ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕನ್ನಡ ಚಿತ್ರರಂಗದ ಹೆಮ್ಮೆಯ ನಟ, ‘ರಾಕಿಂಗ್ ಸ್ಟಾರ್’ ಯಶ್ ಅವರು ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾದಲ್ಲಿ ರಾವಣ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಮಹತ್ವಾಕಾಂಕ್ಷೆಯ ಚಿತ್ರದಲ್ಲಿ ಸೀತಾ ಮಾತೆಯ ಪಾತ್ರದಲ್ಲಿ ನಟಿಸಿರುವ ಪ್ರತಿಭಾವಂತ ನಟಿ ಸಾಯಿ ಪಲ್ಲವಿ ಅವರ ಬಗ್ಗೆ ಯಶ್ ಇತ್ತೀಚಿನ ಸಂದರ್ಶನದಲ್ಲಿ ಮುಕ್ತಕಂಠದಿಂದ ಪ್ರಶಂಸಿಸಿದ್ದಾರೆ. ಸಾಯಿ ಅವರ ಸರಳತೆ ಮತ್ತು ವ್ಯಕ್ತಿತ್ವವನ್ನು ಯಶ್ ಅದ್ಭುತವಾಗಿ ಬಣ್ಣಿಸಿದ್ದಾರೆ.
ಸಾಯಿ ಪಲ್ಲವಿ ಅವರ ಒಡನಾಟ ಹಾಗೂ ಅವರ ವೈಬ್ ಬಗ್ಗೆ ಮಾತನಾಡಿದ ಯಶ್, ಅವರಲ್ಲಿ ಸ್ತ್ರೀ ಸಹಜವಾದ ನೈಜ ಒಳಶಕ್ತಿ ಹಾಗೂ ಮನಸ್ಸಿಗೆ ಮುಟ್ಟುವ ಪ್ರಶಾಂತತೆ ಇದೆ ಎಂದಿದ್ದಾರೆ. ತಮ್ಮ ಜೀವನದಲ್ಲಿ ಅತ್ಯಂತ ಸ್ಪಷ್ಟತೆ ಹೊಂದಿರುವ ಗಟ್ಟಿಗಿತ್ತಿ ಅವರು ಎಂದು ಅಭಿಪ್ರಾಯಪಟ್ಟಿರುವ ಯಶ್, ಅವರ ಮುಖದಲ್ಲಿರುವ ವಿಶೇಷ ತೇಜಸ್ಸು ಹಾಗೂ ಕಾಂತಿ ‘ಸೀತಾ ದೇವಿ’ಯಂತಹ ಮಹತ್ವದ ಪಾತ್ರಕ್ಕೆ ಸಂಪೂರ್ಣ ನ್ಯಾಯ ಒದಗಿಸುತ್ತದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಸಾಯಿ ಪಲ್ಲವಿ ಅವರು ಅತ್ಯಂತ ಧಾರ್ಮಿಕ ಮನೋಭಾವದವರು ಎಂಬುದು ತಮಗೆ ತಿಳಿದು ಅಚ್ಚರಿಯಾಯಿತೆಂದು ಯಶ್ ಹೇಳಿದ್ದಾರೆ. ಇಂದಿನ ಆಧುನಿಕ ದಿನಗಳಲ್ಲಿ ಇಂತಹ ಸರಳತೆ ಮತ್ತು ಆಧ್ಯಾತ್ಮಿಕ ಒಲವು ಕಾಣಸಿಗುವುದು ಬಹಳ ಅಪರೂಪ. ಅವರ ಈ ಆಂತರಿಕ ಸೌಂದರ್ಯ ಮತ್ತು ಸತ್ಯಸಂಧತೆಯು ತೆರೆಯ ಮೇಲಿನ ಪಾತ್ರದಲ್ಲೂ ಸ್ಪಷ್ಟವಾಗಿ ಗೋಚರಿಸಲಿದೆ ಎಂದು ಅವರು ತಿಳಿಸಿದ್ದಾರೆ. ಒಟ್ಟಾರೆಯಾಗಿ, ಸಾಯಿ ಪಲ್ಲವಿ ಅವರ ಒಟ್ಟು ವ್ಯಕ್ತಿತ್ವವು ಸೀತಾ ಮಾತೆಯ ಪಾತ್ರಕ್ಕೆ ಅಚ್ಚುಕಟ್ಟಾಗಿ ಒಗ್ಗಿಕೊಳ್ಳುತ್ತದೆ ಎಂಬುದು ರಾಕಿಂಗ್ ಸ್ಟಾರ್ ಯಶ್ ಅವರ ಅಭಿಪ್ರಾಯವಾಗಿದೆ.
