣ ಸಿದ್ಧತೆ

ಆರೋಗ್ಯ ಇಲಾಖೆಯು ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದ್ದು, ಅಗತ್ಯ ಔಷಧಗಳು ಲಭ್ಯವಿವೆ. ಸರಿಯಾದ ಜಾಗೃತಿ ಮತ್ತು ಜವಾಬ್ದಾರಿಯುತ ನಡವಳಿಕೆಯಿಂದ ಎಚ್1ಎನ್‌1 ಅನ್ನು ಸುಲಭವಾಗಿ ನಿಯಂತ್ರಿಸಬಹುದು.