ಹೊಸದಿಗಂತ ಮಂಗಳೂರು :
ಅಲ್ಲಿ ವ್ಯಾಪಾರ -ವ್ಯವಹಾರ ಕೌಂಟರ್‌ಗಳಲ್ಲಿದ್ದುದು ಮೂರನೇ ತರಗತಿಯಿಂದ ಏಳನೇ ತರಗತಿ ವರೆಗಿನ ಪುಟಾಣಿಗಳು. ಅವರ ವ್ಯವಹಾರ ಕೌಶಲ ಯಾವುದೇ ಮಳಿಗೆಗಳಿಗಿಂತ ಕಡಿಮೆಯಿರಲಿಲ್ಲ. ಅಲ್ಲಿತ್ತು ಹಣ್ಣುಹಂಪಲು, ತರಕಾರಿ ಮಳಿಗೆಗಳು, ಸ್ಟೇಷನರಿ, ಆಟಿಕೆಗಳು, ಆಹಾರ ವಸ್ತುಗಳು, ತರಕಾರಿ ಬೀಜಗಳು, ಔಷ ಸಸ್ಯಗಳು, ಹೂವಿನ ಗಿಡಗಳು, ಕಲಾ-ಕೈಯಿಂದ ಮಾಡಿದ ಚಿತ್ರಕಲೆ, ಶಿಲ್ಪ-ಅಲಂಕಾರಿಕ ವಸ್ತುಗಳ ಮಳಿಗೆ , ಪುಸ್ತಕ ಮಳಿಗೆ… ಗ್ರಾಹಕರಿಗೆ ಮನದಟ್ಟು ಮಾಡುವ ಆಕರ್ಷಕ ವಿವರಣೆ, ಲೆಕ್ಕಾಚಾರ, ಗೂಗಲ್ ಪೇಯಂತಹ ಆಧುನಿಕ ವ್ಯವಹಾರ ತಂತ್ರಜ್ಞಾನಗಳ ಬಳಕೆ… ಹೀಗೆ ಎಲ್ಲವೂ ಇತ್ತು.
ಶಕ್ತಿನಗರದ ಶಕ್ತಿ ರೆಸಿಡೆನ್ಶಿಯಲ್ ಶಾಲೆಯ ಪ್ರಾಥಮಿಕ ವಿಭಾಗ (೩ನೇ ತರಗತಿಯಿಂದ ೭ನೇ ತರಗತಿ)ದ ವರೆಗಿನ ವಿದ್ಯಾರ್ಥಿಗಳಿಗೆ ಕಲೆ ಏಕೀಕರಣ (ಆರ್ಟ್‌ಇಂಟಿಗ್ರೇಟೆಡ್) ಪ್ರಾಜೆಕ್ಟ್‌ನ ಪ್ರಯುಕ್ತ ಶಕ್ತಿ ಮೇಳದಲ್ಲಿ ಶನಿವಾರ ಕಂಡುಬಂದ ಕಲರವವಿದು. ಸಂಸ್ಥೆಯ ಆಡಿಟೋರಿಯಂನಲ್ಲಿ ಈ ಶಕ್ತಿ ಮೇಳವನ್ನು ಆಯೋಜಿಸಲಾಗಿತ್ತು. ಗಣಿತ, ಇಂಗ್ಲೀಷ್, ವಿಜ್ಞಾನ, ಕನ್ನಡ ತರಗತಿಯಲ್ಲಿ ಕಲಿಯುವ ವಿಷಯಗಳನ್ನು ನಿಜ ಜೀವನದಲ್ಲಿ ಅಳವಡಿಸಿ ಹೆಚ್ಚಿನ ಜ್ಞಾನವನ್ನು ಸಂಪಾದಿಸುವುದಾಗಿದೆ. ಗಣಿತವನ್ನು ತೆಗೆದುಕೊಂಡಾಗ ವ್ಯವಹಾರದಲ್ಲಿ ಬರುವ ಲಾಭ ನಷ್ಟವನ್ನು ಲೆಕ್ಕಾಚಾರ ಮಾಡುವುದು. ಇಂಗ್ಲೀಷ್ ಮತ್ತು ಕನ್ನಡ ವ್ಯವಹಾರಿಕ ಸಂವಹನ ಕೌಶಲ ವೃದ್ಧಿಸುವುದು, ವಿಜ್ಞಾನವು ಸ್ವಚ್ಛತೆ ಮತ್ತು ನೈರ್ಮಲ್ಯಕ್ಕೆ ಸಂಬಂಸಿದ್ದು, ಒಟ್ಟಾರೆಯಾಗಿ ಇಲ್ಲಿ ಜೀವನ ಶಿಕ್ಷಣಕ್ಕೆ ಒತ್ತು ನೀಡಲಾಗಿತ್ತು.
ಶಿಕ್ಷಕರ ಮಾರ್ಗದರ್ಶನದಲ್ಲಿ ವಿದ್ಯಾರ್ಥಿಗಳು ಶಕ್ತಿ ಮೇಳದ ಮೂಲಕ ಸ್ಟಾಲ್‌ಗಳಲ್ಲಿ ಆಕರ್ಷಕ ರೀತಿಯಲ್ಲಿ ಪ್ರದರ್ಶನ ಮತ್ತು ಮಾರಾಟ ಮಾಡಿ ಗಮನ ಸೆಳೆದರು. ೬೦ಮಳಿಗೆಗಳಿದ್ದವು. ವಸ್ತುಗಳನ್ನು ಖರೀದಿಸಿದವರಿಗೆ ಇಲ್ಲಿ ರಶೀದಿಯನ್ನು ನೀಡುವ ಮೂಲಕ ವ್ಯವಹಾರ ಪಾರದರ್ಶಕತೆಯ ಮೌಲ್ಯವನ್ನು ಕೂಡ ವಿದ್ಯಾರ್ಥಿಗಳಿಗೆ ಮನಗಾಣಿಸಲಾಗಿತ್ತು.
ಈ ಕಾರ್ಯಕ್ರಮವನ್ನು ಸಂಸ್ಥೆಯ ಸಂಸ್ಥಾಪಕರಾದ ಡಾ. ಕೆ.ಸಿ. ನಾಕ್ ಉದ್ಘಾಟಿಸಿದರು. ವಿದ್ಯಾರ್ಥಿಗಳಲ್ಲಿ ಉದ್ಯಮ ಕೌಶಲ್ಯವನ್ನು ವೃದ್ಧಿಸಬೇಕೆಂಬುವುದು ಇದರ ಉದ್ದೇಶವಾಗಿದೆ. ವಿದ್ಯಾರ್ಥಿಗಳು ಹಣಕಾಸು ನಿರ್ವಹಣೆ ಸಂವಹನ, ಸ್ವಚ್ಛತೆ ಮತ್ತು ನೈರ್ಮಲ್ಯದ ಬಗ್ಗೆ ಸರಿಯಾದ ಜ್ಞಾನವನ್ನು ಸಂಪಾದಿಸಬೇಕಾಗಿದೆ. ಇಂತಹ ಮೇಳವನ್ನು ಆಯೋಜಿಸಿದಾಗ ಅದರಲ್ಲಿ ಭಾಗವಹಿಸಿ ವ್ಯಾಪಾರ, ವ್ಯವಹಾರಗಳನ್ನು ಮಾಡಿದಾಗ ನಿಜವಾದ ಆತ್ಮ ವಿಶ್ವಾಸವು ವೃದ್ಧಿಯಾಗುವುದು ಎಂದು ಹೇಳಿ ಅವರು ಶುಭ ಹಾರೈಸಿದರು.
ಶಕ್ತಿ ಮೇಳದಲ್ಲಿ ಹಣ್ಣು ಹಂಪಲುಗಳ ಸ್ಟಾಲ್ ಆರೋಗ್ಯಕರ ಆಹಾರವನ್ನು ಉತ್ತೇಜಿಸುವ ರೀತಿಯಲ್ಲಿದ್ದರೆ, ಸ್ಟೇಷನರಿ – ಸೃಜನಶೀಲತೆ ಮತ್ತು ವ್ಯಾಪಾರ-ವ್ಯವಹಾರ ಕೌಶಲವನ್ನು ಪ್ರೋತ್ಸಾಹಿಸುವ ರೀತಿಯಲ್ಲಿತ್ತು. ಆಟಗಳು -ತಂತ್ರಜ್ಞಾನದ ಚಿಂತನೆ ಮತ್ತು ಸಮಸ್ಯೆಗಳನ್ನು ಪರಿಹರಿಸುವ ಅರಿವು ಮೂಡಿಸುವಂತಿತ್ತು. ಆಹಾರ ವಸ್ತುಗಳು ನೈರ್ಮಲ್ಯ ಮತ್ತು ಪೋಷಕಾಂಶಯುಕ್ತ ಆಹಾರದ ಮಹತ್ವವನ್ನು ತಿಳಿಸುವುದಾಗಿದೆ. ನರ್ಸರಿ ಸ್ಟಾಲ್ ಗಿಡಗಳನ್ನು ಮಾರಾಟ ಮಾಡಿ ಪರಿಸರದ ಬಗ್ಗೆ ಜಾಗೃತಿ ಮೂಡಿಸುವ ಮತ್ತು ಕಲಾ ಸ್ಟಾಲ್ ವಿದ್ಯಾರ್ಥಿಗಳ ಕಲಾ ಕೌಶಲ್ಯಗಳನ್ನು ಉತ್ತೇಜಿಸುವ ರೀತಿಯಲ್ಲಿ ರೂಪಿಸಲಾಗಿತ್ತು.
